1 Manje mine, Moroni, sengiwabhalile emavi lengiyaletwe ngawo, njengekukhumbula kwami; futsi sengikutjelile tintfo lengitivale talondzeka; ngako-ke ungatitsintsi kute utihumushe; ngoba leyontfo walelwe yona, ngaphandle kwekutsi kube semvakwesikhashana ngekuhlakanipha kwaNkulunkulu.

2 Buka, ungaba nenhlanhla yekutsi bongcwengcwe ubakhombise labo labayawusita kutsi kuletfwe lomsebenti;

3 Futsi bayawukhonjiswa kulabatsatfu ngemandla aNkulunkulu, ngaloko-ke bayawukwati ngaphandle kwekungabata kutsi letintfo tiliciniso.

4 Futsi ngemlomo wabofakazi labatsatfu letintfo tiyawumiswa; nebufakazi balabatsatfu, kanye nalomsebenti, kuwo lokuyawukhonjiswa emandla aNkulunkulu kanjalo nelivi lakhe, Babe, neNdvodzana kanye naMoya loNgcwele labafakaza ngako—futsi konkhe loku kuyawuma njengebufakazi ngalokumelene nemhlaba ngelusuku lwekugcina.

5 Futsi nangabe bayaphendvuka bete kuBabe egameni laJesu, bayawukwemukelwa embusweni waNkulunkulu.

6 Manje, uma ngite ligunya laletintfo, tilahleni, ngoba niyawukwati kutsi ngineligunya ngesikhatsi seningibona, futsi siyawuma phambi kwaNkulunkulu ngelusuku lwekugcina. Amen.