INcwadzi yaJakobe
Umnakabo Nefi

1 Ngoba buka, kwenteka kutsi kwase kwendlule iminyaka lengemashumi lasihlanu nesihlanu kusukela ngesikhatsi Lehi ashiya eJerusalema; ngaloko-ke, Nefi wanika mine, Jakobe, umyaleto mayelana nabongcwengcwe labancane, lapho leti tintfo ticoshwe khona.

2 Futsi wanginika mine, Jakobe, umyaleto wekutsi kufanele ngibhale kubo laba bongcwengcwe tintfo letimbalwa lebengicabanga kutsi tiligugu lelikhulu; nekutsi kufanele ngingatsintsi, ngaphandle kwekutsi kube kukancane nje, mayelana nemlandvo walaba bantfu lababitwa ngekutsi bantfu baNefi.

3 Ngoba watsi umlandvo webantfu bakhe kufanele ucoshwe kulabanye bongcwengcwe bakhe, nekutsi kufanele ngibalondvolote laba bongcwengcwe futsi ngibendlulise behlele entalelwaneni yami, titukulwane ngetitukulwane.

4 Futsi uma kukhona inshumayelo lengcwele, noma sembulo lesikhulu, noma siphrofetho, kufanele ngicophe tihloko taloko kubo labongcwengcwe, futsi ngibhale ngako kakhulu, ngenca yaKhristu, futsi nangenca yebantfu betfu.

5 Ngoba ngenca yelukholo kanye nangalokukhulu kukhatsateka, ngempela kwembulwa kitsi mayelana nebanftu betfu, kutsi ngutiphi tintfo letatitokwenteka kubo.

6 Futsi ngetulu kwaloko saba netembulo letiningi, kanye namoya wekuphrofetha lokukhulu; ngaloko-ke, sati ngaKhristu kanye nangembuso wakhe, lowawutofika.

7 Ngaloko-ke sasebenta ngekukhutsala emkhatsini webantfu betfu, kute sibabonise kutsi bete kuKhristu, nekutsi bahlanganyele ebuhleni baNkulunkulu, kute bangene ekuphumuleni kwakhe, hleze ngandlela tsite ate afunge asentfukutselweni yakhe kutsi bangangeni kuyo, njengoba achukulutwa ngetinsuku tekulingwa ngesikhatsi bantfwana baka-Israyeli basehlane.

8 Ngaloko-ke, siyacela kuNkulunkulu kutsi sikwati kubabonisa bonkhe bantfu kutsi bangahlubuki kuNkulunkulu, bamchukulute ate atfukutsele, kodvwa kutsi bonkhe bantfu bakholwe kuKhristu, futsi bakubone kufa kwakhe, basivume siphambano sakhe baphindze babeketelele kuhlazwa ngumhlaba; ngaloko-ke, mine, Jakobe, ngikwenta kube ngumtfwalo wami kutsi ngiwugcwalise umyaleto wemnaketfu Nefi.

9 Manje Nefi wacala kuba mdzala, futsi wabona kutsi masinyane bese atokufa; ngaloko-ke, wagcoba indvodza kutsi ibe yinkhosi kanye nembusi ngetulu kwebanftu bakhe, njengekubusa kwemakhosi.

10 Bantfu sebamtsandzile Nefi ngalokwendlulele, yena angumvikeli wabo lomkhulu, ayisebentisile inkemba yaLabani ekubavikeleni, futsi ayisebentele inhlalakahle yabo ngato tonkhe tinsuku takhe—

11 Ngaloko-ke, bantfu baba nesifiso sekuligcina libito lakhe njengesikhumbuto. Futsi labo labebatobusa esikhundleni sakhe babitwa bantfu, ngaNefi wesibili, Nefi wesitsatfu, njalonjalo, ngekwemibuso yemakhosi; futsi babitwa kanjalo bantfu, noma ngabe emabito abo bekabobani.

12 Futsi kwenteka kutsi Nefi wafa.

13 Manje bantfu labebangasiwo emaLamani bebangemaNefi; noko, bebabitwa ngemaNefi, emaJakobe, emaJosefa, emaZoramu, emaLamani, emaLemuweli, kanye nema-Ishmayeli.

14 Kodvwa mine, Jakobe, emvakwaloku angiyubahlukanisa ngalamabito, kodvwa ngiyawubabita ngemaLamani labo labafuna kubhubhisa bantfu baNefi, futsi labo labanebungani naNefi ngiyawubabita ngemaNefi, noma bantfu baNefi, ngekubusa kwemakhosi.

15 Manje kwenteka kutsi bantfu baNefi, ngaphansi kwekubusa kweNkhosi yesibili, bacala batenta taba lukhuni tinhlitiyo tabo, futsi batimbandzakanya ngandlela tsite ekwenteni tento tebubi, letinjengaleto taDavide wasendvulo tekufisa bafati labaningi kanye netingani, futsi ngalokunjalo naSolomoni, indvodzana yakhe.

16 Yebo, futsi ngetulu kwaloko bacala kufuna ligolide kanye nesiliva leliningi, futsi bacala kutsi ngandlelatsite baphakama ngenca yekutigcabha.

17 Ngaloko-ke mine, Jakobe, ngabanika lamavi ngesikhatsi ngibafundzisa ethempelini, sengitfole kucala kutfunywa kwami eNkhosini.

18 Ngoba mine, Jakobe, kanye nemnaketfu Josefa sasibekwe saba baphristi nebafundzisi balaba bantfu, ngesandla saNefi.

19 Futsi sawudvumisa umsebenti wetfu eNkhosini, sakwenta umtfwalo wetfu, siphendvule tono talaba bantfu etikwetinhloko tetfu lucobo uma singabafundzisanga livi laNkulunkulu ngekukhutsala konkhe; ngaloko-ke, ngekusebenta ngemandla etfu ingati yabo ngeke ite ngetulu kwetembatfo tetfu; ngaphandle kwaloko ingati yabo iyawuba etikwetembatfo tetfu, futsi asiyukutfolakala singenacashati ngelusuku lwekugcina.