1 Futsi etinsukwini taKhom kweta baphrofethi labaningi, baphrofetha ngekubhujiswa kwalabo bantfu labanemandla ngaphandle kwekutsi baphendvuke, babuyele eNkhosini, bayekele kubulala kanye nebubi babo.

2 Futsi kwenteka kutsi baphrofethi balahlwa bantfu, babalekela kuKhomu kute bativikele, ngoba bantfu bebafuna kubabulala.

3 Baphrofetha kuKhomu tintfo letiningi, wababusisa kuto tonkhe tinsuku takhe lebesetisele.

4 Futsi waphila wate waba mdzala kakhulu, watala Shibilomu, wase Shibilomu ubusa esikhundleni sakhe. UmnakaboShibilomu wamvukela, kwase kucala kuba khona imphi lenkhulu kakhulu eveni lonkhe.

5 Futsi kwenteka kutsi umnakaboShibilomu wenta kutsi bonkhe labaphrofethi labebaphrofethe ngekubhujiswa kwebantfu babulawe.

6 Kwaba khona lusizi lolukhulu eveni lonkhe, ngoba bebafakaze kutsi sicalekiso lesikhulu sitawuta kulelive, kanjalo nakubantfu, nekutsi kutawuba khona kubhujiswa lokukhulu emkhatsini wabo, lobekungakate kube khona nanini emhlabeni, futsi ematsambo abo abetawuba njengetindvundvuma temhlabatsi eveni ngaphandle kwekutsi baphendvuke ebubini babo.

7 Kodvwa abalilalelanga livi leNkhosi, ngenca yemacembu abo lamabi; ngaloko-ke kwacala kwaba khona timphi kanye nemibango eveni lonkhe, kanjalo nendlala, netifo letingumashayabhuce, kangangekutsi kwaba khona kubhujiswa lokukhulu, lobekungakate kwatiwa eveni; konkhe loku kwenteka ngetinsuku taShibilomu.

8 Bantfu bacala kuphendvuka ebubini babo; futsi njengoba benta njalo iNkhosi yaba nesihawu kubo.

9 Futsi kwenteka kutsi Shibilomu wabulawa, Sethi watfunjwa, wahlala ekutfunjweni tonkhe tinsuku takhe.

10 Futsi kwenteka kutsi Aha, indvodzana yakhe, yawutsatsa umbuso, yabusa etikwebantfu tinsuku tayo tonkhe. Yenta lonkhe luhlobo lwebubi etinsukwini tayo, lokwatsi ngako yadala kucitseka kwengati leningi; Futsi taba mbalwa tinsuku tayo.

11 Futsi Ethemu, awesitukulwane saAha, wawutsatsa umbuso; naye ngalokunjalo wenta loko lokwakukubi etinsukwini takhe.

12 Futsi kwenteka kutsi etinsukwini ta-Ethemu, kweta baphrofethi labaningi, baphindze baphrofetha kubantfu; yebo, baphrofetha kutsi iNkhosi yayitawubabhubhisa baphele nya emhlabeni ngaphandle kwekutsi baphendvuke ebubini babo.

13 Futsi kwenteka kutsi bantfu batenta lukhuni tinhlitiyo tabo, bangafuni kuwalalela emavi abo; baphrofethi balila baphindze bakhwesha emkhatsini wabo.

14 Futsi kwenteka kutsi Ethemu wehlulela ngebubi tonkhe tinsuku takhe, watala Moron. Futsi kwenteka kutsi Moron wabusa esikhundleni sakhe; Moron wenta loko bekukubi phambi kweNkhosi.

15 Futsi kwenteka kutsi kwacubuka kuvukelana emkhatsini webantfu, ngenca yalelo cembu leliyimfihlo lebelisungulwe kutsi kutfolakale emandla kanye nenzuzo; futsi kwavela indvodza lebeyinemandla ekwenteni bubi emkhatsini wabo, yalwa naMoron, lapho yaketula khona incenye yembuso; yayigcina leyo ncenye yembuso iminyaka leminingi.

16 Futsi kwenteka kutsi Moron wayiketula, waphindze wawutsatsa umbuso.

17 Futsi kwenteka kutsi kwavela lenye indvodza lebeyinemandla, lebeyiyesitukulwane semnakaboJarede.

18 Futsi kwenteka kutsi yamketula Moron yawutsatsa umbuso; ngako-ke, Moron wahlala ekutfunjweni tonkhe tinsuku takhe lebesetisele; watala Khoriyantho.

19 Futsi kwenteka kutsi Khoriyantho wahlala ekutfunjweni tonkhe tinsuku takhe.

20 Etinsukwini taKhoriyantho kweta baphrofethi labaningi, baphrofetha ngetintfo letinkhulu naletimangalisako, bashumayela kuphendvuka kubantfu, nekutsi ngaphandle kwekutsi baphendvuke iNkhosi Nkulunkulu yayitawukwehlisela kwehlulela ngalokumelene nabo bate babhujiswe nya.

21 Nekutsi iNkhosi Nkulunkulu yayitawutfumela noma iletse labanye bantfu kutsi balitsatse lelive, ngemandla ayo, ngaleyondlela leyaletsa ngayo boyise.

22 Futsi bawalahla onkhe emavi ebaphrofethi, ngenca yenhlangano yabo leyimfihlo kanye netinengiso tabo letimbi.

23 Futsi kwenteka kutsi Khoriyantho watala Etheri, wabese uyafa, ahleli ekutfunjweni tonkhe tinsuku takhe.