1 Behlaeʼ, ten Moroni, quiʼn dzíbtiʼc dzeʼedzec le tʼanoʼob tu yaʼalah in Tata Mormon yoʼolal fe, esperanza yétel yacunahoʼ; tumen bey úchic u yaʼalil tiʼ le cah, caʼaliquiʼl tán u tʼan yételoʼob teʼ le tanah iglesia tu mentahoʼob utiaʼal cu meyahtiʼcoʼob Hahal Dios.

2 Beʼoraaʼ, ten Mormon, quiʼn wáʼalic teʼexeʼ, in sucuʼuneʼex yabileʼex yoʼolal u Hahal Dios le Tataoʼ yétel c Yumtsil Jesucristo, yoʼolal u sibil baʼal u tʼan h dzaʼab ten tuʼux cu yaʼalaʼal teneʼ cu chaʼabal in tʼaniqueʼex behlaʼeʼ.

3 Le betiʼqueʼ in kát ca in tʼaneʼex teʼex tiʼ iglesia yaneʼex, teʼex le maʼx cu bín tu pach Cristo yétel dzoʼoc a kamiqueʼex le páhtahil kabétoʼ, tumen yétel leloʼ heʼel u páhtal a wocoleʼex tu heʼeleʼl Yumtsileʼ, desde behlaʼeʼ tac le quen anac teʼex le heʼeleʼl yétel letiʼ teʼ caʼanoʼ.

4 Beʼoraʼ quiʼn tucultiʼc ta woʼolaleʼex in sucuʼuneʼex yoʼolal baʼaxoʼob ca betiʼqueʼex yétel paz tiʼ u palal wínicoʼob.

5 Tumen kaʼahaʼan ten u tʼan Hahal Dios, cu yaʼaliqueʼ: Yoʼolal u meyahoʼob bín a kahólteʼexoʼob; tumen wá maʼalob u meyahoʼobeʼ, maʼalobosoʼob xan letiʼoʼob.

6 Tumen heʼel túnaʼ, Hahal Dioseʼ dzoʼoc u yaʼaliqueʼ le kakas maʼcoʼ maʼ tu páhtal u betiʼc baʼal uts; tumen wá cu yaʼalic u dzaic humpʼél sibil baʼal wá humpʼél óracion tiʼ Hahal Dioseʼ, yétel maʼ tán u betiʼc yétel tulácal yóleʼ mix baʼal u belal tiʼ.

7 Tumen maʼ tán u yilaʼal tiʼ bey justiʼciaeʼ.

8 Heʼel túnaʼ, wá huntúl maʼc, kas, cu tasic u boʼolaleʼ, maʼ tán u betiʼc yétel tulácal yól; le betiʼqueʼ cu xoʼocol heʼebix táquiʼc le boʼolal utiaʼalinte; le betiʼqueʼ cu yantal kasiʼl tu tánil Hahal Dios.

9 Beyxan u kaʼamaʼl kasiʼl u oracion huntúl maʼc cu orar baʼaleʼ maʼ tán u orar yétel tulácal yól, bixmaʼiʼ, mixbaʼal u bilal tiʼ tumen Hahal Dioseʼ maʼ tán u kamic mixmaʼc beyaʼ.

10 Le betiʼqueʼ huntúl kas maʼqueʼ maʼtech u páhtal u betiʼc baʼal maʼalob; mix tán u páhtal u dzaic humpʼél maʼalob síbaʼal.

11 Tumen heʼel túnaʼ humpʼél cheʼen káheʼ maʼ tu páhtal u dzaic maʼalob haʼ; mix xan u páhtal u dzaic káh haʼ humpʼél cheʼen maʼalob; bey túnoʼ. Wá huntúl maʼc cu meyah yétel quiʼsineʼ maʼ tu páhtal u tʼuʼulpachtiʼc Cristo; wá xan cu tʼuʼulpachtiʼc Cristoeʼ, maʼ tán u pahtal u meyahtiʼc quiʼsin.

12 Le oʼolaleʼ, tulácal baʼaloʼob maʼalobeʼ tiʼ Hahal Dios u tal, le baʼax kas xaneʼ tiʼ Satanas u tal; tumen le quiʼsinoʼ u enemigo Hahal Dios, yételeʼ maʼntadz u kát baʼatel yétel, cu yaʼalic ca betaac baʼaloʼob kastac yétel kebanoʼob.

13 Baʼaleʼ heʼel túnaʼ le baʼaxoʼob tiʼ Hahal Dios u taloʼ, cu yaʼalic ca betaac baʼaloʼob maʼalobtac; bey túnoʼ tulácal baʼal cu yaʼalic ca betaac baʼaloʼob maʼalobtac yétel ca yabiltaac Hahal Dios, yétel u meyahtiʼqueʼ, letiʼ dzaic tu tucul maʼc tumen letiʼ.

14 Canántabaeʼex tún in sucuʼuneʼex in yabiltmeʼex ca a wáʼaleʼexeʼ le baʼaloʼob kastacoʼ tiʼ Hahal Dios u tal wá le baʼax utsoʼ tiʼ quiʼsin u tal.

15 Tumen heʼel túnaʼ in sucuʼuneʼex, cu chaʼabal a juzgareʼex yoʼolal u páhtal a wohéltiʼqueʼexoʼ baʼax uts wá baʼax kas; yételeʼ hach chicaʼan bix quen a juzgarteʼex yoʼolal u páhtal a wohéltiʼqueʼex hach tu bel, heʼebix u sásilil le kin hach chicaʼan ichil le ehoʼchʼeʼeniloʼ.

16 Heʼel túnaʼ, cu dzaʼabal u Pixan Cristo tiʼ tulácal maʼc yoʼolal u páhtal u kahóltiʼc baʼax uts tiʼ le kasoʼ, le betiʼqueʼ tán in caʼansic teʼex bix heʼel u páhtal a juzgareʼexeʼ; tumen tulácal baʼal cu yaʼalic ca betaac baʼal maʼalob yétel cu yaʼalic ca creertiʼc tiʼ Cristoeʼ, Cristo túxtiʼc yoʼolal u páhtalil yétel u sibil baʼal tiʼ Cristo; bey tunoʼ bín pátchahac a wohéltiʼqueʼex yétel hach maʼalob kahólal, lelaʼ tiʼ Hahal Dios u tal.

17 Baʼaleʼ heʼebaʼaxac cu yaʼalic tiʼ maʼcoʼob ca u betoʼob le kas yétel maʼ u creertiʼcoʼob Cristo, ca u tʼan tu contra tiʼ yétel maʼ u meyahtiʼcoʼob Hahal Diosiʼ, bín tún pátchahac a wohéltiʼqueʼex, yétel hach maʼalob a naʼatiʼc, teʼ quiʼsin u tal; tumen bey u meyah quiʼsinaʼ, tumen letiʼeʼ maʼtech tán u yaʼalic tiʼ le maʼcoʼob ca u betoʼob baʼal uts, maʼ, tiʼ mix huntúl, mix u angeloob betiʼc úts mix le maʼxoʼob cu chʼúyicoʼob tiʼ letiʼoʼ.

18 Behlaʼ túneʼ in sucuʼuneʼex, tumen a kahóleʼex le sásil u deber a juzgartiʼqueʼexoʼ, leloʼ u sásil Cristo, ilawileʼex maʼ u kastal a cuxtaliʼleʼex; tumen le juicio iquiʼl a juzgareʼexeʼ yétel letiʼ can juzgarbileʼex teʼex.

19 Bey túnoʼ quiʼn kátiʼc teʼexeʼ sucuʼuneʼex ca a caxteʼex yétel tulácal a wól u sásil Cristoeʼ tu yoʼolal u páhtal a kahóltiʼqueʼex le uts tiʼ le kasoʼ; wá xan ca nadzicabaeʼex yicnal tulácal baʼal maʼalobeʼ, maʼ a condenartiʼqueʼexeʼ tu hahileʼ bín a betabaeʼex u palal Cristo.

20 Baʼaleʼ, in sucuʼuneʼex, bix heʼel u páhtal a chʼaʼiqueʼex tulácal baʼal maʼalob?

21 Behlaʼ c nadzah tiʼ le feoʼ letiʼ yicnal le tiʼn wáʼalah teʼex quen in wáʼaleʼ; ten quen in weʼes teʼex bix heʼel u páhtal a chʼaʼiqueʼex tulácal baʼal maʼalobeʼ.

22 Tumen heʼeleʼ, Hahal Dioseʼ yoheʼl tulácal baʼal, tumen letiʼeʼ tyaʼan utiaʼal minaʼan u xul yétel minaʼan u xul; heʼel tunaʼ tu túxtah angeloʼob u bet u meyhiloʼob utiaʼal u palal maʼcoʼob u yutsil, ca u dza yoheltoʼobeʼ yan u tal Cristo yétel tu yoʼolal Cristoeʼ bín talac tulácal baʼal maʼalob.

23 Hahal Dioseʼ tu yaʼalah xan tiʼ le profetaoʼob, hach tu chiʼil letiʼoʼ, Cristoeʼ bin talac.

24 Heʼel túnaʼ yaʼab heʼheʼlasil u modos u yeʼesic baʼaloʼob maʼalobac tiʼ u palal maʼcoʼob, tulácal le baʼaloʼob maʼalobtacoʼ tiʼ Cristo u tal; wá maʼ beyiʼ, maʼcoʼobeʼ heʼel u yantaloʼob lubaʼanoʼobeʼ, yétel mix humpʼél baʼal maʼalob cu páhtal kuchil yicnaloʼob.

25 Tu yoʼolal tún u meyhil u angeloʼob yétel yoʼolal tulácal tʼanoʼob cu hókol tu chiʼ Hahal Dioseʼ, maʼcoʼobeʼ h cáhs u meyahoʼob tiʼ u fe tiʼ Cristo; bey túnoʼ yoʼolal le feoʼ, cu chaʼicoʼob tiʼ tulácal baʼal maʼalob; yétel bey úchic tac cah tal Cristo.

26 Cu dzoʼocol u taleʼ, maʼcoʼobeʼ yan u bín tiʼcnal xan tu yoʼolal le fe tu kabaʼoʼ; yoʼolal xan le feoʼ pátchah u betaaloʼob u palal Hahal Dios, tiʼ tún hach tu hahil cuxaʼan Cristoeʼ, tu yaʼalah le tʼanoʼob tiʼ c tataoʼobaʼ cu yaʼalic: Heʼebaʼaxac baʼal ca a káteʼex tiʼ le Tata tiʼn kabaʼoʼ, wá maʼalobeʼ, yétel a fe ca creerteʼex yan a kamiqueʼexeʼ, heʼel túnaʼ, bín dzaʼabac teʼex.

27 Le betiʼc in sucuʼuneʼex in yabiltmeʼex, dzoʼoc wá u háwál le baʼal cu haʼaksic yól maʼcoʼob, tumen dzoʼoc u naʼacal Cristo tu caʼanil yétel dzoʼoc u cultal tu xnoʼoh kabil Hahal Dios yoʼolal utiaʼal u kamic u derechosil u chʼaʼic ótsilil tiʼ le Tata, le yan tiʼ yoʼolal u palal maʼcoʼoboʼ?

28 Tumen letiʼ dzoʼoc u cumplirtiʼc baʼax u pʼaxmaʼh le leyoʼ, cu kátiʼc tún tiʼ tulácal maʼc yan u fe tiʼeʼ ca u nadzubaoʼob tiʼ tulácal baʼal maʼalob; le betiʼqueʼ, letiʼeʼ cun u baʼatel tu yoʼolal u palal maʼcoʼoboʼ, yétel cuxaʼan minaʼan u xul teʼ caʼanoʼ.

29 Tu yoʼolaloʼ tu betah lelaʼ dzoʼoc wáʼ u xuʼulul le baʼal cu haʼaksic yól in yabiltmeʼex sucuʼuneʼex? Heʼel in wáʼalic teʼexeʼ maʼ, mix xan dzoʼoc u meyah le angeloʼob ichil u palal maʼcoʼoboʼ.

30 Tumen heʼel túnaʼ cu kubicubaoʼob tiʼ letiʼ yoʼolal u betiʼcoʼob u meyhil heʼebix u yaʼalic tiʼoʼobeʼ, yétel cu yeʼesicoʼob tiʼ le maʼxoʼob yan humpʼél cuxaʼan fe tiʼoʼob, yan u pixan maʼ tu kexeʼ yétel humpʼél pixan yan u muk tiʼ tulácal baʼal bey huntúl dioseʼ.

31 U meyah tún letiʼeʼ, u tʼanic maʼcoʼob ca talacoʼob utiaʼal cu kexic yóloʼob yétel u betiʼc le meyahoʼob tiʼ le promesaoʼob u mentmaʼh le Tata yétel u palal maʼcoʼoboʼ, yétel u betiʼcoʼob listo le beh u palal maʼcoʼob, tán u yaʼalic u tʼan Cristo tiʼ le u vasoʼob Yumtsil yéyaʼanoʼoboʼ tu yoʼolal cu dzaicoʼob testiʼmonio yoʼolal letiʼ.

32 Le quen meyahnac beyaʼ, le Yumtsil Hahal Diosoʼ cu mentiʼc le behoʼ tu yoʼolal beyoʼ u yalab u palal maʼcoʼobeʼ ca anac u behoʼob tiʼ Cristo, yétel tu yoʼolal beyoʼ le Pixan cu túxtiʼc Dios tu pucsiʼkaloʼ, heʼebix le páhtaloʼ; bey tún xan tan u betiʼc le tataoʼob letiʼ le promesaoʼob ich u cúmplirtiʼc le kax tan u betiʼc le tataoʼob letiʼ le promesaoʼob ich u cumplirtiʼc le kax tan u betiʼc le tataoʼob letiʼ le promesaoʼob ich u palal maʼcoʼoboʼ.

33 Cristo u yaʼalmaʼheʼ: Wá yan teʼex fe tiʼ teneʼ, bín anac teʼex páhtalil a betiʼqueʼex heʼebaʼax quiʼn wilic ten kabét.

34 Letiʼ túneʼ dzoʼoc u yaʼalic: Kex a wóleʼex tu yoʼolal le baʼax ca betiʼqueʼex tac u xuliloʼob le yokolcabaʼ, coʼoteneʼex tiʼn wicnal yétel ca oc haʼnaqueʼex tiʼn kabaʼ yétel ca anac teʼex fe tiʼ ten tu yoʼolal u páhtal a taleʼex tiʼn wicnal minaʼan u xul.

35 Bey túnoʼ in sucuʼuneʼex wá hah le baʼaxoʼob quiʼn wáʼalic teʼexaʼ, tiʼ u dzoc kineʼ, Hahal Dios cun eʼesic teʼex yétel páhtalil yétel nohoch gloria hah; dzoʼoc wá u xuʼulul u kinil le baʼal cu haʼaksic yól maʼc?

36 Dzoʼoc wá u xuʼulul u chicpahal angeloʼob tiʼ u palal maʼcoʼob? Dzoʼoc wá u yaʼalicoʼob maʼ hah u páhtal le Pixan cu túxtiʼc Diosoʼ wá quex yan u betiʼc caʼaliquiʼl tán u bin u maʼn kin, caʼaliquiʼl yan yókolcab, caʼaliquiʼl pʼatal quex huntúl maʼc kabét u salvartaal?

37 Heʼel túnaʼ quiʼn wáʼalic teʼexeʼ maʼ; yoʼolal le fe cu betaal meyahoʼob cu haʼaksic yól maʼc tu yoʼolal xan teʼ cu chicpahal angeloʼob u bet u meyahoʼob tu yoʼolal maʼcoʼoboʼ; le betiʼqueʼ, wá dzoʼoc u xuʼulul le baʼaloʼobaʼ, u palal maʼcoʼob tumen leloʼ yoʼolal mu creertiʼc yétel tulácal túneʼ mixbaʼal u belal.

38 Tumen heʼebix u yaʼalmaʼhil Cristoeʼ, mix huntúl maʼc cu páhtal u bín, tu yicnal wá minaʼan fe tiʼ tu kabaʼ, le betiʼqueʼ le baʼaloʼobaʼ wá dzoʼoc u xuʼululeʼ, beyxan le feoʼ dzoʼoc u xuʼulul yáh yaniʼl maʼc tumen cu pʼáta bey maʼ tu boʼotah tu yoʼolal le kebanoʼob.

39 Baʼaleʼ heʼel túnaʼ in sucuʼuneʼex in yabilmeʼex, quiʼn paʼtiʼc maʼs maʼalob baʼaloʼob tiʼ teʼex, tumen in tucultiʼqueʼ yan teʼex fe tiʼ Cristo, yoʼolal cu páhtal a caniqueʼex; tumen wá minaʼan teʼex fe tiʼ letiʼeʼ, heʼel túnoʼ maʼ tán a nahmaʼtiʼqueʼex ca xoʼocoqueʼex ichil u cahil u iglesia.

40 Ulak xaneʼ in sucuʼuneʼex in kát in wáʼal teʼex baʼax yoʼolal páhtalil, bix heʼel u yantal teʼex fe wá maʼ ca paʼtiʼc uts xan?

41 Baʼax tún can a paʼteʼex? Heʼel túnaʼ, quiʼn wáʼalic teʼexeʼ u deber ca paʼtaaqueʼex, chén yoʼolal u sacrificioil Cristo yétel yan a caʼa cuxquiʼntaaleʼex tiʼ le cuxtaliʼl caʼa cuxlacoʼob minaʼan u xul lelaʼ chén yoʼolal a feeʼex tiʼ letiʼ heʼebix aʼalaʼanil teʼexoʼ. Caʼa liʼseʼex utiaʼal cuxtal minaʼan u xul.

42 Le betiʼc túneʼ wá huntúl yan fe tiʼeʼ kabét ca paʼtaac xan tiʼ; tumen wá minaʼan fe maʼ tán u páhtal u yantal esperanza.

43 Tu caʼatén, quiʼn wáʼalic teʼex xaneʼ, huntúl maʼqueʼ maʼ tu páhtal u yantal fe tiʼ, mix esperanza wá maʼ humilde yétel dzoʼoc u kubic u pucsiʼkal tiʼ.

44 Tumen wá maʼeʼ u fe yétel u esperanza mixbaʼal u belal, tumen mixmaʼc cu kaʼamaʼl tumen Hahal Dios wá maʼ humilde yétel cu kubic u pucsiʼkaloʼob tiʼ wá huntúl maʼc humilde yétel cu kubic u pucsiʼkal tiʼ yétel cu yaʼalic, tu páhtal Pixan, cu túxtiʼc Diosoʼ Jesuseʼ letiʼ Cristoeʼ, kabét ca anac yacunah tiʼ; tumen wá minaʼan tiʼeʼ, mixbaʼal; le betiʼqueʼ hach kabét ca anac yacunah tiʼ.

45 Le yacunahoʼ cu mukyahtaal, sén uts, maʼ tech u dzíbolah, maʼatech cu chuʼupul yétel orgullo, maʼ tu caxtiʼc baʼal chén utiaʼal, maʼ séb u pʼuʼuhuliʼ, maʼ tán u tucultiʼc baʼal kas, maʼ tán u quiʼmaʼcchahal u yól tiʼ keban, baʼaleʼ cu quiʼmaʼctal u yól tiʼ hah, cu mukyahtiʼc tulácal, cu paʼtiʼc tulácal, cu páʼtiʼc tulácal, cu chucpahal u yól tiʼ tulácal.

46 Le betiʼc túneʼ in sucuʼuneʼex in yacunmaʼheʼex wá minaʼan teʼex yacunaheʼ, minaʼaneʼex, tumen le yacunahoʼ mix bikin cu xuʼulul. Nadzabaeʼex tún tiʼ le yacunahoʼ tumen letiʼ u maʼs nohochil tiʼ tulácal; tumen tulácal baʼaleʼ yan u xuʼulul tánil tiʼ!

47 Baʼaleʼ le yacunahoʼ letiʼ u hach hadzuts puro yacunah Cristo, letiʼeʼ maʼntadz bín anac; tiʼ le maʼx cu yantaloʼ tu dzoc kin maʼalob anil letiʼ.

48 Le betiʼc túneʼ in sucuʼuneʼex orarneneʼex tiʼ le Tata yétel tulácal yól a pucsiʼkaleʼexoʼ ca chupuqueʼex yétel le yacunah tu dzah tiʼ le hahil maʼcoʼob cu bín tu pach Jesucristo u Paloʼ; ca kuchuqueʼex a beytaleʼex u palal Hahal Dios; le quen chicpahac letiʼeʼ ca beyacoʼon heʼebix letiʼoʼ; tumen bín c il hach heʼebixoʼ; ca patacoʼon yantal toʼon u pahtalil ca pʼatiʼcoʼob hach saquiʼl heʼebix saquiʼl letiʼ puro heʼebix letiʼ puro. Ca beyac.