1 Beʼora túnaʼ, ten Moroni, bin in dzíbt baʼax quiʼn tucultiʼc yételeʼ quiʼn dzíb tiʼ in sucuʼunoʼob le u palal Lamanoʼ; in kát ca u yoheʼltoʼobeʼ dzoʼoc u maʼn maʼs tiʼ cuatrocientos veinte haʼaboʼob dzaʼabac le baʼax cu yeʼesic u tal Cristo.

2 Cu dzoʼocol tún in wáʼalic teʼex dzeʼedzec tʼanoʼob utiaʼal in tsolic a xiquiʼneʼexeʼ bin in caʼah in taac le baʼaxoʼob dzíbtaanaʼ.

3 Heʼel túnaʼ in kát in tsol a xiquiʼneʼex le quen a xoqueʼex le baʼaloʼobaʼ, wá u naʼatiʼl Hahal Dios ca a xoqueʼex, ca a kaʼahseʼex hach bix u chʼaʼabal ótsilil Yumtsil tiʼ le u palal maʼcoʼob, desde cah mentaab Adan tac tu kinil le quen a kameʼex le baʼaloʼobaʼ yétel ca a tuculteʼex ta pucsiʼkaleʼex.

4 Le quen a kameʼex le baʼaloʼobaʼ in hach kát tiʼ teʼex ca a káteʼex tiʼ Hahal Dios, le Tata minaʼan u xuloʼ, tu kabaʼ Cristo, ca a káteʼex tiʼ wá maʼ hach u hahil le baʼaloʼobaʼ; wá xan ca kátiʼqueʼex yétel tulácal yól a pucsiʼkaleʼex, hach tu hahil ca dzíboltiʼqueʼex, yan teʼex fe tiʼ Cristoeʼ, letiʼ bín u yeʼes teʼex u hahil le baʼaloʼoboʼ yoʼolal u páhtalil le Pixan cu túxtiʼc Hahal Diosoʼ.

5 Yétel u páhtalil u Pixan cu túxtiʼc Diosoʼ u páhtal a kahóltiʼqueʼex u hahil tiʼ tulácal le baʼaloʼoboʼ.

6 Heʼebaʼaxac maʼalobeʼ toh xan, yétel hah, beyaʼ mixbaʼal utseʼ cu yaʼalic minaʼan Cristoeʼ yaxeʼ cu yaʼalic de que yan.

7 Yoʼolal xan u páhtal le Pixan cu túxtiʼc Dioseʼ bin a woheʼlteʼex de que Letiʼ yan; le oʼolal quiʼn tsolic a xiquiʼneʼex maʼ a wáʼalic minaʼan o u páhtalil Hahal Dios; tumen letiʼeʼ cu meyah yétel páhtalil heʼebix u fe u palal maʼcoʼobeʼ, heʼebix behlaʼeʼ bey sámaʼl yétel maʼntadz.

8 Quin tsolic xan a xiquiʼnseʼexeʼ in sucuʼuneʼex maʼ ta wáʼaliqueʼex maʼ a káteʼex u síbil baʼaloʼob Hahal Dios, tumen yaʼaboʼob yétel tiʼ le huntúliliʼ Dios u taloʼoboʼ yan yaʼab heʼheʼlas u páhtal u dzaʼabal le síbil baʼaloʼob heʼeloʼobaʼ; chén baʼaleʼ letiʼ le huntúliliʼ Dios mentiʼc u meyahoʼob tiʼ tulácal baʼaloʼoboʼ; yétel cu dzaʼabal tiʼ maʼcoʼob yoʼolal u yeʼesaʼalil le u Pixan Hahal Dios yoʼolal u yántaaloʼob.

9 Tumen heʼel tunaʼ tiʼ huntúl maʼ dzaʼan utiaʼal u caʼans u naʼatiʼl le tʼan tumen u Pixan Hahal Diosoʼ;

10 Tiʼ ulʼakeʼ utiaʼal u caʼans u naʼatiʼl le tʼanoʼ, láiliʼ letiʼ le Pixan dzamaʼhiloʼ;

11 Tiʼ ulʼakeʼ dzaʼan tiʼ ca anac humpʼél fe tiʼ hach sén nohoch, tiʼ ulak xaneʼ u síbil baʼal utiaʼal cu dzaʼac le kohaʼanoʼoboʼ tumen le Pixanoʼ;

12 Tiʼ ulʼakeʼ u betiʼc hach nucuch baʼaloʼob cu haʼaksic yól maʼc;

13 Tiʼ ulʼakeʼ, ca u yaʼalic baʼax bín úchul tu yoʼolal tulácal baʼaloʼob;

14 Tiʼ ulʼakeʼ dzaʼabaʼan tiʼ ca u yil angeloʼob cu yántahoʼob yétel pixanoʼob cu meyahoʼob uts;

15 Tiʼ ulakeʼ u heʼheʼlásil tʼanoʼob;

16 Tiʼ ulʼakeʼ cu naʼatiʼc tʼanoʼob yétel u heʼheʼlásil tʼanoʼob.

17 Tulácal le sibil baʼaloʼobaʼ chén u Pixan Cristo cu tal; yétel le bix u kát letiʼe, tiʼ huhuntúlil maʼc cu dzaic.

18 In kát xan in tsol a xiquiʼneʼxe in sucuʼuneʼex in yacuneʼex ca a woheʼlteʼexeʼ tulácal maʼalob sibaʼaloʼobeʼ tiʼ Cristo u tal.

19 In dzíbotiʼc in kát teʼex in yabilah sucuʼuneʼex ca kaʼahac teʼexeʼ, letiʼeʼ bey anil heʼex hoʼolheʼaqueʼ bey behlaʼeʼ, beyxann maʼntadz, yételeʼ tulácal le sibil baʼaloʼob dzoʼoc in wáʼalic teʼexaʼ, tulácal cu dzaʼabal tiʼ pixan; mix bikin bin luksaʼac le yókolcabaʼ, baʼaleʼ bín luksaʼac yoʼolal wá maʼ tu creertiʼcoʼob u palal maʼcoʼob.

20 Le oʼolaleʼ u deber ca anaqueʼex fe, wá u deber u yantal feeʼexeʼ, kabét ca paʼtiʼqueʼex xan; wá kabét ca paʼtiʼqueʼexeʼ, yan u yantal xan yacunah.

21 Wá maʼ tán u yantal teʼex yacunaheʼ maʼ páhtal a salvartiʼqueʼex tu reinoil Hahal Diosiʼ; mix xan bín pátchahac a bineʼex tu reinoil Hahal Dios wá minaʼan teʼex fe, mix xan wá minaʼan teʼex pahtahil.

22 Wá maʼ ca paʼtiʼqueʼexeʼ bin aniqueʼex kasaʼan ta wóleʼex, leloʼ tún cu tal yoʼolal keban.

23 Tu hahileʼ Cristoeʼ tu yaʼalah tiʼ c tatáoʼob; wá yan teʼex fe, bín pátchahac a betiʼqueʼex tulácal le baʼaxoʼob quiʼn wóltiʼc maʼalobtacoʼ.

24 Beʼora túnaʼ bin in tʼan tiʼ tulácal maʼc tiʼ tulácal u xulil yókolcab; wá ca tac tu kinil u xuʼulul u páhtal yétel u síbil baʼaloʼob Hahal Dios ichileʼexeʼ, leloʼ yoʼolal maʼ ta creertiʼqueʼex.

25 Yan ótsil tún u palal maʼcoʼob wá ca kuchuc u yúchul lelaʼ; tumen maʼ bín anac mix huntúl ichileʼex ca u bet utsiʼ, hach mix huntúl! Tumen wá maʼx ichileʼex ca u bet utseʼ, leloʼ bín uchuc yoʼolal u páhtal yétel u sibil baʼaloʼob Hahal Dios.

26 Yétel ótsil yan tiʼ xan le maʼxoʼob quen u betoʼob u xuʼulul le baʼaloʼob ca químicoʼobaʼ; tumen bín químicoʼob ichil u kebanoʼob yétel maʼ bín patchahac u salvartiʼcubaoʼob tu reinoil Hahal Diosiʼ! Lelaʼ tán in wáʼalic heʼebix yaʼalil Cristoeʼ, teneʼ maʼ tán in tus.

27 Teneʼ quiʼn tsolic a xiquiʼneʼex yoʼolal ca kaʼahseʼex teʼex le baʼaloʼobaʼ; tumen séb u bin u nadzal tu kin quen a woheʼlteʼex maʼ tán in tus, tumen bín a wileneʼex tu cúchil tuʼux cu juzgar Hahal Dios; le tún le Yumtsil Hahal Dios quen u yaʼal teʼexoʼ: Maʼ wá tiʼn wáʼalah in tʼan tiʼ teʼex heʼebix tu dzíbtahil le maʼcaʼ, wá bey huntúl maʼc cu kaʼam áwát ichil le quiʼmenoʼob, bixmaʼiʼ bey huntúl maʼc cu tʼan ichil le luʼumoʼ?

28 Quin wáʼalic le baʼaloʼobaʼ yoʼolal u yúchul le baʼaxoʼob aʼalaʼaloʼoboʼ. Heʼel túnaʼ bín hókoc tu chiʼ le Hahal Dios minaʼan u xuloʼ; yételeʼ u tʼaneʼ, bín uʼuyac tiʼ huntúl tata tac u pal, bey cu tal.

29 Hahal Dios bín u yeʼes teʼex le baʼaxoʼob dzoʼoc in dzíbtiʼcoʼ u hahil.

30 In kát tún in caʼa tsol a xiquiʼneʼex ca taqueʼex tiʼcnal Cristo, yétel ca kuchuqueʼex yicnal tulácal síbil baʼaloʼoboʼ baʼaleʼ maʼ a maʼchiqueʼex le sibaʼaloʼob kastacoʼ mix le baʼax sucio.

31 Aheʼn yétel líken teʼ luʼumoʼ, Jerusalen; bixmaʼiʼ, búquiʼnt a hadzuts nokoʼob u xchʼupul pal Sion; dza u muk a estacaoʼob yétel maʼs yaʼabcunt tuʼux nacaleʼex u xul a luʼum maʼntadz, yoʼolal maʼ u saʼatal a wól tu caʼatén, yétel ca cumplirtaac le promesaoʼob tu mental le Tata minaʼan u xul ta wételoʼ, u tanah Israel.

32 Bixmaʼiʼ, coʼoteneʼ tu yicnal Cristo ca beychahaqueʼex heʼex letiʼeʼ maʼ a chʼaʼiqueʼex tiʼ baʼaloʼob maʼ cu betiʼc Dios; wá maʼ tán a wocleʼex tiʼ baʼaloʼob kastaqueʼ yétel ca a yabilteʼex Hahal Dios yétel tulácal a páhtaleʼex, a wóleʼex yétel a mukeʼexeʼ, u gracia túneʼ yan teʼex yétel leloʼ, yétel tu yoʼolal u graciaeʼ bín patchahac a betabaeʼex perfectoeʼex tiʼ Cristo; wá xan yoʼolal u gracia Hahal Dioseʼ hach dza pʼataleʼex perfectoeʼex tiʼ Cristoeʼ maʼ tu páhtal a wáʼaliqueʼex contra u pahtalil Hahal Dios.

33 Beyoʼ, tu caʼaténeʼ, wá yoʼolal u gracia Hahal Dios ca sutabaeʼex hach perfecto a wól tiʼ Cristo yétel maʼ a wáʼaliqueʼex minaʼan u páhtalileʼ, bín tún saccunsaʼaqueʼex tiʼ Cristo tumen u gracia Hahal Dios yoʼolal cu weʼequel u kiʼikel Cristo. Heʼebix u yaʼalmaʼhil u promesa le Tataoʼ utiaʼal cu luʼsaʼal a kebaneʼex yoʼolal u páhtal a nahmaʼhtiʼqueʼex hach sac, sagrado minaʼan mix humpʼél maʼncha.

34 Behlaʼ túneʼ quiʼn wáʼalic adios tiʼ tulácal maʼc. Séb in bin heʼeleʼl tiʼ u cúchil u quiʼmaʼc ólal Hahal Dios, tac le kin le quen bisaʼac in pixan yétel in wínclilal quen u caʼa múchʼubaoʼob tu caʼatén ca bisaʼac tún tumen le tu tánil Letiʼ in náhaltiʼc quiʼmaʼc ólal u hadzuts cúchil u juzgar le nohoch Jehova u Juezil minaʼan u xul le cuxaʼanoʼob yétel le quiʼmenoʼoboʼ. Amen.