1 Ne biakalua ne Bena Lamana kabakalua ku kuluangana kabidi to tô ne pakapita bidimu bikuabu dikumi. Ne monayi, mvua mupesha bantu banyi, Bena Nefi, mudimu wa kulongolola malaba abu ne biluilu biabu bia mvita bua diba dia mvita.

2 Ne biakalua ne Mukalenga wakangambila ne: Bila kudi bantu aba—Kudimunayi mutshima, ne luayi kundi, ne tambuishibuayi, ne âsayi ekelezia wanyi kabidi, ne nenuepeleshibua.

3 Ne ngakabila kudi bantu aba, kadi bivua tshianana; ne kabakamona ne Mukalenga ki uvua mubepelesha, ne uvua mubapesha diba bua kukudimuna mutshima to. Ne monayi, bakapapishila Mukalenga Nzambi wabu mitshima yabu.

4 Ne biakalua ne kunyima kua tshidimu tshia dikumi etshi tshipita, bikala bienza, pamua, bidimu nkama isatu ne makumi asambombo katshia ku dilua dia Kilisto, mfumu wa Bena Lamana wakantumina mukanda, uvua umanyisha ne bavua badilongolola bua kulua kabidi bua kutuluisha.

5 Ne biakalua ne ngakenzeja bantu banyi ne badisangisha pamua ku bulaba bua Kabutu, mu tshimenga tshivua tshikala ku mikalu, pabuipi ne kajila kabumbakana kavua kalombola ku bulaba bua ku sude.

6 Ne tuakakuteka misumba yetu ya basalayi, bua ne tuimanyika misumba ya basalayi ya Bena Lamana, bua ne kabangatshi buloba nansha bumua bua ku malaba etu to; bua nanku tuakadikolesha ne makola a mvita etu onsu bua kubaluisha.

7 Ne biakalua ne mu tshidimu tshia nkama isatu ne makumi asambombo ne tshimua Bena Lamana bakapueka ku tshimenga tshia Kabutu bua kutuluisha; ne biakalua ne mu tshidimu atshi tuakabatamba, mua ne bakapingana ku malaba abu bobu.

8 Ne mu tshidimu tshia nkama isatu ne makumi asambombo ne tshibidi bakapueka kabidi bua kuluangana mvita. Ne tuakabatamba kabidi, ne tuakashipa ba bungi babu, ne bafua babu bakimanshibua mu mbuwa.

9 Ne mpindiewu, bua tshintu etshi tshinena tshivua bantu banyi, Bena Nefi, benza, bakabanga kudiamba bua makanda abu bobu, ne bakabanga kuditshipa kumpala kua diûlu ne nebadisombuela bua mashi a bana babu bavua bena lukuna babu bashipa.

10 Ne bakaditshipa kudi diûlu, ne kabidi kudi nkuasa wa butumbi wa Nzambi ne, nebaya kuluisha bena lukuna babu mvita, ne nebabakosa pa mpala wa bulaba.

11 Ne biakalua ne mema, Molomo, ngakabenga kashidi kubangila ku diba adi bua kuikala kapita ne mulombodi wa bantu aba, bua bubi ne malu mapita bubi abu.

12 Monayi, mvua mubalombola, nansha bua bubi buabu mvua mubalombola ku mvita misangu ya bungi, ne mvua mubananga ne mutshima wanyi mujima, bilondeshila ku dinanga dia Nzambi divua dikala munda muanyi; ne anyima wanyi uvua mudifila dituku dionsu mu masambila kudi Nzambi wanyi buabu; nansha nanku, bivua bikala kabiyi ne ditabuija to, bua bualu bua bupapa bua mitshima yabu.

13 Ne mvua mubapatuisha ku bianza bia bena lukuna babu misangu isatu, ne kabavua bakudimuna mutshima ku mibi yabu to.

14 Ne pakaditshipabu ku bionsu bivua biba kandika kudi Mukalenga ne Mupandishi wetu Yezu Kilisto ne, nebaya kuluisha bena lukuna babu mvita, ne kudisombuela bua mashi a bana babu, monayi dîyi dia Mukalenga diakalua kundi, diamba ne:

15 Disombuela ndianyi, ne nemfutulula; ne bualu bantu aba kabena bakudimuna mutshima kunyima kua pangakabapatuisha to, monayi, nebakoshibua pa mpala wa buloba.

16 Ne biakalua ne ngakabenga kashidi bua kuya kuluisha bena lukuna banyi; ne ngakenza mena bu muvua Mukalenga mumpeshela mukenji; ne ngakimana bu mujadiki wa tshianana bua kumuenesha kudi ba pa buloba malu angakamona ne kumvua, bilondeshila ku mamuenesha a Nyuma wakajadika malu atshilualua.

17 Bua nanku ndi nufundila, nuenu Bena Bisamba bia Benda, ne kûdi wewa kabidi, nzubu wa Isalele, pâtuadija mudimu, bua nuikala pabuipi ne ku dilongolola bua kupingana ku bulaba bua bupianyi buenu;

18 Eyowa, monayi, ndi mfundila ndekelu ya buloba yonsu; eyowa, kunudi nuenu, bisa dikumi ne bibidi bia Isalele, bialumbuluishibua bilondeshila ku midimu yenu kudi bakasungula Yezu bua kuikala bayidi benda mu bulaba bua Yelushalema.

19 Ne ndi mfundila kabidi tshishadi tshia bantu aba, bâlumbuluishibua pabu kudi dikumi ne babidi bakasungula Yezu mu bulaba ebu; ne nebalumbuluishibua kudi ba dikumi ne babidi bakuabu bakasungula Yezu mu bulaba bua Yelushalema.

20 Ne Nyuma udi mummuenesha bintu ebi; bua nanku ndi nufundila bonsu. Ne bua bualu ebu ndi nufundila, bua ne numanya ne nudi bonsu ne tshia kuimana kumpala kua nkuasa wa tshilumbuluilu wa Kilisto, eyowa, muntu yonsu udi muikala wa ku dîku dia bantu dia Adama; ne nudi ne tshia kuimana bua kulumbuluishibua bua midimu yenu, ne idi mimpa anyi ne idi mibi;

21 Ne kabidi bua nuitabuija lumu luimpa lua Yezu Kilisto, lunuikala nâlu munkatshi muenu; ne kabidi ne bua Bena Yuda, bantu ba tshipungidi ba Mukalenga, bapeta bujadiki bukuabu pa kusakidila kudi ewu wakamonabu ne wakumvuabu, Yezu awu, wakashipabu, uvua muikala Kilisto muina ne Nzambi muina.

22 Ne ndi musua kunuitabujija nuenu bonsu ndekelu ya buloba bua kukudimuna mutshima ne kudilongolola bua kuimana kumpala kua nkuasa wa tshilumbuluilu wa Kilisto.