1 Cunan ñuca, Moroni, quilcani ñuca taitapaj Mormón huaquin shimicunata, imata pai parlarca femanda, shuyaimanda, caridadmandapash; imashpa cashna laya llactapuracunaman pai parlarca, imashna paicunaman yachachirca tandanajuna huasipi imata paicuna huasichirca adorangapaj pushtuta.

2 Cunan ñuca, Mormón, cangunaman parlani, ñuca juyashca huauquicuna; cai can Dios Taitapaj ninan juyaimanda, ñucanchi Apunchij Jesucristo, paipaj achil munai, cayangapaj donmanda imata ñucaman rurarca, ñuca cangunaman cai punlla parlachun saquihuan.

3 Chaimanda, ñuca cangunaman iglesiapaj cajcuna parlangapa munani, sumaj causaj Cristopaj catijcuna cashpa, chasquishca cashpapash minishtirishca shuyaita imahuan yaicui ushanguichi Apunchijpaj samanaman, cunan punllamanda chaiman imaura canguna samangacaman paihuan jahua pachapi.

4 Cunan ñuca huauquicuna, ñuca ricushpa chasquichini cai cuzascunata cangunapaj sumaj causaimanda runacunapaj huahuacunahuan.

5 Ñuca yarini Diospaj shimita imata nin paicunapaj ruraicunamanda paicuna rijsi tucushca canga; paicunapaj ruraicuna ali cajpica, shinaca paicunapash alicuna canga.

6 Riqui, Dios nishca can shuj runa na ali cashpa na rurai ushanllu ima ali cajta; pai shuj ofrendata cujpi, mascashpa Diosta achil mañajpi, imashpapash munashpapacha caita rurashpalla, na shina cashpaca nimapash na ali paipa canga.

7 Riqui, cai na yupashca cangachu paiman ali ruranapi.

8 Riqui, shuj runa na ali cashpa shuj ofrendata caran, na munashpata ruran; chaimanda caica na cushcashnallata yupashca can; chaimanda na alipi yupashca can Diospaj ñaupapi.

9 Shinallata na alipi yupashca can shuj runa, pai achil mañajpi na shungumanda munashcapacha cajpi; ari, nimapash na ali paipa canga, Dios na chasquin nimaijan cashna cajta.

10 Chaimanda, shuj runa na ali cashpa alita na rurai ushanllu; ali ofrendatapash na carai ushan.

11 Riqui, shuj jaya pujyu ali yacuta na carai ushanllu; shuj ali pujyupash jaya yacuta na carai ushanllu; chaimanda, shuj ayapaj shuj sirvij runa cashpaca na Cristota cati ushanllu; Cristota catij cashpaca na ayata sirvij cai ushanllu.

12 Chaimanda, tucui cuzascuna imacuna ali can Diosmanda shamun; imacuna na ali can ayapamanda shamun; ayaca Diosta napacha na ricunayachij can, punllan punllan paihuan macanajujun, cumbidanbash, tangachinbash juchata rurachun, ima na alita punllan punllan rurachun.

13 Ashtahuangari riqui, imami Diospaj can cumbidan, tangachinbash alita punllan punllan rurachun; chaimanda, tucui cuzas cumbidan, tangachin alita rurachun, Diosta juyachun, paita sirvichun, Diospaj ruraipacha nishca can.

14 Chaimanda, cuidarichi, ñuca juyashca huauquicuna, ama ricushpa chasquichi ima na ali Diospaj cachun, nacashpa ima ali Diospaj cajpash ayapaj cachun.

15 Riqui, ñuca huauquicuna, cangunaman cushca can ricushpa chasquinata, canguna ajllachun alita na alimanda; imashna ricushpa chasquina can punchapamba, canguna yachai ushanguichi shuj alipacha yachaihuan, imashna punllapaj micha can tutapaj yanamanda.

16 Riqui, Cristopaj Espíritu cushca can shujllangaman runacunata ricushpa chasquichun, ajllachun alita na alimanda; chaimanda, ñuca cangunaman ricuchini imashna ricushpa chasquinata; tucui cuzas imami cumbidan alita rurachun, tangachin Cristopi crichun, cachamushca can Cristopaj ushaihuan, donhuanbash; chaimanda canguna yachanguichi shuj alipacha yachaihuan cai Diospaj cajta.

17 Ashtahuangari ima cuzas runacunata tangachin na alita rurachun, na Cristopi crichij, paita negan, Diosta na sirvin, shina canguna yachanguichi shuj alipacha yachaihuan cai ayapaj cajta; cashna laya ruran ayapaj ruraita; imashpa pai tangachin maijan runapash alita ama rurachun, na, shujllatapash na; paipaj ángelcunapash na; paicunapaj mandaipi cajcunapash na.

18 Cunan, ñuca huauquicuna, ricushpa yachaimanda michata imashna ricushpa chasquichinata, imami micha can Cristopaj micha, ricui pandata ama ricushpa chasquichingui; imashpa chai ricushpa chasquichinahuanllata imahuan canguna ricushpa chasquichingui cangunapash ricushpa chasquichishca canguichi.

19 Chaimanda, ñuca cangunata mañani, huauquicuna, mascaichi utsialla Cristopaj michapi canguna ajllai ushachun alita na alimanda; canguna tucui ali cuzaspi charirijpica, na na alichijpipash, ciertopacha Cristopaj huahuacuna canguichi.

20 Cunan, ñuca huauquicuna, imashnata cai can canguna chariri ushanguichi tucui ali cuzascunapi?

21 Cunan ñuca parlasha fe, imamanda parlashami nircani; ñuca villasha cangunaman imashna canguna chariri ushanguichi tucui ali cuzascunapi.

22 Riqui, Dios yachashpa tucui cuzascunata, cashpa mana tucurinamanda mana tucurinacaman, riqui, pai cachamurca ángelcunata yachachingapa runacunapaj huahuacunaman, ricuchingapa Cristopaj shamunamanda; Cristopi shamuriana tucui ali cuzascuna.

23 Diospash villarca achil villachijcunaman, paipaj propio shimihuan, Cristo shamunata.

24 Riqui, tucui laya ricuchirca cuzascunata runacunapaj huahuacunaman, imacuna ali carca; tucui cuzascuna imacuna ali can Cristomanda shamun; na shina cashpa runacuna urmashca carca, nima ali cuzascuna na shamunman carca.

25 Chaimanda, ángelcunapaj yachachimanda, tucui shimi ima Diospaj shimimanda llujshijpi, runacuna callarirca Cristopi feta charingapa; shina femanda, paicuna tucui ali cuzaspi charirirca; shina cai carca imaura Cristo shamungacaman.

26 Shamushca jipa runacunapash quishpirishca carca femanda paipaj shutipi; femanda, Diospaj churicunaman tigrarca. Shina ciertopacha imashna Cristo causan pai parlarca cai shimicunata ñucanchi taitacunaman, nishpa: Ima cuzasta mañangui Taitata ñuca shutipi, imami ali can, fepi crishpa canguna chasquinguichi, riqui, cai cangunaman cushca canga.

27 Chaimanda, ñuca juyashca huauquicuna, saquirishcachu juyailla ruraita ricuchinacuna Cristo jahua pachaman vitsiashcamanda, tiarishcapash Diospaj ali ladopi, cuhuai ningapa Taitata shungumanda llaquinapaj paipaj cashcacunata imata pai charin runacunapaj huahuacunapa jahuapi?

28 Pai pactachishca tucui catichunbacha saquishcacunata, cuhuai nin tucui maijan paipi feta charishcacunata; paicuna maijan feta paipi charin tucui ali cuzaspi chariringa; chaimanda pai shayarin runacunapaj huahuacunamanda; pai causan mana tucurinacaman jahua pachacunapi.

29 Pai caita ruraimanda, ñuca juyashca huauquicuna, juyailla ruraita ricuchinacuna saquirishca? Riqui, ñuca cangunaman nini, Na, ángelcunapash na yachachita saquishcachu runacunapaj huahuacunaman.

30 Riqui, paicuna paipaj mandaipi can, yachachinata rurangapa imashna paipaj mandashca shimita, ricuchishpa paicunaman shinlli feta, na cuyurij yuyai tucui laya achilcaipi.

31 Paicunapaj yachachina oficio can runacunata cayana arrepentimientopa, pactachina, ruranapash Taitapaj conveniocunata, imata pai rurashca runacunapaj huahuacunaman, ñanda alichingapa runacunapaj huahuacunaman, villashpa Cristopaj shimita Apunchijpaj ajllashca vasocunaman, paimanda testimoniota cuchun.

32 Shina rurashpa, Apunchij Dios ñanda preparan puchushca runacuna Cristopi feta charichun, Espíritu Santo paicunapaj shungucunapi pushtuta chari ushachun, paipaj ushaimanda; cashna laya Taita yalichun apamurca, conveniocunata imata pai rurarca runacunapaj huahuacunaman.

33 Cristo nirca: Canguna ñucapi feta charijpica charinguichimi ushaita ima cuzastapash rurangapa ñucapi minishtirishca cajpi.

34 Pai nirca: Arrepentirichi tucui alpa tucurinacaman, ñucapaman shamuichi, ñuca shutipi bautizarichi, ñuca shutipi feta charishpa, quishpirishca canguichi.

35 Cunan, ñuca juyashca huauquicuna, shina cai cajpica cai cuzascuna ciertopacha can imata ñuca cangunaman parlashcani, Dios cangunaman ricuchinga, ushaihuan, jatun punchapambahuan chai tucuri punllapi, caicuna ciertopacha can, caicuna ciertopacha cajpica juyailla ruraita ricuchinacunapaj punlla saquirishca?

36 Nacashpa ángelcuna saquirishcachu runacunapaj huahuacunapaman ricurita? Nacashpaca pai jarcashcachu Espíritu Santopaj ushaita? Nacashpa rurangacha, shina punlla catijpira, nacashpa alpa tiajpira, nacashpa tiajpira shuj runa alpa jahuallapi quishpichingapa?

37 Riqui ñuca cangunaman nini, Na; cai can femanda juyailla ruraita ricuchinacuna apamushca can; cai can femanda ángelcuna ricurin, achil yachachin runacunaman; chaimanda, cai cuzascuna saquirishca cajpica ay runacunapaj huahuacuna; cai can na crimanda, tucui yanga can.

38 Pi runapash na quishpirishca cai ushan, Cristopaj shimicunamanda, imashpapash feta charingapashchari paipaj shutipi; chaimanda, cai cuzascuna saquirishca cajpica, shina fepash saquirishca canman; manllanayai can runapaj canacai, nima jatun causachina na rurashcashna canmi.

39 Ashtahuangari riqui, ñuca juyashca huauquicuna, ñuca ricushpa chasquichini ashtahuan ali cuzascunata cangunaman, ñuca ricushpa chasquichini, imashpa canguna Cristopi feta charinguichi cangunapaj mansedumbremanda; paipi feta na charishpaca shina canguna na digno canguichi yupashca cangapa paipaj iglesiapaj llactapuracunahuan.

40 Cutin, ñuca juyashca huauquicuna, ñuca parlani shuyaimanda cangunaman. Imashna canguna feta chari ushanguichi, imashpapash shuyaita na charishpa?

41 Imatata shuyana canguichi? Riqui ñuca nini cangunaman, charina canguichi shuyaita Cristopaj shujpa juchamanda huañushcamanda, ushai paipaj cutin causarinamanda, jatarishca cana mana tucuri causaipa, cai paipi cangunapaj feta charimanda nishcapachamanda.

42 Chaimanda, shuj feta charijpica pai minishtin shuyaita charina; fe illa nima shuyai na tiai ushan.

43 Cutin, riqui ñuca nini cangunaman pai na feta chari ushan, shuyaitapash, imashpapash manso cashpa, shungumanda humilde cashpalla.

44 Shina cashpa, paipaj fe, shuyaipash yanga can, nima na chasquishca can Diospaj ñaupapi, imashpapash manso, shungupi humilde cashpa; shuj runa manso cashpa, shungupi humilde cashpa, villajpi Espíritu Santopaj ushaihuan Jesús Cristo cajta, pai minishtinbacha caridadta charina; na caridadta charishpaca pai nima na can; chaimanda minishtinbacha caridadta charina.

45 Caridadca llaqui yalina can, ali can, na shujpata cushcanman yan, na jariyan, paipallata na mascan, na ñapash fiñan, na yuyan na alita, na cushijun na ali ruraicunapi ashtahuangari cushijun ciertopachapi, tucui cuzascunata llaqui yalin, tucui cuzascunata crin, tucui cuzascunata shuyan, tucui cuzascunata ahuantan.

46 Chaimanda, ñuca juyashca huauquicuna, canguna na caridadta charishpaca, canguna nima na canguichi, caridad nimaura na saquirin. Chaimanda, quimirichi caridadman, imami can tucuimanda yali jatun, imashpa tucui cuzascuna tucuri ushan—

47 Ashtahuangari caridad can Cristopaj alipacha juyai, cai tian mana tucurinacaman; maijan caita charij chai tucuri punllapi, cai ali canga paihuan.

48 Chaimanda, ñuca juyashca huauquicuna, achil mañai Taitata tucui shungu ushaihuanbacha, canguna jundashca canguichi cai juyaihuan, imata pai cushca tucui maijan ciertopacha paipaj Churi, Jesucristopaj catijcunaman; Diospaj churicunaman tigranguichi; imaura pai ricurimujpi ñucanchi paishnalla cangapa, imashpa ñucanchi ricushunchi pai imashna cajta; ñucanchi cai shuyaita charishpa; ñucanchi mapa illacuna cai ushangapa imashna pai mapa illa can shina. Shinacapashcachun.