1 In pal, yabiltmaʼh quiʼn caʼa dzíb tiʼ tech tu yoʼolal a wohéltiʼc lailiʼ cuxaʼaneneʼ; baʼaleʼ tán in dzíbtiʼc humpʼél yayah ólal baʼal.

2 Tumen heʼel túnaʼ dzoʼoc u yantal ten humpʼél nohoch baʼatel yétel le u palal Lamanoʼ, le heʼeloʼ maʼ t náhaltiʼ, Arcanteo túneʼ dzoʼoc u lúbul yoʼolal tadz maʼscab xan Luram yétel Emron; lailiʼ, yétel dzoʼoc u saʼataal tiʼ toʼon yaʼabil c maʼcoʼob tiʼ u maʼs maʼalobiʼl le yan toʼonoʼ.

3 Teneʼ, in pal, sahaquen ca xuʼ ulsaʼac le maʼcoʼobaʼ tumen le u palal Lamanoʼ, tumen maʼ cu kexic u yóloʼobeʼ, Satanaseʼ maʼntadz tán u betiʼc u pʼuʼuhuloʼob ichiloʼob.

4 Heʼel tunaʼ maʼntadz tán in wáʼalicoʼob, le quen in wáʼal u tʼan Hahal Dios yétel mukeʼ tʼanoʼobeʼ, ca quiʼquiʼlanquiʼloʼob yétel cu pʼuʼuhuloʼob tiʼ ten; wá maʼ tán in tʼaniqueʼex yétel muk tʼaneʼ cu mentiʼc chich u pucsiʼkaloʼob tu tánil le tʼanoʼ, le oʼolaleʼ in sahchahquen u Pixan Yumtsileʼ dzoʼoc u xuʼulul u yantal yételoʼob.

5 Tumen tiʼ hach nohochil u kuxileʼ in wiliqueʼ maʼ sahacoʼob tiʼ le químiloʼ, yételeʼ huntúl tiʼ úlakeʼ dzoʼoc u satiʼc u yacunahoʼob; yételeʼ maʼntadz caʼa u weʼecoʼob kík yétel u caʼa baʼateloʼob.

6 Beʼoraʼ in pal in yacunah, coʼox meyah yétel chucaʼan oʼolal quex sen chichtac u pucsiʼkaloʼob, tumen wá c xulic c meyaheʼ c lúbul tiʼ condenacion. Tumen yan humpʼél meyah kabét c betiʼc caʼaliquiʼl yanoʼon tiʼ le wínclilil bakilaʼ mentaan yétel kata, u kát yaʼaleʼ c wínclilal, tu yoʼolal u páhtal c dzancheʼetiʼc u énemigoil tulácal justiʼcia, yétel c pixanoʼobeʼ ca u caxantoʼob heʼeleʼl tu reinoil Hahal Dios.

7 Behlaʼ túneʼ quiʼn dzíbtiʼc dzeʼedzec baʼaloʼob yoʼolal le otsil baʼal le cahaʼ, tumen heʼebix u yaʼalic le tʼanoʼob dzoʼoc in kamic tu túxtah ten Amoronoʼ, heʼel túnaʼ le u palal Laman yan yaʼabach maʼcoʼob tu chucahoʼob tu torreil Xerriza, le cu dzoʼocoleʼ yan xíboʼob, coʼoleloʼob yétel meheʼn palal ichiloʼob.

8 Dzoʼoc xan u quínsicoʼob u tataoʼob le meheʼn palaloʼoboʼ yétel u yícham le coʼoleloʼoboʼ, le coʼoleloʼob cu dzaʼabal u hantoʼob u bakel u yíchamoʼob; tiʼ le meheʼn palaloʼoboʼ u bakel u tataoʼob cu dzaʼabal u hantoʼob; chén chanpʼít haʼ cu dzaʼabal tiʼoʼob.

9 Chén baʼaleʼ le u hach nohoch keban le u palal Lamanaʼ, maʼ maʼs kas tiʼ le utiaʼal c láktsiloʼob c cahal tu cahil Moriantumoʼ. Tumen heʼel túnaʼ yaʼab tiʼ u yaʼabach xchʼupaloʼob le u palal Laman h lúboʼob tu kaboʼob; cu dzoʼocol u luksic tiʼoʼob le baʼax maʼs coʼoh yétel maʼs hadzuts tiʼ tulácal baʼaloʼoboʼ, leloʼ u sublaquiʼl yétel tu betoʼob keban yétel u wíncliloʼob.

10 Beyoʼ, cu dzoʼocol u betiʼcoʼob lelaʼ, ca tu quínsahoʼob yétel humpʼél hach yayah químil, tu betahoʼob lob tiʼoʼob, huhumpʼítiʼl úchic u kuchul le químiloʼoboʼ, cu dzoʼocol u betiʼcoʼob lelaʼ ca tu hantahoʼob u bakeloʼob, bey káxil baʼalcheʼoʼobeʼ, tu yoʼolal tún u mentiʼc chichil u pucsiʼkaloʼob; leloʼ cu betiʼcoʼob bey utiaʼal cu yeʼesaʼal mukeʼ.

11 In pal in yacunah bix u páhtal humpʼél cahal, heʼebix lelaʼ, minaʼan u naʼatiʼl tiʼ;

12 (Maʼ sám úchiqueʼ, humpʼél cah cu quiʼmaʼc yól yétel cambalnahaʼan.)

13 In, pal bix u páhtal humpʼél cah heʼebix lelaʼ, cu quiʼmaʼcchahal u yól tiʼ le sen nucuch kebanoʼobaʼ;

14 Bix heʼel u páhtal maʼ c páʼtiʼc u líksic u kab Hahal Dios utiaʼal u juzgartiʼcoʼoneʼ?

15 Heʼel túnaʼ in pucsiʼkaleʼ cu yáwát: Yan ótsil tiʼ le cahaʼ! Hóken a Hahal Dios juzgartiʼcoʼob, yétel taac u kebanoʼob, u kasaʼaniloʼob yétel le baʼaloʼob u sen kastac ta tánil!

16 Bey xaneʼ in yabilah pal, yaʼab coʼoleloʼob minaʼan u yichamoʼob yétel u xchʼupul palaloʼob cu pʼatal Xerriza; le baʼaloʼob utiaʼal hantbil maʼ tu bisah le u palal Lamanoʼ, heʼel túnaʼ, u baʼatel maʼquiʼloʼob Zeniff hbiseʼh, ca tu u pʼatoʼob heʼtuʼuxac u pʼahtal u caxtiʼcoʼob baʼax utiaʼal hantoʼob chén bey u maʼnoʼob minaʼan yichil u xactoʼob wáʼ baʼax u hantoʼoboʼ; yaʼab chʼíhaʼan coʼoleloʼobeʼ u xuʼupul yikoʼobeʼ le behoʼ ca cu lúbuloʼob teʼ behoʼ cu quíʼmiloʼob.

17 Le tún maʼcoʼob cu baʼatel yan tiʼn wételoʼ minaʼan u muk; le maʼcoʼob yanoʼob yétel le u palal Lamanoʼ u hatscuntmaʼheʼnoʼob tiʼ Xerriza; heʼel bucaʼah h maʼn ichil u maʼcoʼob tun baʼatel yétel Aaroneʼ láh quiʼnsaʼaboʼob yoʼolal u hach kasaʼanil le maʼcoʼoboʼ.

18 Le lubaʼanil sén kasaʼan h lub in cahal tiʼ kebanoʼ! Minaʼan u ley mix cu chʼaʼabal ótsilil tiʼoʼob. Heʼel túnaʼ, teneʼ chén huntúl maʼquen, in mukeʼ hach chén le muk huntúl maʼqueʼ yételeʼ maʼ tán u páhtal in betiʼc u betaal baʼax quiʼn wáʼalic.

19 Letiʼoʼobeʼ dzoʼoc u maʼs yaʼabcunsic u kasaʼaniloʼob, ichil u hach kakas baʼaliloʼobeʼ u yoʼolal ichiloʼob, maʼ tán u chʼaʼabal mix humpʼít ótsilil tiʼ mixmaʼc; mix tanquelenoʼob mix chʼíhaʼanoʼob, yétel cu quiʼmaʼcchahal u yóloʼob tiʼ tulácal, baʼaloʼob kas tiʼ le maʼalob baʼaloʼoboʼ maʼ; le coʼoleloʼob yétel c palaloʼob cu mukyahtiʼcoʼob maʼs tiʼ tulácal baʼal, mix cu páhtal u yaʼalic, mix tán u páhtal u dzíbtaal.

20 Baʼaleʼ heʼel túnaʼ, in pal, maʼ tán in dzíbtiʼc maʼs le baʼaloʼobaʼ. Dzoʼoc a kahóltiʼc u kasaʼanil le cahaʼ; a woheʼl minaʼan utsil caʼansahil tiʼoʼob, mix u quiʼmaʼc ólaloʼ yétel mixbaʼal; u kebanoʼobeʼ maʼs yaʼab tiʼ le u palal Lamanoʼ.

21 Heʼel túnaʼ in pal, maʼ hach in kát in kubentoʼob tiʼ Hahal Diosiʼ, tumen sahaquen u dzic lob ten.

22 Baʼaleʼ heʼel túnaʼ in pal, quiʼn kubentiʼquech tiʼ Hahal Dios yétel yan ten confianza tiʼ Cristo letiʼ bín u salvartiʼquech; quiʼn kát tiʼ Hahal Dios ca u canánt a cuxtal tu yoʼolal a betiʼcaba bey humpʼél hahil tʼan, tumen teneʼ ca wilic ca sunacoʼob tiʼ letiʼ wá yan u láh químiloʼob, haʼali wá maʼ ca kexic yóliʼ yan u xuʼulsaʼaloʼob.

23 Wá xan cu químiloʼob, bey heʼebix químic le u palal Jared, yoʼolal u hach kasaʼanil u pucsiʼkaloʼobeʼ, cu caxtiʼcoʼob kiʼik yétel venganza; wá bey túnoʼ, bín químicoʼob.

24 C oheʼl yaʼab tiʼ c sucuʼunoʼobeʼ dzoʼoc u maʼnoʼob tu tsél le u palal Lamanoʼ, yétel c oheʼl xaneʼ yaʼab tiʼ letiʼoʼob bín pʼatiʼcoʼob ichiloʼobiʼ. Dzíbt tun, ulak humpʼít tʼan, wá quiʼn químil yétel maʼ in caʼa iliquecheʼ, baʼa i leʼ quiʼn wuʼuyiquiʼmba séb in caʼa iliquech, tumen yan ten le sagrado historia dzíbtaan quen in kub tech.

25 In pal, ca anac fe teʼ Cristo; maʼ ta wuʼuyaba ótsii a wól tu yoʼolal le baʼax dzoʼoc in dzíbtiʼc techoʼ, utiaʼal tac ca u quiʼmech; baʼaleʼca liksic a wól tumen Cristo, u mukyahoʼob yétel u químil, cu yeʼesic caʼach u wínclil tiʼ c tatáoʼob cu chʼaʼ ótsilil, ca paʼtiʼc ca anac tech le cuxtal minaʼan u xul, ca pʼátac ta tucul tech maʼntadz.

26 Ca xiʼic ta wétel maʼntadz u gracia Hahal Dios, le Tataoʼ, maʼx teʼ caʼanoʼob tyaʼan tu tronooʼ, yétel u gracia c Yumtsil Jesucristo, maʼx cu cutal tu xnoʼoh kab u páhtalil Hahal Dios tac le kin quen anac tulácal baʼal yánal u páhtalileʼ. Ca beyac.