1 Ne mpindiewu, monayi, ndi musua kuakula kakesa ne tshishadi tshia bantu aba badi bepeleshibua, pikala Nzambi mua kubapesha miaku yanyi, bua bamanya malu a batatuabu; eyowa, ndi ngakula nenu, nuenu tshishadi tshia nzubu wa Isalele; ne eyi idi miaku indi ngakula:

2 Numanya ne nudi ba ku nzubu wa Isalele.

3 Numanya ne nudi ne tshia kukudimuna mutshima, anyi kanuena mua kupandishibua to.

4 Numanya ne nudi ne tshia kuteka biluilu bienu bia mvita panshi, ne kanuena bua kusanka kabidi bua kumatshisha mashi to, ne kanuena bua kubiangata kabidi to, amu Nzambi munupesha mukenji bua kubiangata.

5 Numanya ne nudi ne tshia kulua ku dimanya dia batatuenu, ne kukudimuna mutshima ku mibi ne malu mabi enu onsu, ne kuitabuija Yezu Kilisto, ne udi Muana wa Nzambi, ne Bena Yuda bakamushipa, wakajuka kabidi ku bukola bua Tatu, pananku, wakatshimuna lukita; ne ku njila wenda kabidi kalonda ka lufu kakadînyibua.

6 Ne udi ufila dibika dia bafua, pananku muntu udi ne tshia kujuka bua kuimana kumpala kua nkuasa wa tshilumbuluilu.

7 Ne udi muvuija disungila dia ba pa buloba, kudi udi usanganyibua kayi mupîla to kumpala kuenda mu dituku dia tshilumbuluilu to, neapeshibua dianyisha bua kusombaye ku mpala kua Nzambi mu bukalenga buenda, bua kuimbilaye Tatu, ne Muana, ne Nyuma wa Tshijila, badi Nzambi umua, misambu ya disamuna ne bimbi ba misambu ba mu diûlu ne munanunanu, mu ngikadilu wa disanka udi kayi ne ndekelu to.

8 Bua nanku kudimunayi mutshima, ne nutambuishibua mu dîna dia Yezu, ne nupeta lumu luimpa lua Kilisto, luatuadibua kumpala kuenu, kabiyi amu mu miandiku eyi to kadi kabidi mu miandiku yaluila Bena Bisamba bia Benda kumbukila kudi Bena Yuda, miandiku mina yanuluila kumbukila kudi Bena Bisamba bia Benda.

9 Bualu monayi, eyi mmifundibua bua kipatshila ka ne nuitabuija ayi; ne binuitabuija ayi nenuitabuija eyi kabidi; ne binuitabuija eyi nenumanya bitangila batatuenu, ne kabidi midimu ya dikema ivua mienjibua ku bukola bua Nzambi munkatshi muabu.

10 Ne nenumanya ne nudi tshishadi dia tshia ndelanganyi ya Yakoba; bua nanku badi banubala munkatshi mua bantu ba tshipungidi tshia diambedi; ne binuitabuija mu Kilisto, ne bikala batambuishibua, diambedi ne mâyi, pashisha ne kapia ne Nyuma wa Tshijila, kulondesha tshilejilu tshia Mupandishi wetu, bilondeshila muvuaye mutupesha mukenji, nebikala bimpa buenu mu dituku dia tshilumbuluilu. Amena.