Sehluko 5
Jakobe ucaphuna Zenoshe macondzana nemfanekiso ngetihlahla temcumo letitsanjisiwe kanye netasendle—Tifananiswa nebaka-Israyeli kanye nebeTive—Kuhlakateka kanye nekugcogcwa kwa-Israyeli kuyaboniswa—EmaNefi nemaLamani kanye nayo yonkhe indlu yaka-Israyeli bayaphatfwa—BeTive batawuchunyelelwa ku-Israyeli—Ekugcineni sivini sitawushiswa. Cishe ngemnyaka wa 544 kuya kuwa 421 ngaphambi kwekutalwa kwaKhristu.
1 Bukani, bomnaketfu, anikhumbuli yini nifundza emavi emphrofethi Zenoshe, lawakhuluma kuyo indlu yaka-Israyeli, atsi:
2 Lalelani, Awu nine yindlu yaka-Israyeli, futsi vanini emavi ami, umphrofethi weNkhosi.
3 Ngoba bukani, naku lokushiwo yiNkhosi, ngitawunifanisa, Awu yindlu yaka-Israyeli, nesihlahla semncumo lesitsanjisiwe, umuntfu lasitsatsa wasondla esivinini sakhe; sakhula, saba sidzala, sacala kubola.
4 Futsi kwenteka kutsi inkhosi yesivini yahamba, yabona kutsi sihlahla sayo semcumo sasesicala kubola; yatsi: Ngitawusitsena, ngivukutele emaceleni aso, ngiphindze ngisondle, kute mhlawumbe sihlume emacembe lamancane kanye nalatsambile, futsi singafi.
5 Futsi kwenteka kutsi yasitsena, yavukuta emaceleni aso, futsi yasondla njengekwelivi layo.
6 Futsi kwenteka kutsi emvakwetinsuku letiningi sacala kancane kukhipha lambalwa, nalamancane futsi nalatsambile emagala; kodvwa buka, sicu lesisetulu saso sacala kufa.
7 Futsi kwenteka kutsi inkhosi yesivini yakubona loku, futsi yatsi encekwini yayo: Kuyangidzabukisa kutsi ngitolahlekelwa ngulesi sihlahla; ngaloko-ke hamba uyokha emagala esihlahla semncumo sasendle, uwaletse lapha kimi; futsi sitawukha lawo magala lamakhulu lasacala kubuna, sitawuwaphonsa emlilweni kute ashiswe.
8 Buka, kusho iNkhosi yesivini, ngiyawasusa emagala lamaningi alawa lamancane nalatsambile, futsi ngitawachumelela noma ngabe ngukuphi lapho ngitsandza khona; futsi akukabaluleki noma ngabe kusho kutsi imphandze yalesi sihlahla itawufa, ngingatigcinela sitselo saso kimi; ngaloko-ke ngitawutsatsa lawa lamancane nalatsambile emagala, ngitawachumelela noma ngabe kukuphi lapho ngitsandza khona.
9 Tsatsa lamagala esihlahla semncumo sasendle, uwachumelele, endzaweni yawo; lawa lengiwakhile ngitawaphonsa emlilweni ngiwashise, kute angoni umhlabatsi wesivini sami.
10 Futsi kwenteka kutsi inceku yeNkhosi yesivini yenta njengekwelivi leNkhosi yesivini, yachumelela emagala esihlahla semncumo sasendle.
11 Futsi iNkhosi yesivini yenta kutsi sivukutelwe, sitsenwe, futsi sondliwe, itsi encekwini yayo: Kuyangidzabukisa kutsi kufanele ngilahlekelwe ngulesi sihlahla; ngaloko-ke, kute mhlawumbe ngigcine timphandze taso kute tingafi, kute ngitigcinele tona, ngiyentile lentfo.
12 Ngaloko-ke, hamba ngeyakho indlela; usigadze lesihlahla, usondle, njengekwemavi ami.
13 Futsi lawa ngitawabeka encenyeni lengaphansi yesivini sami, noma ngabe ngukuphi lapho ngitsandza khona, akukabaluleki kuwe; futsi ngikwenta loku kute ngitigcinele emagala emvelo esihlahla; ngetulu kwaloko, kute ngitibekele sitselo saso kulungiselela sikhatsi; ngoba kuyangidzabukisa kutsi kufanele ngilahlekelwe ngulesihlahla kanye nesitselo saso.
14 Futsi kwenteka kutsi iNkhosi yesivini yahamba, yawafihla emagala emvelo esihlahla semncumo lesasitsanjisiwe etincenyeni letingaphansi tesivini, lamanye kulenye incenye nalamanye kulenye, njengekutsandza kanye nekufisa kwayo.
15 Futsi kwenteka kutsi sikhatsi lesidze sendlula, iNkhosi yesivini yatsi encekwini yayo: Wota, asihambe sehlele kuso sivini, kute sisebente esivinini.
16 Futsi kwenteka kutsi iNkhosi yesivini, ngalokunjalo nenceku, bahamba behlela kuso sivini kuyosebenta. Futsi kwenteka kutsi inceku yatsi enkhosini yayo: Buka, buka lapha; buka sihlahla.
17 Futsi kwenteka kutsi iNkhosi yesivini yabuka yabona sihlahla leso emagala emncumo wasendle labekachunyelelwe kuso; futsi bekasamilile sekacala kukhipha sitselo. Yabona kutsi sasisihle; nesitselo saso sasinjengaso sitselo semvelo.
18 Futsi yatsi encekwini: Buka, emagala esihlahla sasendle asabambe umswakama wemphandze yaso, kangangoba imphandze yaso iletsa emandla lamakhulu; futsi ngenca yemandla lamakhulu emphandze yaso emagala asendle akhipha sitselo lesitsanjisiwe, Manje, kube besingawachumelelanga lamagala, lesi sihlahla besiyokufa, Manje, buka, ngiyawutibekela titselo letiningi, sihlahla lesitikhiphile; futsi netitselo taso ngiyawutibekela lesinye sikhatsi.
19 Futsi kwenteka kutsi iNkhosi yesivini yatsi encekwini: Wota, asihambe siye encenyeni lengephansi yesivini, sibuke kutsi emagala emvelo esihlahla akatikhiphi yini wona titselo letiningi, kute ngitibekele titselo taso kulungiselela sikhatsi.
20 Futsi kwenteka kutsi bahamba baya lapho inkhosi yayifihle khona emagala emvelo esihlahla, yatsi encekwini: Buka lawa; yabona lekucala kutsi lase likhipha titselo letiningi; ngetulu kwaloko yabona kutsi tatitinhle. Futsi yatsi encekwini: Tsatsa titselo taso, utibekele kulungiselela sikhatsi, kute ngitigcinele tona; ngoba buka, kusho yona, kuso sonkhe lesi sikhatsi lesidze kangaka ngisondlile, futsi sikhiphe titselo letiningi.
21 Futsi kwenteka kutsi inceku yatsi enkhosini yayo: Uteleni lapha kutotjala lesi sihlahla, noma leligala lalesi sihlahla na? Ngoba buka, bekulibala lelingakavundzi kakhulu kuyo yonkhe lendzawo yesivini sakho.
22 INkhosi yesivini yatsi kuyo: Ungangeluleki; ngangati kutsi kwakulibala lelingakavundzi lemhlabatsi; ngaloko-ke, ngatsi kuwe, ngilondlile ngaso sonkhe lesi sikhatsi lesidze, futsi ubonile kutsi likhiphe titselo letiningi.
23 Futsi kwenteka kutsi iNkhosi yesivini yatsi encekwini yayo: Buka lapha; buka ngihlanyele lelinye ligala lesihlahla futsi; futsi uyati kutsi lelibala lemhlabatsi lalingakavundzi kakhulu kunalelakucala. Kodvwa, buka sihlahla. Ngisondlile ngaso sonkhe lesi sikhatsi lesidze, futsi sikhiphe titselo letiningi; ngaloko-ke, tigcogce, utibekele kulungiselela sikhatsi, kute ngitigcinele tona.
24 Futsi kwenteka kutsi iNkhosi yesivini yaphindza yatsi encekwini yayo: Buka lapha, ubone lelinye ligala futsi, lengilihlanyele; buka kutsi ngilondlile nalo futsi, likhiphe titselo.
25 Yatsi encekwini: Buka lapha futsi ubone lekugcina. Buka, leli ngalihlanyela ebaleni lemhlabatsi lomuhle; futsi ngilondlile ngalesi sikhatsi lesidze, futsi yincenye kuphela yesihlahla lekhiphe titselo letitsanjisiwe, futsi lenye incenye yesihlahla ikhiphe titselo tasendle; buka, ngisondlile lesi sihlahla njengaletinye.
26 Futsi kwenteka kutsi iNkhosi yesivini yatsi encekwini: Khani lawo magala langakakhiphi titselo letinhle, uwaphonse emlilweni.
27 Kodvwa buka, inceku yatsi kuyo: Asisitsene, sisivukutele emaceleni, futsi sisondle sikhashana lesidzanyana nje kute mhlawumbe sikukhiphele titselo letinhle, kute utibekele sona kulungiselela sikhatsi.
28 Futsi kwenteka kutsi iNkhosi yesivini kanye nenceku yeNkhosi yesivini batondla tonkhe titselo tesivini.
29 Futsi kwenteka kutsi sikhatsi lesidze sasesendlulile, iNkhosi yesivini yatsi encekwini yayo: Wota, asihambe sehlele kuso sivini, kute siphindze sisebente esivinini. Ngoba buka, sikhatsi siyasondzela, nesiphetfo siyeta masinyane; ngaloko-ke, kufanele ngitibekele titselo kulungiselela sikhatsi.
30 Futsi kwenteka kutsi iNkhosi yesivini kanye nenceku bahamba behlela kuso sivini; bafika esihlahleni leso emagala aso emvelo bekaphuliwe, futsi emagala asendle bekachunyeleliswe kuso; buka tinhlobo tetitselo tatisitfwalise kakhulu sihlahla.
31 Futsi kwenteka kutsi iNkhosi yesivini yasinambitsa sitselo, tonkhe tinhlobo njengekwesibalo sato. INkhosi yesivini yatsi: Buka, ngalesi sikhatsi lesidze sisondlile lesi sihlahla, futsi ngitibekele kulungiselela sikhatsi titselo letiningi.
32 Kodvwa buka, ngalesi sikhatsi sesikhiphe titselo letiningi, futsi kute nasinye sato lesihle. Buka, kukhona tonkhe tinhlobo tetitselo letimbi; futsi atingisiti ngalutfo, nanoma kungekusebenta kwetfu; manje kuyangidzabukisa kutsi ngitolahlekelwa ngulesi sihlahla.
33 INkhosi yesivini yatsi encekwini: Singentani kulesihlahla, kute ngitigcinele futsi titselo letinhle taso na?
34 Inceku yatsi enkhosini yayo: Buka, ngoba uchumelelise emagala esihlahla semncumo sasendle atondlile timphandze, kangangoba tiphilile futsi atikafi; ngaloko-ke uyabona kutsi tisetinhle.
35 Futsi kwenteka kutsi iNkhosi yesivini yatsi encekwini yayo: Sihlahla asingisiti ngalutfo, kanye netimphandze taso atingisiti ngalutfo uma nje sisakhipha titselo letimbi.
36 Noko, ngiyati kutsi timphandze tinhle, futsi ngekwenhloso yami ngitigcinile; futsi ngenca yemandla ato lamakhulu kute kube kumanje tikhiphile, emagaleni asendle, titselo letinhle.
37 Kodwa buka, emagala asendle akhulile futsi andlula timphandze taso; ngenca yekutsi emagala asendle andlule timphandze taso akhiphe titselo letiningi letimbi; ngenca yekutsi akhiphe titselo letiningi kakhulu letimbi ubonile kutsi acala kufa; futsi masinyane atawube asalungele, kutsi aphonswe emlilweni, ngaphandle kwekutsi siwentele lokutsite kute siwagcine.
38 Futsi kwenteka kutsi iNkhosi yesivini yatsi encekwini yayo: Asihambe sehlele etincenyeni letingephansi tesivini, sibuke kutsi ngabe emagala emvelo nawo akhiphe titselo letimbi yini.
39 Futsi kwenteka kutsi bahamba behlela etincenyeni letingephansi tesivini. Futsi kwenteka kutsi babona kutsi titselo temagala emvelo nato bese tonakele; yebo, tekucala kanye netesibili ngalokunjalo netekugcina; tonkhe bese tonakele.
40 Futsi titselo tasendle tekugcina tase tindlule leyo ncenye yesihlahla leyayikhiphe titselo letinhle, kangangekutsi ligala lase libunile futsi selifile.
41 Futsi kwenteka kutsi iNkhosi yesivini yakhala, yatsi encekwini: Ngabe bekufanele kutsi ngenteni lokunye esivinini sami na?
42 Buka, bengati kutsi tonkhe titselo tesivini, ngaphandle kwaleti, bese tonakele. Manje nato leti letake takhipha titselo letinhle setonakele; manje tonkhe tihlahla tesivini sami atisiti ngalutfo ngaphandle nje kwekutsi tijutjwe bese tiphonswa emlilweni.
43 Buka lesi sekugcina, emagala aso lasabunile, ngasitjala ebaleni lelihle lemhlabatsi; yebo, lelo lelalikhetsekile kimi ngetulu kwato tonkhe letinye tincenye telive lesivini sami.
44 Ubonile kutsi ngetulu kwaloko ngisigawulile leso lesone lelibala lemhlabatsi, kute ngitjale lesi sihlahla endzaweni yaso.
45 Ubonile kutsi incenye yaso yakhipha titselo letinhle, kanye nencenye yaso yakhipha titselo tasendle; futsi ngenca yekutsi angiwakhanga emagala aso ngawaphonsa emlilweni, buka, asendlule ligala lelihle kangangekutsi selite labuna.
46 Manje, buka, nanoma konkhe kunakekela sikwentile esivinini sami, tihlahla taso tibe nekonakala, kangangekutsi atikhiphanga titselo letinhle; futsi leti benginelitsemba lekutigcina, nekutsi ngitibekele titselo taso kulungiselela sikhatsi. Kodvwa, buka, tibe njengesihlahla semncumo sasendle, futsi atinanzuzo kodvwa kujutjwa tiphonswe emlilweni; futsi kuyangidzabukisa kutsi ngitolahlekelwa ngito.
47 Kodvwa ngabe bengingentani lokunye esivinini sami na? Ngabe ngisitsambisile yini sandla sami, kutsi ngisondle na? Cha, ngisondlile, ngasivukuteka emaceleni aso, futsi ngisitsenile, ngasifaka umcuba; ngiselulile sandla sami futsi cishe bonkhe budze belilanga, siphetfo siyasondzela edvute. Futsi kuyangidzabukisa kutsi kufanele ngitijube tonkhe tihlahla tesivini sami, ngitiphonse emlilweni kute tishiswe. Ngabe ngubani lona lowone sivini sami na?
48 Futsi kwenteka kutsi inceku yatsi enkhosini yayo: Ngabe akusiko yini kukhula kakhulu kwesivini sakho na—ngabe emagala aso akandlulanga yini timphandze letinhle na? Futsi ngenca yekutsi emagala andlule timphandze taso, buka akhula ngekushesha kunemandla etimphandze, atitfolela emandla. Buka, ngitsi, ngabe loku akusiso yini sizatfu lesente sihlahla sesivini sakho sibe nekonakala na?
49 Futsi kwenteka kutsi iNkhosi yesivini yatsi encekwini: Asihambe futsi siyotijuba tihlahla tesivini sitiphonse emlilweni, kute tingawoni umhlabatsi wesivini sami, ngoba sengikwente konkhe. Ngabe yini lenye lebengingayentela sivini sami na?
50 Kodvwa, buka, inceku yatsi eNkhosini yesivini: Tibonelele sikhashana lesidzanyana.
51 Futsi iNkhosi yatsi: Yebo, ngitawutibonelela sikhashana lesidzanyana, ngoba kuyangidzabukisa kutsi ngilahlekelwe tihlahla tesivini sami.
52 Ngaloko-ke asitsatse lamanye alamagala lengiwahlanyele etincenyeni letingaphansi tesivini sami, siwachumelelise esihlahleni lapho aphume khona; sikhiphe kuso sihlahla lawo magala titselo tawo letibaba kakhulu, futsi sichumelelise emagala emvelo esihlahla esikhundleni sawo.
53 Futsi loku ngitawukwenta kute sihlahla singafi, kute, mhlawumbe, ngitigcinele timphandze taso ngenhloso yami.
54 Futsi, buka, timphandze temagala emvelo esihlahla lengisihlanyele lapho ngitsandza khona tisaphila; ngaloko-ke, kute nato ngitigcinele inhloso yami, ngitawutsatsa lamanye emagala alesi sihlahla, ngiwachumelelise kuto. Yebo, ngitawuchumelelisa kuto emagala enina wesihlahla sawo, kute ngitigcinele timphandze futsi, kute kutsi uma seticine ngalokwanele mhlawumbe tingangikhiphela titselo letinhle, futsi kumbe ngisengaba nentfokoto esivinini sami.
55 Futsi kwenteka kutsi batsatsa kuso sihlahla semvelo lebesesifana nesasendle, bachumelelisa kuto tihlahla temvelo, nato futsi lebesetifana netasendle.
56 Ngetulu kwaloko batsatsa lamanye etihlahla temvelo letatifana netasendle, bawachumelelisa kunina wesihlahla sawo.
57 Futsi iNkhosi yesivini yatsi encekwini: Ungawakhi emagala asendle etihlahleni, ngaphandle kwalawo lababa kakhulu; futsi kuwo uyawuwachumelelisa ngekwaloko lengikushito.
58 Futsi sitawuphindze sitondle tihlahla tesivini, sitawuwatsena emagala ato; futsi sitawukukha etihlahleni emagala langatseli, lesekufanele afe, siwaphonse emlilweni.
59 Futsi loku ngikwenta kute, mhlawumbe timphandze titfole emandla ngenca yekucina kwato; futsi nangenca yekushintjwa kwemagala kute lokuhle kuncobe lokubi.
60 Futsi ngenca yekutsi ngiwagcinile emagala emvelo kanye netimphandze tawo, nekutsi ngichumelelise emagala emvelo futsi kunina wesihlahla, ngagcina timphandze tenina wesihlahla, kute, mhlawumbe, tihlahla tesivini sami tikhiphe futsi titselo letinhle; kute ngibe nekujabula futsi etitselweni tesivini sami, futsi, mhlawumbe, kute ngitfokote kakhulu kutsi ngitigcinile timphandze kanye nemagala esitselo sekucala—
61 Ngaloko-ke, hamba, futsi ubite tinceku, kute sisebente ngekukhutsala ngemandla etfu esivinini, kute silungise indlela, kute ngiphindze ngikhiphe sitselo semvelo, leso sitselo semvelo lesihle futsi lesiligugu lelikhulu ngetulu kwato tonkhe letinye titselo.
62 Ngaloko-ke, asihambe siyosebenta ngemandla etfu kulesikhatsi sekugcina, ngoba buka siphetfo siyasondzela madvute futsi loku kungekwekugcina kutsi ngitsene sivini sami.
63 Chumelelisa emagala; cala ekugcineni kute abe ngewekucala, nekutsi ekucala abe ngewekugcina, utivukutele emaceleni tihlahla, letindzala kanye naletincane, tekucala kanye netekugcina; tekugcina netekucala, kute tonkhe tondliwe futsi kwekugcina.
64 Ngaloko-ke, tivukutele emaceleni, utitsene, utifake umcuba futsi, kwekugcina, ngoba siphetfo siyasondzela madvute. Futsi uma kusho kutsi lamahlumela ekugcina ayakhula, akhipha sitselo semvelo, uma kunjalo uyawuyilungiselela indlela, kute akhule.
65 Futsi ngesikhatsi asacala kukhula uyawususa lawo magala lakhipha sitselo lesibabako, njengekwemandla emagala lamahle kanye nebukhulu bawo; futsi awuyukutisusa tihlahla letimbi tonkhe kanyekanye, hleze timphandze taso tibe nemandla lamakhulu kunelihlumela, bese kutsi lihlumela lato life, bese ngilahlekelwa tihlahla tesivini sami.
66 Ngoba kuyangidzabukisa kutsi ngilahlekelwe tihlahla tesivini sami; ngaloko-ke uyawuwasusa lamabi kangangoba lamahle akhula, kute imphandze kanye nesihloko kulingane ngekwemandla, kute kutsi lokuhle kuncobe lokubi, bese kutsi lokubi kujutjwe kuphonswe emlilweni, kute kungawoni umhlabatsi wesivini sami; futsi ngitawushanyela kanjalo-ke lokubi kuphume esivinini sami.
67 Emagala esihlahla semvelo ngitawuphindze ngiwachumelele esihlahleni semvelo;
68 Futsi emagala esihlahla semvelo ngitowachumelela kuwo emagala emvelo esihlahla; futsi ngaleyondlela ngitawuphindze ngiwahlanganise ndzawonye, kute akhiphe sitselo semvelo, futsi ayawuba manye.
69 Emagala lamabi ayawulahlwa, yebo, ngaphandle kulo lonkhe live lesivini sami; ngoba buka, sekungekwekugcina nje kuphela ngisitsena sivini sami.
70 Futsi kwenteka kutsi iNkhosi yesivini yatfumela inceku yayo; inceku yahamba yenta njengoba iNkhosi yayiyaletile, yaletsa letinye tinceku; futsi tatimbalwa.
71 Futsi iNkhosi yesivini yatsi kuto: Hambani, nisebente esivinini, ngemandla enu. Ngoba bukani, sesikhatsi sekugcina sekutsi ngondle sivini sami; ngoba siphetfo sesisedvute, nesikhatsi sita ngekushesha; futsi uma nisebenta nami ngemandla enu niyawujabula ngetitselo lengiyawutibekela tona kulungiselela sikhatsi lesitawufika madvute.
72 Futsi kwenteka kutsi tinceku tahamba tasebenta ngemandla ato; futsi iNkhosi yesivini yasebenta nato; tayilalela imiyaleto yeNkhosi yesivini kuto tonkhe tintfo.
73 Futsi kwaphindze kwacala kwaba khona titselo temvelo esivinini; nemagala emvelo acala kukhula futsi kuchakaza ngesivinini lesikhulu; emagala asendle acala kukhishwa alahlwa; futsi bagcina imphandze kanye nesihloko saso ngekulingana, njengekwemandla aso.
74 Futsi ngaleyo ndlela tasebenta, ngako konkhe kukhutsala, njengekwemiyaleto yeNkhosi yesivini, kwate kwatsi lamabi alahlwa ngephandle kwesivini, neNkhosi yesivini yayitigcinele kutsi tihlahla besetinetitselo futsi temvelo; futsi taba njengekwemtimba munye; netitselo tatilingana; futsi iNkhosi yesivini yayitigcinele sitselo semvelo, lesasiligugu lelikhulu kuyo kusukela ekucaleni.
75 Futsi kwenteka kutsi ngesikhatsi iNkhosi yesivini ibona kutsi sitselo sayo sasisihle, nekutsi sivini sayo sasesite konakala, yabita tinceku tayo, yatsi kuto: Bukani, ngoba ngalesi sikhatsi sekugcina sisondlile sivini sami; futsi niyabona kutsi ngente njengekutsandza kwami; futsi ngisigcinile sitselo semvelo, kangangoba sihle, njengoba sasinjalo ekucaleni. Futsi nibusisiwe; ngenca yekutsi nibe nekukhutsala ekusebenteni nami esivinini sami, futsi nayigcina imiyaleto yami, nisiletsile futsi kimi sitselo semvelo, kute sivini sami singabe sisonakala nanini, futsi lokubi kulahliwe, bukani niyawuba nekujabula nami ngenca yesitselo sesivini sami.
76 Ngoba bukani, sikhatsi lesidze ngitawutibekela sitselo sesivini sami kulungiselela sikhatsi lesitako ngekushesha; futsi kwekugcina ngisondlile sivini sami, ngasitsena, ngasivukutela, ngaphindze ngasifaka umcuba; ngaloko-ke ngitawutibekela letinye tetitselo, sikhatsi lesidze, njengoba ngikhulumile.
77 Futsi uma sikhatsi sesita sekutsi sitselo lesibi siphindze sita esivinini sami, ngaleso sikhatsi ngitawukwenta kutsi letinhle kanye naletimbi tigcogcwe; bese kutsi letinhle ngitigcinela tona, kutsi letimbi ngitilahle endzaweni yato. Futsi emvakwaloko kuta sikhatsi kanye nesiphetfo; futsi sivini sami ngitawukwenta kutsi sishiswe ngemlilo.