Sehluko 4
Moroni uyaletwa kutsi ayivale ilondzeke imibhalo yemnakaboJarede—Angeke yembulwe bate bantfu babe nelukholo njengemnakaboJarede—Khristu uyaleta bantfu kutsi bawakholwe emavi akhe kanye nalawo ebafundzi Bakhe—Bantfu bayaletwa kutsi baphendvuke, bakholwe livangeli, futsi basindziswe.
1 INkhosi yayaleta umnakaboJarede kutsi ehlele entansi esuke entsabeni ebukhoneni beNkhosi, atibhale leto tintfo labekatibonile; futsi ayivumanga kutsi tiye kubantfwana bebantfu kute kube semvakwekutsi iphakanyiselwe etulu esiphambanweni; futsi ngalesi sizatfu iNkhosi Mosiya yatigcina, kute tingayi emhlabeni kute kube semvakwekutsi Khristu ativete kubantfu bakhe.
2 Emvakwekutsi Khristu sekativetile kubantfu bakhe wayaleta kutsi tembulwe.
3 Manje, emvakwaloko, bonkhe sebancishelwe lukholo; futsi sekute namunye ngaphandle kwemaLamani, balilahlile livangeli laKhristu; ngako-ke ngiyaletwe kutsi ngiphindze ngitifihle ngaphansi kwemhlaba.
4 Buka, ngibhale kulabongcwengcwe tona kanye leto tintfo umnakaboJarede latibona; futsi akukate nanini kube khona tintfo letinkhulu letake tembulwa kunaleto letembulwa kumnakaboJarede.
5 Ngaloko-ke iNkhosi ingiyalete kutsi ngitibhale; futsi ngitibhalile. Ingiyalete kutsi ngitivale tilondzeke; ngetulu kwaloko iyalete kutsi ngikuvale kulondzeke kuhunyushwa kwato; ngaloko-ke ngitivalile talondzeka tihumushi, njengekwemyaleto weNkhosi.
6 Ngoba iNkhosi yatsi kimi: Atiyukuya kubeTive kute kube lusuku lapho bayawuphendvuka ebubini babo, futsi bahlanteke ngaphambi kweNkhosi.
7 Ngalolo suku lapho bayawusebentisa lukholo kimi, kusho iNkhosi, ngisho nanjengoba umnakaboJarede enta, kute bangcweliswe kimi, emvakwaloko ngitawutembula kubo leto tintfo umnakaboJarede latibona, kangangoba ngiyokwembula tonkhe tembulo tami, kusho Jesu Khristu, iNdvodzana yaNkulunkulu, Babe wemazulu kanye nemhlaba, kanye nato tonkhe tintfo letikuwo.
8 Futsi loyo lotawuphikisana nelivi leNkhosi, akacalekiswe; naloyo loyawutiphika letintfo, akacalekiswe; ngoba kulabo angeke ngibakhombise tintfo letinkhulu, kusho Jesu Khristu; ngoba nginguye lokhulumako.
9 Ngekuyaleta kwami emazulu ayavuleka aphindze avaleke; ngelivi lami umhlaba uyawutamatama; futsi ngekuyaleta kwami bantfu balapho bayawukufa, kanjalo nangemlilo.
10 Futsi loyo longawakholwa emavi ami akabakholwa nebafundzi bami; nangabe akusimi lengikhulumako, hlulelani; ngoba niyawukwati kutsi ngimi lokhulumako, ngelusuku lwekugcina.
11 Kodvwa loyo lokholwa nguletintfo lengitikhulumile, ngiyawumvakashela ngetembulo taMoya wami, uyawukwati futsi afakaze. Ngoba ngenca yaMoya wami uyawukwati kutsi letintfo tiliciniso; ngoba tikholisa bantfu kutsi bente lokuhle.
12 Futsi noma ngabe yini lekholisa bantfu kutsi bente lokuhle ivela kimi; ngoba lokuhle akuveli kulomunye ngaphandle kwekutsi kuvele kimi. Nginguye kanye loyo loholela bantfu kubo bonkhe buhle; loyo longeke awakholwe emavi ami angeke angikholwe nami—kutsi nginguye; futsi loyo longeke angikholwe angeke amkholwe naBabe longitfumile. Ngoba buka, nginguBabe, ngikukhanya, nekuphila, kanye neliciniso lemhlaba.
13 Wotani kimi, Awu nine beTive, futsi ngitawunikhombisa tintfo letinkhulu, lwati lolufihlakele ngenca yekungakholwa.
14 Wotani kimi, Awu nine bendlu yaka-Israyeli, futsi kuyawukwembulwa kini kutsi tinkhulu kangakanani tintfo Babe lanibekele tona, kusukela ekusekelweni kwemhlaba; futsi atiketi kini, ngenca yekungakholwa.
15 Bukani, uma niyawusidzabula leso sihenco sekungakholwa lesenta kutsi nihlale nisesimeni senu sebubi lesesabekako, kanye nebulukhuni benhlitiyo, kanye nebumphumphutse bengcondvo, emvakwaloko tintfo letinkhulu kanye naletimangalisako lenafihlelwa tona kusukela ekusekelweni kwemhlaba—yebo, uma niyawubita Babe egameni lami, ngenhlitiyo ledzabukile nangemoya lowephukile, emvakwaloko niyawukwati kutsi Babe usikhumbulile sivumelwano lasenta kuboyihlo, Awu nine bendlu yaka-Israyeli.
16 Emvakwaloko tembulo tami lengente kutsi tibhalwe yinceku yami Johane tiyawukwembulwa emehlweni abo bonkhe bantfu. Khumbulani, ngesikhatsi senitibona letintfo, niyawubese niyati kutsi sikhatsi sesisondzele kutsi tembulwe ngetento lucobo.
17 Ngako-ke, ngesikhatsi seniwutfola lombhalo niyawubese niyati kutsi umsebenti waBabe sewucalile eveni lonkhe.
18 Ngako-ke, phendvukani nonkhe nine emikhawulweni yemhlaba, nite kimi, futsi nikholwe evangelini lami, niphindze nibhajatiswe egameni lami; ngoba loyo lokholwako aphindze abhajatiswe uyawusindziswa; kodvwa loyo longakholwa uyawulahlwa; futsi tibonakaliso tiyawubalandzela labo labakholwa egameni lami.
19 Ubusisiwe loyo lotfolakala etsembekile egameni lami ngelusuku lwekugcina, ngoba uyawuphakanyiswa kute ahlale embusweni lolungiselelwe yena kusukela ekusekelweni kwemhlaba. Bukani ngimi lokukhulumile loku. Amen.