Sehluko 6
Tikebhe temaJarede tichutjwa ngumoya kuya eveni lesetsembiso—Bantfu badvumisa iNkhosi ngebuhle Bayo—Oriha uyabekwa kutsi abe yinkhosi yabo—Jarede nemnakabo bayafa.
1 Manje mine, Moroni, sengiyachubeka nekubhala umbhalo waJarede nemnakabo.
2 Ngoba kwenteka kutsi emvakwekutsi iNkhosi seyiwalungisile lawo matje umnakaboJarede abewatfwale waya nawo entsabeni, umnakaboJerede wehla aphuma entsabeni, wawabeka ematje kuleto tikebhe lebetilungisiwe, ngalinye ekugcineni kwaso ngasinye; buka, atikhanyisa tikebhe.
3 Ngaleyondlela iNkhosi yenta ematje kutsi akhanye ebumnyameni, kute anike kukhanya emadvodzeni, kubesifazane, kanye nasebantfwaneni, kute bangawaweli emanti lamaningi ebumnyameni.
4 Futsi kwenteka kutsi ngesikhatsi sebalungise lonkhe luhlobo lwekudla, kute baphile ngako emantini, kanjalo nekudla kwemihlambi wetimvu kanye nemhlambi wetinkhomo, kanye nanoma ngusiphi silwane noma inyoni lebebangayitfwala—kwenteka kutsi ngesikhatsi sebatentile tonkhe letintfo bangena emikhunjini noma etikebheni tabo, bahamba baya elwandle, betsembele eNkhosini Nkulunkulu wabo.
5 Futsi kwenteka kutsi iNkhosi Nkulunkulu yenta kutsi kube khona umoya lonemandla lowawuhhusha etikwemanti, loya ngaseveni lesetsembiso; ngaleyondlela baphonseka lena nalena emagagasini aselwandle ngaphambi kwemoya.
6 Futsi kwenteka kutsi tikhatsi letiningi bacwila ekujuleni kwelwandle, ngenca yetintsaba temagagasi lebetiwela kubo, kanjalo netivunguvungu letinkhulu naletimbi lebetibangwa ngumoya lomubi kakhulu.
7 Futsi kwenteka kutsi ngesikhatsi bacwile ekujuleni bekute emanti labekangabalimata, ngenca yekutsi tikebhe tabo beticine njengesitja, ngetulu kwaloko beticine njengemkhumbi waNowa; ngako-ke ngesikhatsi benganywe ngemanti lamaningi bakhala eNkosini, yaphindze yabaletsa ngetulu kwemanti.
8 Futsi kwenteka kutsi umoya awutange uyekele kuhhusha ubheke ngaseveni lesetsembiso ngesikhatsi basemantini; ngaleyondlela bachutjwa baya phambili ngaphambi kwemoya.
9 Futsi bahlabelela tingoma tekudvumisa eNkhosini; yebo, umnakaboJarede wahlabelela tingoma tekudvumisa eNkhosini, ayibonga aphindze ayidvumisa lusuku lonkhe; futsi ngesikhatsi kufika busuku, abayekelanga kudvumisa iNkhosi.
10 Ngaleyondlela bachutjwa baya phambili, futsi bekute nesilwane lesesabekako saselwandle lebesingabancuma, noma umkhoma lowawungabalimata; baba nekukhanya njalo-nje, akukhatsalekile kutsi bekukungetulu noma ngephansi kwemanti
11 Ngaleyondlela bachutjwa baya phambili, tinsuku letingemakhulu lamatsatfu nemashumi lamane nakune emantini.
12 Befika elugwini lwelive lesetsembiso. Futsi ngesikhatsi sebabeke tinyawo tabo elugwini lwelive lesetsembiso, bakhotsama eveni, batitfoba phambi kweNkhosi, bakhala tinyembeti tenjabulo phambi kweNkhosi, ngenca yebukhulu besihawu sayo lesimnene kubo.
13 Futsi kwenteka kutsi bahamba baya eveni, bacala kulima umhlabatsi.
14 Jarede bekanemadvodzana lamane, futsi abebitwa ngekutsi nguJakomu, naGiliga, naMaha kanye na-Oriha.
15 UmnakaboJarede naye watala emadvodzana kanye nemadvodzakati.
16 Nebangani baJarede kanye nemnakabo bebasibalo sebantfu labacishe babe ngemashumi lamabili nakubili; nabo ngalokunjalo batala emadvodzana kanye nemadvodzakati ngaphambi kwekutsi befike eveni lesetsembiso; ngako-ke bacala kutsi babe baningi.
17 Futsi bafundziswa kutsi bahambe ngekutitfoba phambi kweNkhosi; ngetulu kwaloku bebafundziswa lokusuka kuNkulunkulu.
18 Futsi kwenteka kutsi bacala kusabalala eveni, bandza baphindze balima umhlabatsi; bakhula baba nemandla eveni.
19 UmnakaboJarede wacala kuba mdzala, wabona kutsi besekufanele masinyane afe; ngaloko-ke watsi kuJarede: Asibutsele ndzawonye bantfu betfu kute sibabale, kute sati kutsi batawufisani kitsi ngaphambi kwekutsi sife.
20 Ngalokuhleliwe bantfu bagcogcelwa ndzawonye. Manje sibalo semadvodzana kanye nemadvodzakati emnakaboJarede bekubantfu labangemashumi lamabili nakubili; kani sibalo semadvodzana kanye nemadvodzakati aJarede bebalishumi nakubili, anemadvodzana lamane.
21 Futsi kwenteka kutsi bababala bantfu babo; emvakwekutsi sebababalile, bafisa kwati kubo kutsi ngutiphi tintfo labebafuna kutsi batente ngaphambi kwekutsi bafe.
22 Futsi kwenteka kutsi bantfu bacela kubo kutsi bagcobe munye wemadvodzana abo kutsi abe yinkhosi yabo.
23 Manje buka, loku kwabakhatsata. UmnakaboJarede watsi kubo: Ngempela lentfo iholela ekutfunjweni.
24 Kodvwa Jarede watsi kumnakabo: Bavumele kutsi babe nenkhosi. Ngako-ke watsi kubo: Khetsani-ke emkhatsini wemadvodzana etfu inkhosi, leyo leniyifunako.
25 Futsi kwenteka kutsi bakhetsa litibulo lemnakaboJarede; libito lakhe bekunguPhagagi. Futsi kwenteka kutsi wala futsi wangavumi kuba yinkhosi yabo. Bantfu bafuna kutsi uyise amphocelele, kodvwa uyise akafunanga; wabayala kutsi bangaphoceleli muntfu kutsi abe yinkhosi yabo.
26 Futsi kwenteka kutsi babakhetsa bonkhe bomnakaboPhagabi, kodvwa abavumanga.
27 Futsi kwenteka kutsi ngisho nemadvodazana aJarede akavumanga onkhe, ngaphandle kwayinye; Oriha lowagcotjwa kutsi abe yinkhosi yalabantfu.
28 Wacala kubusa, nebantfu bacala kuphumelela; banotsa kakhulu.
29 Futsi kwenteka kutsi Jarede wafa, kanjalo nemnakabo.
30 Futsi kwenteka kutsi Oriha wahamba ngekutitfoba phambi kweNkhosi, wakhumbula kutsi tatitinkhulu kangakanani tintfo iNkhosi lebeyitentele uyise, ngetulu kwaloko wabafundzisa bantfu bakhe kutsi tatitinkhulu kangakanani tintfo iNkhosi leyayitentele boyise.