1 Ne biakalua ne ngakaya munkatshi mua Bena Nefi, ne ngakalekela mutshipu umvua mutshipa ne tshia kubambuluisha kabidi to; ne bakampesha kabidi bulombodi bua misumba yabu ya basalayi, bualu bavua bammona bu ne mvua mua kubapatuisha mu ntatu yabu.

2 Kadi monayi, ntshivua ne ditekemena to, bualu mvua mumanya bitungu bia Mukalenga bialua pa mutu pabu; bualu kabakakudimuna mutshima ku malu mabi abu to, kadi bakaluangana bua mioyo yabu kabayi babikila Muntu awu wakabafuka to.

3 Ne biakalua ne Bena Lamana bakalua kutubunda patuvua banyemena ku tshimenga tshia Yadene; kadi, monayi, tuakabapingaja panyima, mua ne kabakangata tshimenga diba adi to.

4 Ne biakalua ne bakalua kabidi kutubunda, ne tuakakuba tshimenga. Ne kuvua bimenga bikuabu bivua Bena Nefi bakuba, miaba mikolesha yakakosa Bena Lamana njila bua ne kabavua mua kubuela mu ditunga divua dikala kumpala kuetu, bua kubutula bena mu bulaba buetu to.

5 Kadi biakalua ne malaba onsu atuvua bapitshilaku, ne benamu kabavua bikala badisangishamu to, Bena Lamana bavua bababutula, ne bimenga biabu bishadila, ne misoku yabu ne bimenga biabu bivua biôsha ne kapia; ne ki muakapita bidimu nkama isatu ne makumi muanda muteketa ne tshitema nanku.

6 Ne biakalua ne mu tshidimu tshia nkama isatu ne makumi muanda mukulu Bena Lamana bakalua kabidi kutubunda bua kuluangana, ne tuakabakandamena ne dikima; kadi bionsu bivua tshianana, bualu bungi buabu buvua bunena bua ne bakadiatakaja bantu ba Bena Nefi muinshi mua makasa abu.

7 Ne biakalua ne tuakâsa lubilu kabidi, ne bavua ne lubilu lupita lua Bena Lamana bakanyema, ne bavua ne lubilu kaluyi lupita lua Bena Lamana to bakabakomba ne bakababutula.

8 Ne mpindiewu, monayi, mema, Molomo, ntshiena njinga bua kupandisha anyima ya bantu ku dibalondela bualu bua mashi ne dishipangana dikola bu bivua biela ku mesu kuanyi to; kadi, bualu ndi mumanya ne bintu ebi bushuwa bidi ne tshia kumanyika, ne bintu bionsu bidi bisokoka bidi ne tshia kubuluibua pa misonga ya nzubu—

9 Ne kabidi dimanya dia bintu ebi udi ne tshia kumanyika kudi tshishadi tshia bantu aba, ne kabidi kudi Bena Bisamba bia Benda, bavua Mukalenga muamba ne nebatangalaja bantu aba, ne bantu aba nebamueneshibua bu mudi bantu ba tshianana munkatshi mua Bena Bisamba bia Benda to—bua nanku ndi mfunda tshikosu tshikesa, ntshiyi nkima kulonda mulubu mujima wa malu amvua mumona to, bua mukenji umvua mupeta, ne kabidi bua kanupetshi kanyinganyinga kanena bua bubi bua bantu aba to.

10 Ne mpindiewu monayi, ebi ndi mbiambila ndelanganyi yabu, ne kabidi Bena Bisamba bia Benda badi ne lusa kudi nzubu wa Isalele, badi bamona ne badi bamanya kudi mabenesha abu aluila.

11 Bualu ndi mumanya ne abu nebikala ne kanyinganyinga bua dikenga dipita bukola dia nzubu wa Isalele; eyowa, nebanyingalala bua dibutuka dia bantu aba; nebanyingalala ne bantu aba kabavua bakudimuna mutshima to bua ne Yezu uvua bua kuikala mubakidila mu maboku enda.

12 Mpindiewu ndi mufundila tshishadi tshia nzubu wa Yakoba bintu ebi; ne bidi bifunda ku mushindu ewu, bualu Nzambi udi mumanya ne bubi kabuakubatuadilabi to; ne bidi ne tshia kuikala bisokoka bua Mukalenga bua bilua mu diba dienda nkayenda.

13 Ne ewu uvua mukenji umvua mupeta; ne monayi, nebilua bilondeshila ku mukenji wa Mukalenga, pâmonaye ne bidi bikumbana, mu lungenyi luenda.

14 Ne monayi, nebiya kudi ba ku Bena Yuda badi kabayi ne ditabuija to; ne nebiya bua kipatshila aka—bua kubitabujija ne Yezu udi Kilisto, Muana wa baluma wa Nzambi wa moyo; bua Tatu akumbaja kipatshila kenda kanena ne ka tshiendelela, ku njila wa Munanga wenda, mu kupinguluja Bena Yuda, anyi nzubu yonsu wa Isalele, ku bulaba bua bupianyi buabu, buvua Mukalenga Nzambi wabu mubapesha, bua kukumbaja tshipungidi tshienda;

15 Ne kabidi bua ne ndelanganyi ya bantu aba itabuija lumu luimpa luenda bikola bipita kabidi, luaya kudibu kumbukila kudi Bena Bisamba bia Benda; bualu bantu aba nebatangalajibua, ne balua bantu bafîkuluka, bakoya, ne bendesha ku moyo, kupita mushindu utu ukadi muikala munkatshi muetu, eyowa, mena utu ukadi muikala munkatshi mua Bena Lamana awu, ne etshi bua bualu bua dipanga ditabuija diabu ne ditendelela diabu dia mpingu.

16 Bualu monayi, Nyuma wa Mukalenga ukavua mulekela bua kukuata mudimu ne batatuabu; ne kabena ne Kilisto ne Nzambi pa buloba to; ne badi bipatshibua bu mudi bisota kumpala kua lupepela.

17 Bavua musangu mukuabu bikala bantu basanguluka, ne bavua ne Kilisto bu mudi mulami wa mikoku wabu; eyowa, Nzambi Tatu uvua mena ubalombola.

18 Kadi mpindiewu, monayi, Satana udi ubalombola eku ne eku, mena bu bisota kumpala kua lupepela, anyi bu mavuala atenkakaja buatu budi pa mutu pawu, budi kabuyi ne tshilamba anyi longo, ne kakuyi tshintu nansha tshimua tshiakubuludika natshi to; ne mena bu mudiwu, ki mudibu.

19 Ne monayi, Mukalenga udi mukuata mabenesha abu, avuabu mua kupeta mu bulaba, bua Bena Bisamba bia Benda bâsa mu bulaba.

20 Kadi monayi, nebilua ne Bena Bisamba bia Benda nebabipata ne nebabatangalaja; ne kunyima kua Bena Bisamba bia Benda babipata ne babatangalaja, monayi, pashisha Mukalenga neavuluka tshipungidi tshiakenzaye kudi Abalahama ne kudi nzubu yonsu wa Isalele.

21 Ne Mukalenga neavuluka kabidi masambila a bakana, avuabu bamulomba buabu.

22 Ne pashisha, Ô nuenu Bena Bisamba bia Benda, nenuimana munyi kumpala kua Nzambi, panuikala kanuyi bakudimuna mutshima ne balekela njila yenu mibi to?

23 Kanuena bamanya to ne nudi mu bianza bia Nzambi anyi? Kanuena bamanya to ne udi ne bukola bonsu, ne ku mukenji wenda munena buloba nebuvungibua bu mudi muvungu wa mukanda anyi?

24 Bua nanku, kudimunayi mutshima, ne dipuekeshayi kumpala kuenda, tshianana neanuluila ne bululama bua kunupîsha—tshianana tshishadi tshia ndelanganyi ya Yakoba netshilua munkatshi muenu bu mudi ntambua, ne netshinupandakaja mu bipesa, ne kakuena muntu nansha umua wa kunupatuisha to.