Shapita 9
Moloni udi ubikila bantu badi kabayi bitabuija mu Kilisto bua kukudimuna mutshima—Udi uyisha Nzambi wa bishima, udi upesha mabuluila ne upumuina badi ne lulamatu mapa ne bimanyinu—Bishima bidi bijika bua bualu bua dipanga ditabuija—Bimanyinu bidi bilonda badi bitabuija—Moloni udi ukankamija bantu bua bikala ne lungenyi ne balama mikenji. Pabuipi ne 401–421 p.d.K.
1 Ne mpindiewu, ndi ngakula kabidi bitangila aba badi kabayi bitabuija mu Kilisto to.
2 Monayi, nenuitabuija mu dituku dia dinyoka dienu anyi—monayi, pâlua Mukalenga, eyowa, mena dituku dinena adi pâvungibua buloba pamua bu mudi muvungu wa mukanda, ne penguluka bintu ku kapia kakola, eyowa, mu dituku dinena adi pânuimanyishibua kumpala kua Muana wa Mukoku wa Nzambi—pashisha nenuamba kakuena Nzambi to anyi?
3 Pashisha nenutshikala nuvila Kilisto, anyi nudi mua kumona Muana wa Mukoku wa Nzambi anyi? Nudi nutshinka ne nenusomba nenda ne dimanya dia dipîa dienu anyi? Nudi nutshinka ne nudi mua kuikala ne disanka bua kusomba ne Tshifukibua tshinsantu atshi, padi anyima yenu misumpakana ne dimanya dia dipîla bua ne nudi benzela mêyi enda bibi kashidi anyi?
4 Monayi, ndi nnuambila ne nenuikala ne dikenga dipita bua kusomba ne Nzambi munsantu ne mululama, ne meji a bukoya buenu kumpala kuenda, bipita nuenu basomba mu ngena ne anyima mipîshibua.
5 Bualu monayi, panuavuishibua kumpala kua Nzambi bua kumona butaka buenu, ne butumbi bua Nzambi kabidi, ne bunsantu bua Yezu Kilisto, ne bitemesha ludimi lua kapia ludi kaluyi lujima to pa mutu penu.
6 Ô pashisha nuenu badi kanuyi nuitabuija to, kudimukayi kudi Mukalenga; bilayi ne bukitu kudi Tatu mu dîna dia Yezu, bua ne pamuapa nusanganyibua kanuyi katoba to, bakezuka, balengela, ne batoka, bikala basukudibua ku njila wa mashi a Muana wa Mukoku, ku dituku dinena ne dia ndekelu.
7 Ne ndi ngakula kabidi kunudi nuenu badi bavila mabuluila a Nzambi, ne nuamba ne akadi majika, ne kakuena mabuluila to, anyi mambi, anyi mapa, anyi diôndopa, anyi diakula dia miakulu, ne diandamuna dia miakulu to;
8 Monayi ndi nnuambila, udi uvila bintu ebi kena mumanya lumu luimpa lua Kilisto to; eyowa, kena mubala mifundu to; bikalabi nanku, kena uyumvua to.
9 Bualu katuena tubala ne Nzambi udi momumua makelela mushala, lelu, ne bua kashidi, ne kudiye kakuena nkudimuku anyi kandidimbi ka dishintuluka to anyi?
10 Ne mpindiewu, panuikala badielangana meji bua nzambi udi ukudimuka, ne kudiye kuikala kandidimbi ka dishintuluka, apu nudi belangana meji munda muenu bua nzambi udi kayi Nzambi wa bishima to.
11 Kadi monayi, nenuleja Nzambi wa bishima, mena Nzambi wa Abalahama, ne Nzambi wa Isaka, ne Nzambi wa Yakoba; ne Nzambi umua awu wakafuka diûlu ne buloba, ne bintu bionsu bidi mômu.
12 Monayi, wakafuka Adama, ne kudi Adama kuakaluila dipona dia muntu. Ne Yezu Kilisto, udi Tatu ne Muana, wakalua bua dipona dia muntu; ne bua Yezu Kilisto disungila dia muntu diakalua.
13 Ne bua disungila dia muntu, diakaluila ku njila wa Yezu Kilisto, badi bapingajibua kumpala kua Mukalenga; eyowa, ki mudi bantu bonsu basungidibua nanku, bualu lufu lua Kilisto ludi lutuala dibika dia ku lufu, didi dituala disungila dia ku tulu katuyi ndekelu, ku tulu tuina tuabishibua bantu bonsu ku bukola bua Nzambi pâdila mpungi; ne nebapatuka, bakesa ne banena, ne nebimana kumpala kua tshilumbuluidi tshienda, bikala basungidibua ne basuludibua ku monji ewu wa tshiendelela wa lufu, lufu luina ludi lufu lua mubidi.
14 Ne pashisha tshitungu tshia Wa Tshijila tshidi tshilua kudibu; ne pashisha diba didi dilua didi yeya udi mukoya neashala mukoya; ne udi muakana neashala muakana; udi ne disanka neashala ne disanka; ne udi kayi ne disanka to neashala kayi ne disanka to.
15 Ne mpindiewu, Ô nuenu badi badielangana meji Nzambi udi kayi mua kuenza bishima to, ndi musua kunuebeja ne, bintu bionsu bindi muamba ebi bikadi bienzeka anyi? Ndekelu ukadi mulua anyi? Monayi ndi nnuambila ne, To; ne Nzambi kena mulekela kuikala Nzambi wa bishima to.
16 Monayi, bintu bidi Nzambi muenza kabiena bia dikema ku mesu kuenu anyi? Eyowa, ne nganyi udi mua kumvua midimu ya dikema ya Nzambi?
17 Nganyi wamba ne katshivua tshishima to, ne diûlu ne buloba biakafukibua ku dîyi dienda; ne ku bukola bua dîyi dienda muntu wakafukibua ku lupuishi lua buloba; ne ku bukola bua dîyi dienda bishima biakenzeka?
18 Ne nganyi wamba ne Yezu Kilisto kakenza bishima bikola bia bungi to? Ne kuvua bishima bikola bia bungi biakenza bapostolo.
19 Ne bu diba adi bishima bienzejibua, bua tshinyi Nzambi walekedi kuikala Nzambi wa bishima ne kadi utshidi Muntu udi kayi ushintuluka to? Ne monayi, ndi nnuambila ne kena ushintuluka to; bu yeya ushintuluka udi ulekela kuikala Nzambi; ne kena ulekela kuikala Nzambi to, ne udi Nzambi wa bishima.
20 Ne bualu budiye ulekêla kuenza bishima munkatshi mua bana ba bantu, mbualu badi bashinguluka mu dipanga dia ditabuija, ne bumbuka ku njila muakana, ne kabena bamanya Nzambi udibu ne bua kueyemena to.
21 Monayi, ndi nnuambila ne ewu yonsu udi witabuija mu Kilisto, kayi wela mpata to, tshionsu tshialombaye Tatu mu dîna dia Kilisto netshimupeshibua; ne dilaya edi didi buabu bonsu, ne ku ndekelu ya buloba.
22 Bualu monayi, Yezu Kilisto, Muana wa Nzambi, udi wamba nanku, kudi bayidi benda bâshala, eyowa, ne kudi bayidi benda bonsu kabidi, mu matshi a tshisumbu tshia bantu: Ndayi mu buloba bonsu, nuyisha bantu bonsu lumu luimpa;
23 Ne udi witabuija ne udi utambuishibua neapandishibua, kadi kayi witabuija to neapîshibua;
24 Ne bimanyinu ebi nebilonda badi bitabuija—mu dîna dianyi nebipata badiabulu; nebakula miakulu mipia-mipia; nebakuata nyoka; ne bobu banua tshintu tshia lufu katshia kubasâmisha to; nebatenteka babêdi bianza ne nebôndopibua;
25 Ne ewu yonsu witabuija mu dîna dianyi, kayi wela mpata to, nemmujadikila miaku yanyi yonsu, mena ne ku ndekelu ya buloba.
26 Ne mpindiewu, monayi, nganyi udi mua kukandamena midimu ya Mukalenga? Nganyi udi mua kuvila miaku yenda? Nganyi udi mua kujuka bua kuluisha bukola bua bukitu bonsu bua Mukalenga? Nganyi udi kupetula midimu ya Mukalenga? Nganyi udi mua kupetula bana ba Kilisto? Monayi, nuenu bonsu badi bapetudi ba midimu ya Mukalenga, bualu nenukema ne nenufua.
27 Ô nanku kanupetudi to, ne kanukemi to, kadi umvuilayi miaku ya Mukalenga, ne lombayi kudi Tatu mu dîna dia Yezu bua bintu bionsu binudi nabi dijinga. Kanuedi mpata to, kadi itabuijayi, ne bangayi bu mu bikondu bia kala, ne luayi kudi Mukalenga ne mutshima wenu onsu, ne enzayi mudimu bua lupandu luenu nkayenu ne bôwa ne dizakala kumpala kuenda.
28 Ikalayi ne lungenyi mu matuku a ditêtshibua dienu; diumbushayi bukoya bonsu; kanulombi tshintu bua nuenu kutshinyanga ku nkuka yenu to, kadi lombayi ne dikamakana didi kadiyi dinyungana to, bua kanukuluki ku ditêtshibua to, kadi bua nusadila Nzambi mulelela ne wa moyo.
29 Tangilayi ne kanutambuishibu kanuyi bakumbana to; tangilayi ne kanudi biakudia bia tshijila bia Kilisto kanuyi bakumbana to; kadi tangilayi ne nuenza bintu bionsu bikala bakumbana, ne nubienza mu dîna dia Yezu Kilisto, Muana wa Nzambi wa moyo; ne nuenu benza nanku, ne nunanukila ne ku ndekelu, kanuakuipatshibua to nansha bishi.
30 Monayi, ndi nnuambila bu ndi ngakula ku bafua; bualu ndi mumanya ne nenupeta miaku yanyi.
31 Kanumpîshi bua bilema bianyi, anyi tatuanyi to, bua bilema bienda, anyi bobu bavua bafunda kumpala kuenda; kadi pa mutu pa nanku elayi tuasakidila kudi Nzambi bua ne anumuenesha bilema bietu, bua ne numanya mua kuikala ne lungenyi kupita mutudi.
32 Ne mpindiewu, monayi, tuvua bafunda miandiku eyi bilondeshila ku dimanya dietu, mu maleta atudi tubikila munkatshi muetu ne Tshiena Ejipitu tshienzulula, avua matushila ne atuvua bashintulula, bilondeshila ku mushindu wa ngakuilu wetu.
33 Ne bu bitata bietu bikala binena bikumbana, tuvua tufunda mu Tshiena Ebelu; kadi tuvua kabidi bashintulula Tshiena Ebelu; ne bu tuetu mua kufunda mu Tshiena Ebelu, monayi, kanuvua nupeta kalema mu miandiku yetu to.
34 Kadi Mukalenga mmumanya bintu bitudi bafunda, ne kabidi ne kakuena bantu bakuabu badi bamanya muakulu wetu to; ne bualu kakuena bantu bakuabu badi bamanya muakulu wetu to, bua nanku udi mulongolola mushindu wa kuwandamuna.
35 Ne bintu ebi mbifundibua bua tukupula mashi a bana betu, bavua bashinguluka mu dipanga dia ditabuija, ku bilamba bietu.
36 Ne monayi, bintu ebi bituvua tujinga bitangila bana betu, eyowa, nangananga dipinguluja diabu ku dimanya dia Kilisto, bidi bifuanangana ne masambila a bansantu bonsu bavua basomba mu bulaba.
37 Ne Mukalenga Yezu Kilisto anyisha ne masambila abu andamunyibua bilondeshila ku ditabuija diabu; ne Nzambi Tatu avuluka tshipungidi tshidiye muenza ne nzubu wa Isalele; ne ababenesha bua kashidi, ku njila wa ditabuija mu dîna dia Yezu Kilisto. Amena.