1 Futsi kwenteka kutsi Shezi, lobekawesitukulwane saHethi—ngoba Hethi bekabulewe yindlala, kanye nabo bonkhe bendlu yakhe ngaphandle kwaShezi—ngaloko-ke, Shezi wacala waphindze wakha bantfu labebacishe babulawa konakala nendlala.

2 Futsi kwenteka kutsi Shezi wakukhumbula kubhujiswa kwaboyise, wakha umbuso lolungile; ngoba wakukhumbula loko iNkhosi lebeyikwentile ekuletseni Jarede kanye nemnakabo ngesheya kwelwandle, wahamba etindleleni teNkhosi; futsi watala emadvodzana kanye nemadvodzakati.

3 Futsi indvodzana yakhe lendzala, libito layo lebekunguShezi, yamvukela; noko, Shezi washaywa sandla sesigebengu, ngenca yemcebo wakhe lomningi, lokwaphindze kwaletsa kuthula kuyise.

4 Futsi kwenteka kutsi uyise wakha emadolobha lamaningi eveni, nebantfu bacala kusabalala eveni lonkhe. Shezi waphila wate waba mdzala kakhulu; watala Riphilakhishi. Wafa, wase Riphilakhishi uyabusa esikhundleni sakhe.

5 Futsi kwenteka kutsi Riphilakhishi akakwentanga loko lebekulungile emehlweni eNkhosi, ngoba yena waba nebafati labaningi kanye netingani, waphindze wabeka loko emahlombe ebantfu lobekumatima kutsi bakwetfwale; yebo, wabatselisa ngemtselo lomatima; ngalomtselo wakha takhiwo letiningi letivulekile.

6 Watakhela sihlalo sebukhosi lesihle kakhulu; wakha lamaningi emajele, futsi loyo lobekangafuni kukhokha umtselo bekamfaka ejele; loyo lobekangakhoni kukhokha umtselo naye bekafakwa ejele; wenta kutsi basebente njalo kute bondliwe; futsi loyo lobekakwala kusebenta bekenta kutsi abulawe.

7 Ngaloko-ke wawutfola wonkhe umsebenti wakhe lomuhle, yebo, ngisho neligolide lakhe lelicolisakeli wenta kutsi licengwe ejele; tonkhe tinhlobo temisebenti lemihle wenta kutsi tisetjentwe ejele. Futsi kwenteka kutsi wabahlupha bantfu ngebugwadla kanye nangetinengiso takhe.

8 Futsi watsi sekabuse sikhatsi lesiyiminyaka lengemashumi lamane nakubili bantfu bamvukela; kwacala kwaba khona imphi kulelive, kangangekutsi Riphilakhishi wabulawa, nesitukulwane sakhe saphocelelwa kutsi sibaleke kulelive.

9 Futsi kwenteka emvakwesikhatsi seminyaka leminingi, Moriyanthoni, (awesitukulwane saRiphilakhishi) wabutsela ndzawonye libutfo lalabacoshwa, wahamba wayawukulwa nebantfu; wawazuza emandla kulamaningi emadolobha; imphi yacala yaba yimbi kakhulu, yadvonsa sikhatsi lesiyiminyaka leminingi; futsi wawazuza emandla eveni lonkhe, watibeka waba yinkhosi eveni lonkhe.

10 Emvakwekutsi sekatibeke waba yinkhosi wawucekisa umtfwalo ebantfwini, ngaloko wazuza kutsandvwa bantfu, futsi bamgcoba kutsi abe yinkhosi yabo.

11 Futsi wenta kulunga kubantfu, kodvwa hhayi kuye ngenca yebugwadla bakhe lobuningi; ngaloko-ke wehlukaniswa neNkhosi.

12 Futsi kwenteka kutsi Moriyanthoni wakha emadolobha lamaningi, bantfu banotsa kakhulu ngaphansi kwembuso wakhe, ngenca yetakhiwo, ligolide nesiliva, kukhulisa lokuyinhlavu, imihlambi yetimvu, imihlambi netinkhomo, nangenca yetintfo letitsite lebetibuyiselwe kubo.

13 Moriyanthoni waphila wate waba mdzala kakhulu, ngaleso sikhatsi watala Khimi; Khimi wabusa esikhundleni seyise; wabusa iminyaka lesiphohlongo, uyise wafa. Futsi kwenteka kutsi Khimi akatange abuse ngekulunga, ngaloko-ke akatange atsandvwe yiNkhosi.

14 Umnakabo wamvukela, lokwatsi ngaloko wamfaka ekutfunjweni; wahlala ekutfunjweni tonkhe tinsuku takhe; watala emadvodzana kanye nemadvodzakati asekutfunjweni, futsi ebudzaleni bakhe watala Levi; wabese uyafa.

15 Futsi kwenteka kutsi Levi wasebenta asekutfunjweni emvakwekufa kweyise, sikhatsi lesingangeminyaka lengemashumi lamane nakubili. Walwa nenkhosi yelive, lokwatsi ngako watitfolela umbuso.

16 Emvakwekutsi sekatitfolele umbuso wenta loko lobekulungile emehlweni eNkhosi; bantfu baphumelela kulelive; waphila wate waba mdzala impela, watala emadvodzana kanye nemadvodzakati; futsi ngetulu kwaloko watala Khoromu, lamgcoba waba yinkhosi esikhundleni sakhe.

17 Futsi kwenteka kutsi Khoromu wenta loko lobekukuhle emehlweni eNkhosi tonkhe tinsuku takhe; watala emadvodzana nemadvodzakati lamaningi; emvakwekutsi sekabone emalanga lamaningi wafa, njengabo bonkhe bantfu; futsi Khishi wabusa esikhundleni sakhe.

18 Futsi kwenteka kutsi Khishi wafa naye ngalokunjalo, kwatsi Libi wabusa esikhundleni sakhe.

19 Futsi kwenteka kutsi Libi naye wenta loko lobekukuhle emehlweni eNkhosi. Ngetinsuku taLibi tinyoka letinebutsi tabulawa. Ngaloko-ke bahamba baya eveni lelingaseningizimu, kuyotingela kudla kwebantfu baseveni, ngoba live belimbonywe tilwane tasehlatsini. Libi naye lucobo waba ngumtingeli lomkhulu.

20 Bakha lidolobha lelikhulu esihlengeni lesincane selive, edvute nendzawo lapho lwandle belwehlukana khona nelive.

21 Balilondvolota live lelingaseningizimu kutsi libe lihlane, kute batfole tinyamatane. Futsi buso bonkhe belive lebelingasenyakatfo bebumbonywe bantfu labebahlala khona.

22 Bebasebenta kakhulu, bebatsenga baphindze batsengise bese bayatsengiselana lomunye nalomunye, kute batfole inzuzo.

23 Bebasebenta ngalo lonkhe luhlobo lwensimbi lesalitje, benta ligolide, isiliva, insimbi, litfusi, kanye nalo lonkhe luhlobo lwetinsimbi; bebatimba emhlabatsini; ngaloko-ke, benta tindvundvuma letinkhulu temhlabatsi kute batfole insimbi lesalitje, yeligolide, isiliva, insimbi, kanye neyelitfusi. Futsi bebenta tonkhe tinhlobo temisebenti lemihle.

24 Baba nesilika, kanye nelineni lecolisakele lelukiwe; futsi bebenta tonkhe tinhlobo tendvwangu, kute batigcokise.

25 Futsi bebenta tonkhe tinhlobo tetintfo tekusebenta kute balime umhlabatsi, kute balime baphindze bahlanyele, kute bavune baphindze bahlakule, futsi kanjalo nekutsi babhule.

26 Bebenta tonkhe tinhlobo tetintfo tekusebenta labasebentisa ngato tilwane tabo.

27 Bebenta tonkhe tinhlobo tetikhali temphi. Futsi bebenta tonkhe tinhlobo temsebenti webuciko lobukhulu.

28 Bebangakate nanini bantfu babusiswe kangaka njengabo, baphumelele kakhulu ngesandla seNkhosi. Futsi bebaseveni lebelikhetsekile ngetulu kwawo onkhe emave, ngoba iNkhosi beyikukhulumile loko.

29 Futsi kwenteka kutsi Libi waphila iminyaka leminingi, watala emadvodzana nemadvodzakati; ngetulu kwaloko watala Heyathumu.

30 Futsi kwenteka kutsi Heyathumu wabusa esikhundleni seyise. Ngesikhatsi Heyathumu sekabuse iminyaka lengemashumi lamabili nakune, buka, umbuso watsatfwa kuye. Wasebenta iminyaka leminingi asekutfunjweni, yebo, ngisho nangawo onkhe emalanga akhe lebekasele.

31 Watala Hethi, Hethi waphila ekutfunjweni onkhe emalanga akhe. Hethi watala Aroni, na-Aroni wahlala ekutfunjweni onkhe emalanga akhe; yena watala Amnigada, Amnigada naye wahlala ekutfunjweni onkhe emalanga akhe; yena wabese utala Khoriyanthumu, naKhoriyanthumu wahlala ekutfunjweni onkhe emalanga akhe; futsi yena watala Khomu.

32 Futsi kwenteka kutsi Khomu wadvonsa incenye yembuso. Wabusa etikwencenye yembuso iminyaka lengemashumi lamane nakubili; wahamba wayawukulwa nenkhosi, Amgide, balwa sikhatsi lesiyiminyaka leminingi, lokwatsi ngaleso sikhatsi Khomu wamncoba Amgidi, wazuza emandla embusweni lobewusele.

33 Ngetinsuku taKhomu kwacala kwaba khona tigebengu kulelive; tachubeka ngemacebo akadzeni, tifungisa tifungo ngendlela yebasendvulo, tiphindze tifuna kubhubhisa umbuso .

34 Manje Khomu walwa nabo kakhulu; noko, akatange abehlule.