1 Ñuca taita Mormónpaj shuj cartata, ñuca, Moroniman quilcahuarca, cai quilcashca carca ñucaman, ñuca achil yachachingapa cayashca jipalla. Cai laya pai quilcahuarca, nishpa:

2 Ñuca juyashca churi, Moroni, ñuca ninanda cushijuni canba Apunchij Jesucristo quiquinda yuyaipi charishcamanda, paipaj achil yachachinaman cayashcamanda, paipaj achil ruraiman.

3 Ñuca quiquinda punllan punllan yuyaipi charini ñuca achil mañaicunapi, catilla Dios Taitata achil mañani paipaj Achil Churi, Jesúspaj shutipi, pai, paipaj mana tucurita chari ali caipi, ninan juyaipash, canda huacaichipachun fehuan catiriaihuan tucurinacaman paipaj shutipi.

4 Cunan, ñuca churi, ñuca parlani ima ñucata ninanda llaquichij; cai llaquichihuan tian yali canchi ninajuicuna cangunapurapi.

5 Ñuca ciertopachata yachajushca cashpa, tiashca yali canchi ninajuicuna cangunapurapi uchilla huahuacunapaj bautismomanda.

6 Cunan, ñuca churi, ñuca munani quiquin utsialla rurachun, cai cashnapacha pandai tucurishca cachun cangunapuramanda; cai munaimanda ñuca cai cartata quilcashcani.

7 Ñapash cai cuzascunata yachashca jipa Apunchijta tapurcani caicunamanda. Apunchijpaj shimi shamurca ñucapaman Espíritu Santopaj ushaimanda, nishpa:

8 Uyai Cristopaj shimicunata, cangunapaj Jatun Causachij, cangunapaj Apunchij, cangunapaj Diospash. Riqui, ñuca shamurcani cai pachaman ali rurajcunata na cayangapa ashtahuangari jucha rurajcunata arrepentimientoman cayangapa; na huañunajujcuna na minishtinllu jambijta, ashtahuangari huañunajujcuna; chaimanda, uchilla huahuacuna na ungushcacuna canllu, paicuna na juchata ruraita ushan; chaimanda Adánpaj ninan llaqui anchuchishca can ñucapi, shina na ushaita charinllu paicunapaj jahuapi; circuncisiónpaj catichunbacha saquishcapash ñucapi tucurishca can.

9 Cashna laya Espíritu Santo ricuchihuarca Diospaj shimita; chaimanda, ñuca juyashca churi, ñuca yachani cai can napacha alicachishca Diospaj ñaupapi, uchilla huahuacunata canguna bautizai.

10 Riqui ñuca nini cangunaman cai cuzasta yachachinguichi—arrepentimiento, bautismopash maijan responsable juchata rurai ushajcunamanbash; ari, yachachi taitacunata paicuna arrepentirina, bautizarishca cana, paicunamanda humildeyana paicunapaj uchilla huahuacuna laya, paicuna quishpirishca canga paicuna uchilla huahuacunahuan.

11 Paicunapaj uchilla huahuacuna na minishtin arrepentimientota, bautismotapash na. Riqui, bautismo can arrepentimientopa pactachingapa rurachunbacha saquishcacunata juchacunata anchuchingapa.

12 Ashtahuangari uchilla huahuacuna causan Cristopi, cai pacha rurashcamandapacha; na shina cajpica, Dios can ñavita ricushpalla chasquichij Dios, shuj ladoman tigrarinalla Dios, genticunata ajllaj; mashnachari uchilla huahuacuna huañushca bautismo illa!

13 Chaimanda, uchilla huahuacuna na quishpiri ushajpi na bautizarishpa, caicuna rishca canman carca mana tucurina ucu pachaman.

14 Riqui ñuca cangunaman nini, maijan uchilla huahuacuna bautismota minishtin yuyajcuna can ninan llaquipaj jayapi, na ali ruraicunapaj huatashcashnapi; na charin fe, shuyai, nacashpa caridad; chaimanda, huañuchishca canga imaura chai yuyaihuan cajpi, urai ringapacha ucu pachaman.

15 Manllanayai na ali rurai can yuyashpa Dios shuj uchilla huahuaguta bautismomanda quishpichin, cutishuj tucurina bautismota na charishca caimanda.

16 Ay maijan huaglichin Apunchijpaj ñangunata cashna laya, paicuna tucuringa imashpapash arrepentirishpalla na. Riqui, ñuca parlani manllai illa, Diospaj autoridadta charishpa; ñuca na manllani imata runa rurajta; imashpa alipacha juyai shitan tucui manllaita.

17 Ñuca caridadhuan junda cani, ima can mana tucurina juyai; chaimanda, tucui huahuacuna igualcuna can; chaimanda, ñuca juyani uchilla huahuacunata shuj alipacha juyaihuan; tucui igualcuna can quishpirinata chasquijcuna.

18 Ñuca yachani Dios na ñavita ricushpalla chasquichij Dios canllu, shuj ladoman tigrajllapash na canllu; ashtahuangari pai na tigrarij can tucui mana tucurimanda tucui mana tucuricaman.

19 Uchilla huahuacuna na arrepentiri ushan; chaimanda, cai can manllanayai na ali rurai negaita Diospaj mapa illa shungumanda llaquinacunata paicunaman, imashpa tucui paicuna paipi causan paipaj shungumanda llaquimanda.

20 Maijan nin uchilla huahuacuna bautismota minishtin negan Cristopaj shungumanda llaquinacunata, nimapi churan shujpa juchamanda huañuita, paipaj jatun causachinapaj ushaitapash.

21 Ay shinacuna, paicuna can huañuipaj peligropi, ucu pacha, mana tucurina llaqui. Ñuca parlani mana manllaihuan; Dios mandahuashca. Uyaichi caicunata, rinrita mañachipash, nacashpa paicuna cangunapaj contra testificanga Cristopaj ricushpa chasquichina tiarinapi.

22 Riqui tucui uchilla huahuacuna Cristopi causan, tucui maijan catichunbacha saquishcacuna illacunapash. Jatun Causachinapaj ushai can tucui maijan catichunbacha saquishcacuna illacunapa; chaimanda, maijan na ricushpa chasquichishca can, nacashpa maijan nima ricushpa chasquichinapi can, na arrepentiri ushan; shina chaicunapaj bautismo imapash na valin—

23 Ashtahuangari Diospaj ñaupapi asishpa ricui can, negashpa Cristopaj shungumanda llaquinacunata; paipaj Achil Espíritupaj ushaita, confianzata churaipash huañushca ruraicunapi.

24 Riqui, ñuca churi, cai cuzas na shina canachu; arrepentimiento can maijanguna ricushpa chasquichinapi cajcunapa, ninan llaquipi shuj catichunbacha saquishcata faquishca cajpi.

25 Arrepentimientopaj callari ricuchicuna can bautismo; bautismo shamun femanda pactachingapa rurachunbacha saquishcacunata; rurachunbacha saquishcacunata pactachi apamun juchacunata anchuchina;

26 Juchacunata anchuchina apamun mansedumbre, shungupaj humildad; mansedumbremanda, shungupaj humildadmanda shamun ricungapa Espíritu Santo, Consolador jundachin shuyaihuan, alipacha juyaihuan, cai juyai catijunlla utsialla achil mañaihuan, imaura tucuri shamungacaman, imaura tucui santocuna Dios-huan causanga.

27 Riqui, ñuca churi, ñuca cutin quilcani, ñapash Lamanitacunapaj contra nara rishpa. Riqui, cai jatun llactapaj jariyai, nacashpa Nefitacunapaj llactapuracuna, cashca imamanda paicunapaj tucuri imashpapash paicuna arrepentirishpalla na.

28 Paicunamanda achil mañai, ñuca churi, paicunapaman shamuchun arrepentimiento. Ashtahuangari riqui, ñuca manllani Espíritu saquirishca paicunahuan macanajuita; cai alpa pushtupi paicuna munanajun tucuchingapa tucui ushaita, autoridadta ima shamun Diosmanda; paicuna neganajun Espíritu Santota.

29 Shina jatun yachaita na cazushpa, ñuca churi, paicuna ñalla tucuringa, pactachingapa achil villashcacunata imata parlashca carca achil villachijcuna, ñucanchi Jatun Quishpichijpaj shimicunapash.

30 Cayacaman, ñuca churi, imaura ñuca quilcangacaman, nacashpa cutin tuparingacaman. Shinacapashcachun.