1 Futsi kwenteka kutsi umnakaboJarede, (manje sibalo setikebhe lebesetilungisiwe betisiphohlongo) wahamba waya entsabeni, lebebayibita ngentsaba iShelemu, ngenca yebudze bayo lobukhulu, wancibilikisa edvwaleni ematje lamancane lalishumi nesitfupha; bekamhlophe aphindze akhanya, njengengilazi lekubonakala ngale kwayo; wawatfwala ngetandla takhe waya nawo etikwentsaba, waphindze wakhala eNkhosini, watsi:

2 Awu Nkhosi, utsite sitawutungeletwa tikhukhula. Manje buka, Awu Nkhosi, futsi ungayitfukutseleli inceku yakho ngenca yebutsakatsaka bayo; ngoba siyati kutsi wena ungcwele uphindze uhlala emazulwini, nekutsi tsine asikafaneleki ngaphambi kwakho; ngenca yekuwa imvelo yetfu seloku yaba nebubi njalo; noko, Awu Nkhosi, usinike umyaleto wekutsi kufanele sicele kuwe, kute kuwe sitfole njengekwetifiso tetfu.

3 Buka, Awu Nkhosi, usishayile ngenca yebubi betfu, wasichuba, futsi kuleminyaka leminingi besisehlane; noko, ube nemusa kitsi. Awu Nkhosi, ngibuke ungihawukele, ususe intfukutselo yakho kulabantfu bakho, futsi ungavumi kutsi bahambe bewele kulamanti lanesivunguvungu ebumnyameni; kodvwa buka letintfo lengitincibilikisile ngatikhipha edvwaleni.

4 Futsi ngiyati, Awu Nkhosi, kutsi wena unemandla onkhe, ungenta noma yini loyifisako kutsi kuzuze umuntfu; ngako-ke tsintsa lamatje, Awu Nkhosi, ngemunwe wakho, uwalungisele kutsi akhanye ebumnyameni; futsi ayawusikhanyisela etikebheni lesitilungisile, kute sibe nekukhanya ngesikhatsi sewela lwandle.

5 Buka, Awu Nkhosi, ungakwenta loku. Siyati kutsi wena uyakwati kukhombisa emandla akho lamakhulu, labukeka amancane ngekucondza kwebantfu.

6 Futsi kwenteka kutsi ngesikhatsi umnakabo Jarede sekawashito lamavi, buka, iNkhosi yelula sandla sayo phindze yawatsintsa ematje ngalinye nangalinye ngemunwe wayo. Futsi lesihenco sesuswa emehlweni emnakaboJarede, wabona umunwe weNkhosi; bewunjengemunwe wemuntfu, njengenyama kanye nengati; futsi umnakaboJarede wawa phansi phambi kweNkhosi, ngoba washaywa kwesaba.

7 Futsi iNkhosi yabona kutsi umnakaboJarede besekawele phansi; yase itsi kuye: Sukuma, uwiswa yini na?

8 Watsi eNkhosini: Ngibone umunwe weNkhosi, futsi ngesabile hleze ingishaye; ngoba bengingati kutsi iNkhosi inenyama kanye nengati.

9 INkhosi yatsi kuye: Ngenca yelukholo lwakho ubonile kutsi ngiyawutsatsa umtimba wenyama kanye nengati; futsi akukate nanini kute umuntfu phambi kwami ngelukholo lolukhulu kangaka njengoba wena wentile; ngoba kube bekungasiko njalo bewungeke uwubone umunwe wami. Ngabe ubona lokuningi kunaloku na?

10 Futsi waphendvula watsi: Cha; Nkhosi, tivete kimi.

11 INkhosi yatsi kuye: Utawuwakholwa yini lamavi lengitawuwakhuluma na?

12 Waphendvula watsi: Yebo, Nkhosi, ngiyati kutsi wena ukhuluma liciniso, ngoba unguNkulunkulu weliciniso, futsi angeke uwacambe emanga.

13 Futsi sekawashito lamavi, buka, iNkhosi yativeta kuye, yatsi: Ngenca yekutsi uyatati letintfo sewuyahlengwa ekuweni; ngako-ke ubuyiselwa ebukhoneni bami; ngako-ke ngiyativeta kuwe.

14 Buka, nginguye loyo lowalungiselelwa kusukela ekusekelweni kwemhlaba kute ngihlenge bantfu bami. Buka, NginguJesu Khristu. Ngingu Babe kanye neNdvodzana. Kimi lonkhe luntfu luyawuba nekuphila, futsi loko kuyawuba kwaphakadze, ngisho nalabo labayawukholwa egameni lami; futsi bayawuba ngemadvodzana kanye nemadvodzakati ami.

15 Futsi angikate nanini ngitivete kumuntfu lengimdalile, ngoba umuntfu akate akholwe kimi njengoba wena wentile. Uyabona yini kutsi wentiwe ngemfanekiso wami na? Yebo, ngisho bonkhe bantfu badalwa ekucaleni ngemfanekiso wami.

16 Buka, lomtimba, lowubonako manje, ngumtimba wemoya wami; futsi umuntfu ngamdala ngemfanekiso wemtimba wemoya wami; njengoba ngivela kuwe ngisemoyeni ngiyawuvela kubantfu bami enyameni.

17 Manje, njengoba mine, Moroni, ngitsite ngeke ngikwati kwenta umlandvo lophelele waletintfo letibhaliwe, ngako-ke kuyangenelisa kusho kutsi Jesu wativeta kulendvodza akumoya, ngisho nangaleyondlela kanjalo nangekufana nalowo mtimba latibonakalisa ngawo kumaNefi.

18 Wamsebentela nanjengoba asebentela emaNefi; futsi konkhe loku, kute kutsi lendvodza yati kutsi bekanguNkulunkulu, ngenca yemisebenti leminingi nalemikhulu iNkhosi leyambonisa yona.

19 Futsi ngenca yelwati lwalendvodza ayitange isavinjelwa kutsi ibone ngekhatsi kwesihenco; yabona umunwe waJesu, lokwatsi uma iwubona, yawa ngekwesaba; ngoba yati kutsi bekungumunwe weNkhosi; futsi ayitange isaba nelukholo, ngoba beseyati, ingasangabati lutfo.

20 Ngaloko-ke, sekanalolu lwati loluphelele lwaNkulunkulu, akatange asavinjelwa kutsi abesekhatsi kwalesihenco; ngako-ke wambona Jesu; futsi wamsebentela.

21 Futsi kwenteka kutsi iNkhosi yatsi kumnakaboJarede: Buka, ungativumeli letintfo lotibonile nalotivile kutsi tiye emhlabeni, kute kufike sikhatsi lengiyawudvumisa ngaso libito lami enyameni; ngaloko-ke, uyawutigcina letintfo lotibonile, nalotivile, ungatikhombisi muntfu.

22 Buka, ngesikhatsi sewuhlangana nami, uyawutibhala uphindze utivale tilondzeke, kute kubebete namunye longatihumusha; ngoba uyawutibhala ngelulwimi lolungeke lufundzeke.

23 Buka, lamatje lamabili ngitawukunika wona, futsi uyawuwavala alondzeke nawo naleto tintfo loyawutibhala.

24 Ngoba buka, lolo lulwimi loyawulubhala ngiluphambanisile; ngako-ke ngitawukwenta ngesikhatsi sami lesifanele kutsi lamatje aticacise emehlweni ebantfu letintfo loyawutibhala.

25 Futsi ngesikhatsi iNkhosi seyiwakhulumile lamavi, yakhombisa umnakaboJarede bonkhe labantfu bemhlaba labebakadze bakhona, kanjalo nabo bonkhe labo labebayawuba khona; futsi ayibagodlanga emehlweni ayo, kwate kwaba ngisho nasemikhawulweni yemhlaba.

26 Ngoba beyishito kuye ngetikhatsi letingaphambilini, kutsi uma bekayawukholwa kuyo kutsi yayitawukhombisa tonkhe tintfo—loko kwakutawukhonjiswa kuye; ngako-ke iNkhosi yayingeke isagodla nanoma yini kuye, ngoba bekati kutsi iNkhosi ingamkhombisa tonkhe tintfo.

27 INkhosi yatsi kuye: Bhala letintfo bese uyativala tilondzeke; ngiyawutiveta ngesikhatsi sami lesifanele kubantfwana bebantfu.

28 Futsi kwenteka kutsi iNkhosi yamyaleta kutsi awavale alondzeke nalawo matje lamabili labekawatfolile, futsi angawaveti, ite iNkhosi iwavete yona kubantfwana bebantfu.