1 Carta tu tuxtah in tata Mormon, ten tu dzíbtah ten humpʼít kin cu dzoʼocol u kátaal ten in meyahtiʼc Cristo; ca tu dzíbtah ten tán u yaʼalic:

2 In pal in yabilah Moroni cu hach quiʼmaʼctal in wól tumen a Yumtsil Jesucristoeʼ dzoʼoc a kaʼahsic tech yétel dzoʼoc u tʼaniquech utiaʼal u meyah tu yoʼolal le sagrado meyhil.

3 Teneʼ maʼntadz quiʼn kaʼahsiquech tiʼn oracionoʼob, quiʼn kátiʼc maʼntadz tiʼ Hahal Dios le Tataoʼ, tu kabaʼ u pal, Jesus, tumen yoʼolal yutsil minaʼan u xul yétel yacunah leʼ ca u canántech maʼntadz tiʼ le fe tu kabaʼ tac minaʼan u xuloʼ.

4 Behlaeʼ in pal in yabiltmaʼh bín in caʼah in wáʼal tech wá baʼax yoʼolal le baʼax etsilquiʼnsiquen in wóloʼ, tumen hach cu tasic yayah ólal in wól in wilic u chicpahal baʼatel tʼanoʼob ichileʼex.

5 Tumen wá dzoʼoc in wohéltiʼc u hahileʼ, dzoʼoc u yantal baʼatel tʼanoʼob ichileʼex yoʼolal dzaʼabal u yoc ha a palaleʼex meheʼntacoʼob.

6 In pal in kát ca meyahnaquech yétel tulácal a wól yoʼolal a lukesic ichileʼex le baʼal hach kasoʼ; tumen letiʼ le oʼolal quiʼn dzíbtiʼc tech le cartaaʼ.

7 Tumen hach le cah dzoʼoc in wohéltiʼc le baʼaloʼob ta woʼolaleʼexaʼ, tiʼn kátah tiʼ Yumtsil yoʼolal le baʼalaʼ. Ca tún h tal u tʼan Yumtsil tiʼ ten yoʼolal le Pixan u túxtiʼc Diosoʼ tán u yaʼalic;

8 Uuy u tʼanoʼob Cristo, le maʼx cu luksic tulácal u kebanoʼob yókolcab a Yumtsil yétel a Dios. Heʼel túnaʼ, maʼ h talen yókolcab in tʼanic le justoʼob ca kexic u yóloʼob baʼaleʼ le maʼc cu mentiʼc kebanoʼ maʼcoʼob toh yóloʼoboʼ maʼ kabét doctor tiʼoʼobiʼ, baʼaleʼ le maʼcoʼob kohaʼantacoʼoboʼ; le betiʼque, le meheʼn palaloʼoboʼ chucaʼanoʼob, tumen maʼ tán u páhtal u betiʼc kebanoʼob; bey túnoʼ u keban Adaneʼ dzoʼoc u luksaʼal tiʼoʼob tiʼn woʼolal ten, le oʼolaleʼ minaʼan páhtalil tiʼ yókoloʼob; le tún u leyil dzoʼoc u luksaʼal tiʼ ten.

9 Bey tún úchic u yeʼesic ten le Pixan cu túxtiʼc Dios u tʼan Hahal Diosaʼ, le beyoʼ in pal in yabiltmaʼh in woheʼl lelaʼ humpʼél nohoch kakas cheʼch u pacat Hahal Dios u dzaʼabel u yoc haʼ meheʼn palaloʼob.

10 Heʼel túnaʼ, quiʼn wáʼalic techeʼ, lelaʼ letiʼ le baʼax quen a caʼansaʼ; ca kexic u yól yétel le baʼax cu betiʼc yétel oc haʼ tiʼ le maʼxoʼob cu páhtal u betiʼcoʼob kebanoʼob beyoʼ caʼanseʼex le tataoʼob ca kexaʼac u tuculoʼoboʼ yétel le baʼax cu betiʼcoʼob xanoʼ ca oc haʼnacoʼob, ca bisicuba tu bel bey meheʼn palaloʼob, ca u kaʼamaʼl tún le cuxtal minaʼan u xul yétel Hahal Dios yétel u meheʼn palaloʼob.

11 U Meheʼn palaloʼobeʼ maʼ kabét ca kexic in yóloʼobiʼ, mix le oc haʼoʼ. Heʼel túnaʼ le oc haʼoʼ utiaʼal le maʼc u kexmaʼh u yólil tu yoʼolal u betiʼc le tʼan u dzamaʼhoʼ ca anac cu boʼotaal le kebanoʼ.

12 Baʼaleʼ le meheʼn palaloʼ tiʼ Cristo cuxaʼanoʼob desde cah betaab yokolcab wá maʼ beyiʼ, Hahal Dioseʼ maʼ tún justoiʼ, huntúl Dios cu kexpahal, maʼ igual u yacunah utiaʼal tulácal maʼc; tumen bucaʼah meheʼn palal quiʼmenoʼob maʼ dzaʼabaʼan tiʼoʼob yoc haʼ!

13 Wá le meheʼn palaloʼob maʼ u páhtal u caʼa cuxtal yétel Hahal Dios wá maʼ cu kamicoʼob le oc haʼoʼ yan u binoʼob tiʼiʼ ehoʼchʼeʼenil minaʼan u xul.

14 Heʼel túnaʼ quiʼn wáʼalic techeʼ, le maʼx cu tucultiʼc kabét ca dzaʼabac yoc haʼ tiʼ le meheʼn palaloʼoboʼ, tiʼ hach káhil yan yétel tiʼ u kaxbil keban; tumen minaʼan u fe, mix cu paʼtiʼc, mix yan yacunah; le oʼolal túneʼ, yan u chaʼabal tiʼ mientras bey tán u tuclicoʼ, yan u kuchul tiʼ u tuʼuxil quiʼsin.

15 Tumen hach sen kas u tucultaal cu salvartiʼc huntúl chanpal tumen Hahal Dios yoʼolal le oc haʼoʼ, caʼaliquiʼl u yanal cun químil tumen maʼ tu kamaʼhiʼ.

16 Yan ótsil tiʼ le maʼxoʼob bey cu kascuntiʼcoʼob u bel Yumtsilaʼ! Tumen bín químicoʼob wá maʼ tán u kex cu yóloʼob. Heʼel tunaʼ, quiʼn tʼan xmaʼ sahaquiʼl, tumen yan ten u páhtalil Hahal Dios, yétel maʼ tán in chʼaʼic sahaquiʼl tiʼ baʼax u betiʼc maʼc, tumen le hach maʼalob yacunahoʼ cu hóksic tulácal sahaquiʼl.

17 Quin hach uʼuyiquiʼmba chupen yétel yacunah, yacunah minaʼan u xul; le oʼolaleʼ, tulácal le meheʼn palaloʼoboʼ igualoʼob intiʼaʼal tiʼn tán, le oʼolal túneʼ in yabiltiʼc le meheʼn palaloʼob yétel humpʼél yacunah hach tohoʼ; tulácaloʼob igualoʼob yétel cu kamicoʼob le cuxtal yétel Hahal Dios minaʼan u xuloʼ.

18 Tumen teneʼ in woheʼleʼ, Hahal Dioseʼ maʼ huntúl Dios maʼjustoiʼ, mix xan tán u heʼlpahal; baʼaleʼ maʼatech u kexpahal, tiʼ kinoʼob minaʼan u xul.

19 Le meheʼn palaloʼoboʼ maʼ tán u pahtal u kexic u yóloʼob le betiʼqueʼ nohoch keban maʼ u chaʼabal tiʼoʼob u yacunah tu hahil Hahal Dios tumen tulácaloʼob yan cultaloʼob tiʼ letiʼ tumen cu láh cuxaʼantacoʼob tu yoʼolal cu chʼaic ótsilil tiʼoʼob.

20 Le maʼxoʼob xan aʼalic kabét ca dzaʼabac u yoc haʼ tiʼ le meheʼn palaloʼoboʼ cu yaʼalic Cristo maʼ cu chʼaʼic ótsilil tiʼoʼob yétel minaʼan u páhtalil uytaal cu luksic keban tiʼ letiʼoʼob.

21 Yan ótsil tiʼ le heʼeloʼobaʼ, tumen aniloʼob ich baʼal kas utiaʼal u químiloʼob tuʼuxoʼ químil yanoʼob, mukyahil yétel mukyah minaʼan u xul! maʼXʼ sahaquiʼl in wáʼalic, tumen Hahal Dios dzoʼoc u dzic ten maʼndamiento; Uuy le tʼanoʼobaʼ ca a beteʼ, wá maʼeʼ bín u tʼan ta contra tu tánil u cúchil juicio tumen Cristo.

22 Tumen heʼel túnaʼ, tulácal le meheʼn palaloʼoboʼ tiʼ Cristo cuxaʼanoʼob heʼebix xan tulácal le maʼxoʼob maʼ tu yánal le ley yanoʼoboʼ. Tumen u páhtalil cu luʼsaʼal le kebanoʼob utiaʼal tulácal le maʼxoʼob aniloʼob maʼ yánal le leyoʼ; le betiʼqueʼ, le maʼx maʼ condenartaaque, wá le maʼx minaʼan yánal le condenacionoʼ, maʼ tu páhtal u kexic yól tucul, xan le baʼax cu betiʼcoʼ le maʼc xanoʼ mixbaʼal u belal oc haʼ tiʼ.

23 Yaxeʼ humpʼél kakas cheʼehil Hahal Dios, tumen cu yaʼalicoʼob tu contra Cristo ca u chʼa ótsil, yétel u páhtalil u Pixan, yétel cu dzicubaoʼob tiʼ meyah químentacoʼob.

24 Heʼel túnaʼ in pal, lelaʼ maʼ maʼalobiʼ tumen kabét u kexic u yóloʼob le maʼxoʼob yanoʼob yánal le condenacionoʼ yétel yánal u kasaʼanil humpʼél ley maʼ betaan baʼax cu yaʼaliquiʼ.

25 U yáx u yich cu kexicoʼob maʼc u yóleʼ letiʼ le oc haʼoʼ, le oc ha xanoʼ cu tal yoʼolal fe utiaʼal u betaal le maʼndamientoʼoboʼ, le xan u betaal le maʼndamientoʼob cu betiʼc ca u luʼsaʼal u kebanoʼob tiʼ maʼc.

26 Wá cu luʼsaʼal u keban maʼqueʼ heʼel cu betiʼcuba humilde yétel cu kubic u pucsiʼkaloʼ, yétel xan tumen humilde yétel dzoʼoc u kubic tiʼ Yumtsil u pucsiʼkaloʼ cu tal le Pixan cu túxtiʼc Dios xímbat maʼc, le Pixanoʼ letiʼ le cu quiʼmaʼccunsic yóloʼ, cu chupic maʼc yétel páhtalil yétel xan hach nohoch yacunah, humpʼél yacunah cu pʼátal yoʼolal u chucaʼaniʼl yól maʼc tiʼ oracion, tac le quen talac u xul, le tún quen cahlac tulácal maʼalobtac maʼcoʼob yétel Hahal Dios.

27 Heʼel túnaʼ in pal, yan in caʼa dzíb tiʼ tech wá maʼ séb binen tu contra le u palal Lamanoʼ. Heʼel túnaʼ u caʼanal yichoʼob le cahaʼ in kát in wáʼaleʼ u cahil Nefiaʼ bín u bet u tal u xul yókol wá maʼ tán u kexic yól u tucul yétel le baʼax cu betiʼcoʼob.

28 Ca kátiʼc tu yoʼolaloʼob, in pal, yoʼolal u yantal tucul, tiʼoʼoboʼ cu kex yóloʼob ubaoʼob heʼel túnaʼ, teneʼ hach bey in wól dzoʼoc u xuʼulul u meyah le Pixan yételoʼoboʼ; tiʼ le un hats le luʼumaʼ tán u xuʼulsicoʼob tulácal páhtalil cu tal tiʼ Hahal Dios; yétel tán u tʼanoʼob tu contra le Pixan cu túxtiʼc Diosoʼ.

29 Cu dzoʼocol u yaʼalicoʼob maʼ u kát u betoʼob le sen nohoch caʼansahiloʼob u yoheʼloʼob hach hahtacoʼobeʼ, in pal, séb cun químiloʼob yoʼolal u yúchul le baʼaxoʼob u yaʼalmaʼhoʼob le profetaoʼoboʼ, heʼebix xan le baʼaxoʼob u yaʼalmaʼh le Salvador mismo.

30 Tulak kin in pal, hasta quen caʼa dzíbnaquen techeʼ, wá le quen in caʼa ilech. Ca beyac.