1 Ne biakalua ne tshidimu tshina atshi kuakabanga kuikala mvita kabidi pankatshi pa Bena Nefi ne Bena Lamana. Ne nansha mumvua muikala nsonga, mvua ne mubidi munena; bua nanku bantu ba Nefi bakasungula bua ngikala mulombodi wabu, anyi mulombodi wa misumba yabu ya basalayi.

2 Bua nanku biakalua ne mu tshidimu tshianyi tshia dikumi ne tshisambombo, ngakaya ku mutu kua musumba wa basalayi wa Bena Nefi, bua kuluisha Bena Lamana; bua nanku bidimu nkama isatu ne makumi abidi ne bisambombo biakapita.

3 Ne biakalua ne mu tshidimu tshia nkama isatu ne makumi abidi ne tshia muanda muteketa, Bena Lamana bakatuluila ne bukola bua bungi menamena, mua ne bakakuatshisha misumba yanyi ya basalayi bôwa; bua nanku bakabenga kuluangana to, ne biakabanga kupingana panyima bitangila ku matunga a ku node.

4 Ne biakalua ne tuakalua ku tshimenga tshia Angola, ne tuakangata tshimenga, ne tuakadilongolola bua kudisungidila kudi Bena Lamana. Ne biakalua ne tuakakolesha tshimenga ne bukitu buetu bonsu; kadi nansha bua miaba yetu mikolesha yonsu, Bena Lamana bakatuluila ne bakatuipata mu tshimenga.

5 Ne bakatuipata kabidi mu bulaba bua Davidi.

6 Ne tuakenda ne tuakafika ku bulaba bua Yoshua, buvua buikala ku mikalu ya ku wesete pabuipi ne ku muelelu wa mbuwa.

7 Ne biakalua ne tuakasangisha bantu betu ne lukasa lonsu lukumbana, bua ne kubasangisha pamua mu tshisumbu tshimua.

8 Kadi monayi, buloba buvua buwula ne banyengi ne ne Bena Lamana; ne nansha muvuaku kuikala dibutuka dinena divua dilembelela pa mutu pa bantu banyi, kabakakudimuna mutshima ku midimu yabu mibi to; bua nanku mashi ne dishipangana dikola biakatangalaka pa mpala onsu wa bulaba, bifumina kudi Bena Nefi ne kudi Bena Lamana, ne bivua buntomboji bua bantu bonsu pa mpala onsu wa bulaba.

9 Ne mpindiewu, Bena Lamana bavua ne mfumu, ne dîna dienda divua Alona; ne wakalua kutubunda ne musumba wa basalayi binunu makumi anayi ne binayi. Ne monayi, ngakamukandamena ne binunu makumi anayi ne bibidi. Ne biakalua ne ngakamutamba ne musumba wanyi wa basalayi ne wakanyema kumpala kuanyi. Ne monayi, bionsu ebi biakenzeka, ne bidimu nkama isatu ne makumi asatu biakapita.

10 Ne biakalua ne Bena Nefi bakabanga kukudimuna mutshima ku malu mabi abu ne bakabanga kubila mena muvua muambi Samuele muamba mu Nyuma; bualu monayi, muntu nansha umua kavua mua kulama tshintu tshivua tshikala tshienda to, bua bivi, ne banyengi, ne bashipi ba bantu, ne majimbu, ne dipaka dia manga bivua bikala mu bulaba.

11 Kuakabanga nanku kuikala madilu ne didilakana mu bulaba bonsu bua bintu ebi, ne nangananga munkatshi mua bantu ba Nefi.

12 Bua nanku, mema Molomo, pangakamona didilakana diabu ne madilu abu, ne kanyinganyinga kabu kumpala kua Mukalenga, mutshima wanyi wakabanga kusanka munda muanyi, bualu mvua mumanya lusa ne bulekelelu bua Mukalenga, bua nanku ntshinka ne neikala ne lusa kudibu mu mushindu ne nebalua kabidi bantu bakana.

13 Kadi monayi disanka dianyi edi divua dia tshianana, bualu dinyingalala diabu kadiakabalombola ku dikudimuna dia mutshima to, bua bualu bua buimpa bua Nzambi; kadi pa mutu pa nanku divua dinyingalala dia bapîshibua, bualu Mukalenga kakubalekela bua kashidi ne bapeta disanka mu mibi to.

14 Ne kabakalua kudi Yezu ne mitshima mitshibuluka ne nyuma minyingalala to, kadi bakatshipa Nzambi ne bakajinga kufua. Nansha nanku bavua baluangana ne muela wa mvita bua kusungidila moyo wabu.

15 Ne biakalua ne kanyinganyinga kanyi kakampinganyina kabidi, ne ngakamona ne dituku dia ngâsa dikavua dipita buabu, ku bia mubidi ne ku bia nyuma; bualu ngakamona binunu bia ku bobu biupudibua mu ditombokela diabu dia Nzambi wabu patoka, ne biwujibua mushiki bu pa mpala wa buloba bu mudi bunyawu bua bufuka. Ne nenku, bidimu nkama isatu makumi anayi ne binayi bivua bipita.

16 Ne biakalua ne mu tshidimu tshia nkama isatu ne makumi anayi ne tshitanu, Bena Nefi bakabanga kunyema kumpala kua Bena Lamana; ne bakabalondakaja tô ne muakafikabu ku bulaba bua Yashona, kumpala kua kukumbanabu bua kubakuatabu mu dinyema diabu.

17 Ne mpindiewu, tshimenga tshia Yashona tshivua pabuipi ne ku bulaba kuvua Amalona muteka miandiku bua Mukalenga, bua ne kayinyangakajibu to. Ne monayi, ngakaya bilondeshila ku muaku wa Amalona, Ne ngakangata bitata bia Nefi, ne ngakenza miandiku bilondeshila ku muaku wa Amalona.

18 Ne pa bitata bia Nefi ngakenza mulubu mujima wa bubi bonsu ne malu mapita bubi onsu; kadi pa bitata ebi ngakadikandika bua kuenza mulubu mujima wa bubi buabu ne malu mapita bubi abu, bualu monayi, nsombelu wa bubi ne malu mapita bubi uvua utungunuka kuikala ku mesu anyi katshia nkumbana kumanya njila ya bantu.

19 Ne ndi ne diakabi bua bubi buabu; bualu mutshima wanyi udi muwula ne kanyinganyinga bua bubi buabu, matuku anyi onsu; nansha nanku, ndi mumanya ne nembandishibua ku dituku dia ndekelu.

20 Ne biakalua ne mu tshidimu etshi bakipatakaja bantu ba Nefi kabidi ne bakatuipata. Ne biakalua ne bakatunyemesha tô ne patuakafika ku node ku bulaba buvuabu babikila ne Shema.

21 Ne biakalua ne tuakakolesha tshimenga tshia Shema, ne tuakasangishamu bantu betu monsu muvuabi bikumbana, bua ne pamuapa tuvua mua kubapandisha ku dibutuka.

22 Ne biakalua ne mu tshidimu tshia nkama isatu ne makumi anayi ne tshisambombo bakabanga kutuluila kabidi.

23 Ne biakalua ne ngakambila bantu banyi, ne ngakabakankamika ne bukola bua bungi, ne bimana ne dikima kumpala kua Bena Lamana ne baluangana bua bakaji babu, ne bana babu, ne nzubu yabu ne mbanza yabu.

24 Ne mêyi anyi yakabajudisha ku bukitu bukesa, mua ne kabakanyema kumpala kua Bena Lamana to, kadi bakabimanyina ne dikima.

25 Ne biakalua ne tuakakokangana ne musumba wa basalayi binunu makumi asatu tuluisha musumba wa basalayi binunu makumi atanu. Ne biakalua ne tuakimana kumpala kuabu ne dikamakana adi bua ne bakanyema kumpala kuetu.

26 Ne biakalua ne pakanyemabu tuakabalondakaja ne misumba yetu ya basalayi, ne tuakatuilangana nabu kabidi, ne tuakabatamba; nansha nanku makanda a Mukalenga ka’avua netu to; eyowa, tuvua tudiluangena, bua ne Nyuma wa Mukalenga kavua muikala netu to; bua nanku tuvua balua bateketa bu muvua bana betu.

27 Ne mutshima wanyi wakanyingalala bua dikenga dipita bukola dia bantu banyi edi, bua bubi buabu ne malu mapita bubi abu. Kadi monayi, tuakaya kuluisha Bena Lamana ne banyengi ba Gadiantona, tô ne mutuakangata kabidi malaba a bupianyi buetu.

28 Ne tshidimu tshia nkama isatu ne makumi anayi ne tshitema tshiakapita. Ne mu tshidimu tshia nkama isatu ne makumi atanu, tuakatua ndondu ne Bena Lamana ne banyengi ba Gadiantona, mutuakâbuluilangana malaba a bupianyi buetu.

29 Ne Bena Lamana bakatupesha bulaba bua ku node, eyowa, mena ku kajila kabumbakana kavua kalombola ku bulaba bua ku sude. Ne tuakapesha Bena Lamana bulaba bonsu bua ku sude.