1 Ne mpindiewu biakalua ne mu tshidimu tshia nkama isatu ne makumi asambombo ne tshisatu Bena Nefi bakaya ne misumba yabu ya basalayi kuluisha Bena Lamana, bafumina ku bulaba bua Kabutu.

2 Ne biakalua ne Bena Lamana bakapingaja misumba ya basalayi ya Bena Nefi panyima kabidi ku bulaba bua Kabutu. Ne patshivuabu batshioka bua diluangana, musumba wa basalayi wa Bena Lamana uvua ne bukola wakabaluila; ne bakaluangana mvita mikola, mua ne Bena Lamana bakangata tshimenga tshia Kabutu, ne bakashipa ba bungi ba ku Bena Nefi, ne bakakuata ba bungi ku lukanu.

3 Ne bashadila bakanyema ne bakaya kudisangisha ne bena mu tshimenga tshia Teyankuma. Mpindiewu tshimenga tshia Teyankuma tshivua ku mikalu ya ku muelelu wa mbuwa; ne tshivua kabidi pabuipi ne tshimenga tshia Kabutu.

4 Ne bakabanga kutûtshibua bualu bua misumba ya basalayi ya Bena Nefi ivua miya kuluisha Bena Lamana; bualu bu biobi kabiyi bua nanku to, Bena Lamana kabavu mua kupeta bukola pa mutu pabu to.

5 Kadi, monayi, bitungu bia Nzambi nebikuata bantu babi; ne bantu babi nebapeta dinyoka diabu ku bianza bia bantu babi; bualu bantu babi ki badi basonsola mitshima ya bana ba bantu ku dimatshisha dia mashi.

6 Ne biakalua ne Bena Lamana bakadilongolola bua kubunda tshimenga tshia Teyankuma.

7 Ne biakalua ne mu tshidimu tshia nkama isatu ne makumi asambombo ne tshinayi Bena Lamana bakabunda tshimenga tshia Teyankuma, bua bobu kuangata tshimenga tshia Teyankuma kabidi.

8 Ne biakalua ne Bena Nefi bakimanyina Bena Lamana ne bakabapingaja panyima. Ne Bena Nefi bavua badisua kabidi bua bukola buabu nkayabu pakamonabu ne bakapingaja Bena Lamana panyima; ne bakaya mu bukola buabu, ne bakangata kabidi tshimenga tshia Kabutu.

9 Ne mpindiewu bintu bionsu ebi biakenzeka, ne kuvua binunu bia bantu biakashipibua ku nseka yonsu ibidi, ku Bena Nefi ne ku Bena Lamana.

10 Ne biakalua ne tshidimu tshia nkama isatu ne makumi asambombo ne tshisambombo tshiakapita, ne Bena Lamana bakalua kuluisha kabidi Bena Nefi; ne Bena Nefi kabavua banji kukudimuna mutshima bua bubi buvuabu benza to, kadi bakatungunuka mu bubi buabu misangu yonsu.

11 Ne kakuena mushindu udi ludimi bua kumvuija, anyi bua muntu kufunda ne diumvuija dijima dia malu adi akuatshisha bôwa a mashi ne dishipangana avua mikala munkatshi mua bantu, ku Bena Nefi ne ku Bena Lamana to; ne mutshima onsu uvua mupapa, ki bua tshinyi bavua basanka bua dimatshisha dia mashi misangu yonsu.

12 Ne kakuvua nkuanji kuikala bubi bunena munkatshi mua bana ba Lehi bonsu, anyi mena munkatshi mua nzubu wa Isalele, bilondeshila ku miaku ya Mukalenga, bu muvuabu munkatshi mua bantu aba to.

13 Ne biakalua ne Bena Lamana bakangata tshimenga tshia Kabutu, ne nanku bualu bungi buabu buvua bupita bungi bua Bena Nefi.

14 Ne bakenda kumpala kabidi bua kuluisha tshimenga tshia Teyankuma, ne bakipata benamu pambelu patshi, ne bakakuata bena lukanu ba bungi bakaji ne bana, ne bakabashipa bu milambu kudi Nzambi yabu ya mpingu.

15 Ne biakalua ne mu tshidimu tshia nkama isatu ne makumi asambombo ne tshia muanda muteketa, Bena Nefi bafîka tshiji bua bualu bua Bena Lamana bavua balambula bakaji babu ne bana babu, ki bua tshinyi bakaya kuluisha Bena Lamana ne tshiji tshikola menamena, mua ne bakatamba kabidi Bena Lamana, ne bakapita pambelu pa malaba abu.

16 Ne Bena Lamana kabakalua kabidi bua kuluisha Bena Nefi to tô ne tshidimu tshia nkama isatu ne makumi muanda muteketa ne tshitanu.

17 Ne mu tshidimu etshi bakapueka bua kuluisha Bena Nefi ne bukola buabu bonsu; ne kabavua babadibua to bua bunena bua bungi buabu.

18 Ne katshia ku tshikondu etshi Bena Nefi kabakapeta bukola pa mutu pa Bena Lamana to, kadi bakabanga kubakomba mena bu mudi lumuma kumpala kua munya.

19 Ne biakalua ne Bena Lamana bakapueka bua kuluisha tshimenga tshia Kabutu; ne kuvua mvita mikola menamena yakaluanganyibua mu bulaba bua Kabutu, muakatambabu Bena Nefi.

20 Ne bakanyema kabidi kumpala kuabu, ne bakalua ku tshimenga tshia Boaza; ne aku bakakandamena Bena Lamana ne dikima dipita, mua ne Bena Lamana kabakabatamba to tô ne pakaluabu kabidi musangu muibidi.

21 Ne pakaluabu musangu muibidi, bakipata Bena Nefi ne bakabashipa ne dishipa dinena menamena; bakalambula bakaji babu ne bana babu kudi mpingu yabu.

22 Ne biakalua ne Bena Nefi bakanyema kabidi kumpala kuabu, bangata bena mu bimenga bishadila ne bena mu misoku bonsu nabu.

23 Ne mpindiewu mema, Molomo, muikala mumona ne Bena Lamana bavua pabuipi ne kutshimuna bulaba, bua nanku ngakaya ku kakuna ka Shima, ne ngakangata miandiku ivua Amalona musokoka bua Mukalenga.