1 Futsi kwenteka kutsi watala Omeri, Omeri wabusa esikhundleni sakhe. Omeri watala Jarede; Jarede watala emadvodzana kanye nemadvodzakati.

2 Jarede wavukela uyise, weta watawuhlala eveni laHethi. Futsi kwenteka kutsi wakhohlisa bantfu labaningi, ngenca yemavi akhe lanebucili, wate watfola incenye yembuso.

3 Ngesikhatsi asatfole incenye yembuso walwa neyise, watsatsa uyise wamyisa ekutfunjweni, futsi wamenta kutsi asebente ekutfunjweni;

4 Manje, ngetinsuku tekubusa kwaOmeri bekasekutfunjweni incenye yetinsuku takhe. Futsi kwenteka kutsi watala emadvodzana kanye nemadvodzakati, emkhatsini wabo bekukhona Esromu kanye naKhoriyanthuma;

5 Futsi batfukutsela kakhulu ngenca yetento taJarede umnakabo, kangangekutsi bahlanganisa libutfo bayawukulwa naJarede. Futsi kwenteka kutsi balwa naye ebusuku.

6 Futsi kwenteka kutsi ngesikhatsi sebalibulele libutfo laJarede besebatawumbulala naye futsi; wabancenga kutsi bangambulali, nekutsi bekatawunikela umbuso kuyise. Futsi kwenteka kutsi bamvumela waphila.

7 Manje Jarede waba nelusizi lolukhulu ngenca yekulahlekelwa ngumbuso, ngoba inhlitiyo yakhe bekayibeke kuwo umbuso kanye nakulo ludvumo lwemhlaba.

8 Manje indvodzakati yaJarede beyihlakaniphe kakhulu, futsi ibona buhlungu beyise, yacabanga kwenta lisu lebeyitawubuyisela ngalo umbuso kuyise.

9 Manje indvodzakati yaJarede beyiyinhle kakhulu. Futsi kwenteka kutsi yakhuluma neyise, yatsi kuye: Kungani babe anelusizi kangaka? Akate yini awufundze umbhalo bobabe betfu labawuletsa ngesheya kwelwandle na? Buka, kute yini umlandvo mayelana nalabo basendvulo, kutsi ngemasu abo layimfihlo batfola imibuso kanye neludvumo lolukhulu na?

10 Manje, ngako-ke babe akatfumele kulandvwe Akhishi, indvodzana yaKiminori; buka, ngimuhle, ngitawugidza embikwakhe, ngitawumtfokotisa, kute afune kutsi ngibe ngumkakhe; ngaloko-ke uma ayawufuna kutsi umnike mine kutsi ngibe ngumkakhe, emvakwaloko uyawubese utsi: Ngitawukunika yena uma nje utawuletsa kimi inhloko yababe, inkhosi.

11 Manje Omeri bekangumngani wa-Akhishi; ngaloko-ke, ngesikhatsi Jarede atfumele kutsi kulandvwe Akhishi, indvodzakati yaJarede yagidza ngaphambi kwakhe kute imtfokotise, kangangekutsi wafuna kutsi ibe ngumkakhe. Futsi kwenteka kutsi watsi kuJarede: Nginike yena kutsi abe ngumkami.

12 Jarede watsi kuye: Ngitawukunika yena, uma-nje utawuletsa kimi inhloko yababe, inkhosi.

13 Futsi kwenteka kutsi Akhishi wagcogcela endlini yaJarede tonkhe tihlobo takhe, watsi kuto: Niyafunga yini kutsi nitawutsembeka kimi kulentfo lengitawuyicela kini na?

14 Futsi kwenteka kutsi bonkhe bafunga kuye, ngaNkulunkulu wasezulwini, nangemazulu, kanjalo nangemhlaba, kanye nangetinhloko tabo, kutsi loyo lobekayawukwenta lokuhlukile kunalolo sito Akhishi abelufuna uyawulahlekelwa yinhloko yakhe; futsi loyo loyawuveta imfihlo yanoma ngabe yini Akhishi abeyembule kubo, loyo uyawulahlekelwa yimphilo yakhe.

15 Futsi kwenteka kutsi bavumelana na-Akhishi. Akhishi wabafungisa ngetifungo lebetinikwe ngulabo basendvulo nabo labebafuna emandla, lebetindluliswe tehla tisuka ngisho kuKhayini, lobekangumbulali kusukela ekucaleni.

16 Futsi betigcinwe ngemandla adeveli kute tifungiswe bantfu, kubagcina basebumnyameni, kusita labo labafuna emandla kute bazuze emandla, nekutsi babulale, baphange, bacambe emanga, baphindze bente tonkhe tinhlobo tebubi kanye nebugwadla.

17 Futsi bekuyindvodzana yaJarede leyakufaka enhlitiyweni yakhe kutsi aticwaninge letintfo takadzeni; Jarede wakufaka enhlitiyweni ya-Akhishi; ngaloko-ke, Akhishi wafungisa tihlobo kanye nebangani bakhe, abakhohlisa ngetetsembiso letinhle kutsi bente noma ngayini abeyifuna.

18 Futsi kwenteka kutsi basungula licembu leliyimfihlo, njengalabo basendvulo; lelo cembu lelinengeke kakhulu nalelinebubi ngetulu kwako konkhe, emehlweni aNkulunkulu.

19 Ngoba iNkhosi ayisebenti ngemacembu layimfihlo, futsi ayikate iyalete umuntfu kutsi acitse ingati, kodvwa kuto tonkhe tintfo ikwalele loko, kusukela ekucaleni kwemuntfu.

20 Manje mine, Moroni, angibhali ngetinhlobo tetifungo kanye nemacembu abo, ngoba kwembuliwe kimi kutsi kukhona emkhatsini webantfu bonkhe, futsi kukhona nasemkhatsini wemaLamani.

21 Futsi kudale kubhujiswa kwalabantfu lengikhuluma ngabo manje, kanjalo nekubhujiswa kwebantfu baNefi.

22 Futsi noma ngusiphi sive lesiyawusekela emacembu lanjena layimfihlo, kute sitfole emandla kanye nenzuzo, ate asabalale esiveni, buka, siyawubhujiswa; ngoba iNkhosi angeke ivume kutsi ingati yalabangcwele bayo, leyiyawucitfwa ngubo, ikhale kuyo isuka phansi ikhalela kutiphindziselela kubo kodvwa yona ingabaphindziseleli.

23 Ngaloko-ke, awu nine beTive, kukuhlakanipha kuNkulunkulu kutsi letintfo tivetwe kini, kute ngato niphendvuke etonweni tenu, futsi ningavumi kutsi lamacembu ebabulali anincobe, lakhelwe kutsi atfole emandla kanye nenzuzo—nekutsi umsebenti, yebo, ngisho nemsebenti wekubhubhisa ute kini, yebo, nenkemba yekwehlulela ngekulunga kwaNkulunkulu loPhakadze iwele kini, kute niwe niphindze nibhujiswe uma niyawuvumela letintfo kutsi tenteke.

24 Ngaloko-ke, iNkhosi iyaniyaleta kutsi, ngesikhatsi senitibona letintfo tita emkhatsini wenu nati ngesimo lesibi senu, ngenca yalelicembu leliyimfihlo leliyawuba emkhatsini wenu; noma maye kulo, ngenca yengati yalabo lababulewe; ngoba bakhala baselutfulini bakhalela kutiphindziselela kulo, kanjalo nakulabo labalisungula.

25 Ngoba kuyenteka kutsi loyo lolisungulako usuke afuna kucedza inkhululeko yemhlaba wonkhe, tive kanye nemave; futsi lifeza kubhujiswa kwebantfu bonkhe, ngoba lisungulwe ngudeveli, longubabe wawo onkhe emanga; ngisho loyo mcambimanga lowakhohlisa batali betfu bekucala, yebo, yena kanye loyo mcambimanga lowenta umuntfu kutsi abulale kusukela ekucaleni; lowente tinhlitiyo tebantfu taba lukhuni kutsi babulale baphrofethi, babagcobe ngematje, baphindze babacoshe kusukela ekucaleni.

26 Ngaloko-ke, mine, Moroni, ngiyaletwe kutsi ngitibhale letintfo kute bubi buyekelwe, nekutsi sikhatsi sifike sekutsi Sathane angabe asaba nemandla etinhlitiyweni tebantfwana bebantfu, kodvwa kute bakholiswe kutsi bente lokuhle njalo-nje, kute bete emtfonjeni wekulunga konkhe baphindze basindziswe.