1 Ngan yana ako, hi Moroni, in magsusurat hin pipira hine nga mga tugon han akon amay nga hi Mormon, nga iya iginyakan hiunong han pagtuo, paglaum, ngan paghigugma; kay ha sugad hine nga paagi hiya in nagyayakan ngadto han mga tawo, samtang nga hiya in nagtututdo ha sinagoga nga ira gintindog para lugar han ampoan.

2 Ngan yana ako, hi Mormon, nagyayakan nganhi ha iyo, mga hinigugma ko nga kabugtoan; nga pinaagi han grasya han Diyos Amay, ngan an aton Ginoo nga hi Jesucristo, ngan han iya baraan nga kaburut-on, tungod han gasa han iya pagtawag ha akon, nga ako in gintugutan nga makagyakan ha iyo yana nga takna.

3 Tungod hine, ako in maghihimangraw ha iyo nga aada ha simbahan, nga mga mamurayaw nga mga tagasunod ni Cristo, nga magkakamayada hin igo nga paglaum nga diin kamo in makakasulod ha kamurayawan han Ginoo, tikang yana nga takna ngada nga kamo in makapahuway kaupod niya didto ha langit.

4 Ngan yana mga kabugtoan ko, iginhuhukom ko ine nga mga kinaiya nga gawi ha iyo tungod han iyo mamurayaw nga paagi han kinabuhi kaupod han anak han katawhan.

5 Kay akon nahinumduman adton tugon han Diyos nga nagsisiring pinaagi han ira mga binuhatan iyo hira makikilala; kay kun maupay adton ira mga binuhatan, hira in maupay liwat.

6 Kay kamatuoran, nasiring an Diyos nga an tawo nga maraot in dire makakagbuhat hin maupay; kay kun hiya in maghahalad hin regalo, o mag-ampo ngadto ha Diyos, labot kun ine in bubuhaton nga may tinuod nga panuyo ine in waray kapulsanan ha iya.

7 Kay ungod, dire ine iihapon ha iya kaupayan.

8 Kay kamatuoran, kun an usa nga maraot nga tawo naghahatag hin regalo, ginbubuhat niya ine kontra han iya kaburut-on; sanglit ine in iihapon ngadto ha iya nga sugad-sugad la nga ginpabilin la gihapon ha iya an regalo; sanglit ine iihapon nga maraot ha atubangan han Diyos.

9 Ngan sugad man ine in iihapon nga maraot ha usa nga tawo, kun hiya in mag-ampo nga waray tinuod nga panuyo ha kaburut-on; Oo, ngan ine in waray kapulsanan ha iya, kay an Ginoo dire makarawat hin sugad hine.

10 Sanglit, an tawo nga maraot in dire makakagbuhat hin maupay; bisan ngani an paghatag hin maupay nga regalo.

11 Kay kamatuoran, an mapait nga burabod in dire makakaghatag hin maupay nga tubig; o an maupay nga burabod in dire maghahatag hin mapait nga tubig; sanglit, an tawo nga tagasunod han yawa in dire makakagsunod kan Cristo; ngan kun hiya in magsunod kan Cristo hiya in dire magigin taga serbi han yawa.

12 Sanglit, adton ngatanan nga butang nga mag-upay in natikang han Diyos; ngan adton maraot in natikang ha yawa; kay an yawa in kaaway ngadto han Diyos, ngan nakikipag-away kontra ha iya hin padayon, ngan nagdadapit ngan naghuhugay nga makasala, ngan padayon hin pagbuhat hin maraot.

13 Kundi pamati, adton kanan Diyos in nagdadapit ngan nagkukumbida nga padayon magbuhat hin maupay; sanglit, kada butang nga nagdadapit ngan nag-aaghat hin pagbuhat hin maupay, ngan paghigugma ha Diyos, ngan magserbi ha iya, in tikang han Diyos.

14 Sanglit, paghirot, mga hinigugma ko nga kabugtoan, nga dire niyo husgahan an maraot nga magin kanan Diyos, O kun hain adton maupay nga kanan Diyos nga nagtikang ha yawa.

15 Kay pamati, kabugtoan ko, adto in iginhatag ha iyo nga maghukom, nga iyo mahibaroan an maupay ha maraot; ngan an paagi hin paghukom in masayon, nga iyo mahibaroan nga may hingpit nga kaaram, nga sugad han kalamrag han adlaw in tikang han kasirum han gab-i.

16 Kay kamatuoran, an Espiritu ni Cristo in iginhatag ha kada tawo, agud iya mahibaroan an maupay ha maraot; salit, akon iginpakita ha iyo an paagi han paghukom; kay an kada butang nga diin nagdadapit hin pagbuhat hin maupay, ngan nag-aaghat nga tumuod kan Cristo, in iginhahatag pinaagi han gahum ngan regalo ni Cristo; sanglit hibabaroan niyo hin hingpit nga kaaram nga adto in tikang ha Diyos.

17 Kundi an ano man nga butang nga nag-aaghat ha mga tawo nga magbuhat hin maraot, ngan dire tumuod kan Cristo, nga igdiwara hiya, ngan dire magserbi ha Diyos, kun sugad hibabaroan niyo hin hingpit nga kaaram nga adto in tikang ha yawa; kay ha sugad hine nga paagi an pagbuhat han yawa, kay iya gin-aaghat an tawo nga dire magbuhat hin maupay, dire, waray bisan usa; bisan adton iya mga anghel; bisan hira nga nagpapasakop ha iya.

18 Ngan yana, mga kabugtoan ko, tungod nga iyo nakita an kalamrag nga diin kamo in maghuhukom, nga ine nga lamrag amo an lamrag ni Cristo, piho-a nga dire kamo maghukom hin sayop; kay ha sugad nga paghukom nga iyo ginhukman kamo in paghuhukman.

19 Sanglit, gin-aabi-abi ko kamo, mga kabugtoan, nga iyo pamilngon hin kamadoroto ine nga lamrag ni Cristo nga hibaroan niyo an maupay ha maraot; ngan kun iyo pagkakaptan an kada butang nga maupay, ngan dire magkondena, kamo in piho nga mga anak ni Cristo.

20 Ngan yana, mga kabugtoan ko, paonan-o mahitatabo nga kamo in makakakarawat han kada maupay nga butang?

21 Ngan yana makadto ako han pagtuo, nga diin akon iginsiring ngan akon pagyayaknon; ngan akon igsusumat an paagi diin kamo in makakakarawat ha kada maupay nga butang.

22 Kay kalipay, an Diyos nga nahibabaro han ngatanan nga butang, nga natikang ha waray tinikangan, ngada ha waray katapusan, kamatuoran, iginsugo niya ha mga anghel agud mag-alagad ha anak han katawhan, para igpasabot an hiunong han pag-abot ni Cristo; ngan kan Cristo in angay magtikang an mag-upay nga butang.

23 Ngan an Diyos an nagpasabot ngadto han mga propeta, pinaagi han kalugaringon niya nga baba, nga hi Cristo in angay umabot.

24 Ngan kamatuoran, mayada iba-iba nga mga paagi diin iya iginpahibaro an mga butang ngadto ha anak han katawhan, kun hain an mga maupay; ngan an ngatanan nga butang nga mag-upay in natikang kan Cristo; kun dire an mga tawo in nakasala, ngan waray mag-upay nga butang in maabot ha ira.

25 Sanglit, pinaagi hadton pag-alagad han mga anghel, ngan han kada tugon nga natikang han baba han Diyos, an tawo in nagtikang hin paggamit hin pagtuo kan Cristo; ngan ha sugad pinaagi han pagtuo, hira in makakakarawat han kada butang nga maupay; ngan ine masusugad ngada han pag-abot ni Cristo.

26 Ngan kahuman han iya pag-abot an tawo in natalwas liwat pinaagi han ira pagtuo ha iya ngaran; ngan pinaagi han pagtuo, hira in nagin mga anak han Diyos. Ngan sugad nga nabubuhi hi Cristo hiya in nagyakan hine nga mga tugon ngadto han aton kaapoy-apoyan, nga nagsisiring: Bisan ano nga butang nga iyo aaron ha Amay pinaagi han akon ngaran, kun ito in maupay, nga may pagtuo ngan natuod nga ine in iyo makakarawat, kamatuoran, ine in bubuhaton ha iyo.

27 Sanglit, mga hinigugma ko nga kabugtoan, umukoy ba adton mga milagro tungod kay hi Cristo in sinmaka na ha langit, ngan lumingkod ha too nga kamot han Diyos, agud angkonon ha Amay adton iya mga katungod han pagkaluoy nga mayada niya ha anak han katawhan?

28 Kay iya ginbaton an panuyo han balaod, ngan iya gin-angkon an ngatanan nga may pagtuo ha iya; ngan hira nga mayada pagtuo ha iya in makapot ha kada maupay nga butang; sanglit gin-uugopan niya an kaupayan han mga anak han tawo; ngan hiya in nag-uukoy ha waray katapusan nga kalangitan.

29 Ngan tungod kay iya ine ginbuhat, mga hinigugma ko nga kabugtoan, humunong ba adton mga milagro? Ungod nasiring Ako ha iyo, Dire; bisan ngani an mga anghel in waray umokoy ha pagserbi han anak han katawhan.

30 Kay kamatuoran, hira in nasasakop niya, agud magserbi subay han pulong ha pagsagdon han iya mando, nga nagpapakita han ira mga kalugaringon ngadto hadton makusog an pagtuo ngan waray kabalhin nga panhuna-huna ha kada pamaagi han ka Diyosnon.

31 Ngan an katungdanan han ira pagserbi amo an pagtawag han tawo nga magbasul, ngan tumanon ngan buhaton adton buruhaton han mga kauyonan han Amay, nga iya ginhimo ngadto han anak han katawhan, para ig-andam an dalan ha butnga han anak han katawhan, ha pagpasamwak han mga tugon ni Cristo ngadto han mga pinili nga mga suruguon han Ginoo, agud hira in magpamatuod ha iya.

32 Ngan pinaagi han pagbuhat han sugad, igin-andam han Ginoo nga Diyos an dalan agud an nahibibilin han tawo in magkamayada pagtuo kan Cristo, agud an Espiritu Santo in magkamayada hin lugar ha ira mga kaburut-on, subay han gahum hadto; ngan ha sugad hine nga paagi iginpahitabo han Amay, an mga kauyonan nga iya ginhimo ngadto han anak han katawhan.

33 Ngan nagsiring hi Cristo: Kun kamo in magkamayada hin pagtuo ha akon kamo in magkakamayada hin gahum nga buhaton adton bisan ano nga buruhaton nga kaangayan ha akon.

34 Ngan hiya nagsiring: Magbasul kamo ngatanan nga aada ha katapusan han kalibutan, ngan daop ha akon, ngan magpabunyag ha akon ngaran, ngan magkaada pagtuo ha akon, agud kamo in matalwas.

35 Ngan yana, mga hinigugma ko nga kabugtoan, kun masugad hine nga ine nga mga nahuna-huna in tinuod nga iginyakan ko ha iyo, ngan an Diyos in magpapakita ngadto ha iyo, pinaagi hin gahum ngan dako nga himaya ha urhi nga adlaw, nga ine in mga tinuod, ngan kun ine in mga tinuod an panahon ba han mga milagro in naukoy?

36 O an mga anghel ba in umokoy ha pagpakita ngadto han anak han katawhan? O iya ba ginpugngan adton gahum han Espiritu Santo ha ira? O hiya ba, samtang nga an takna in mag-iiha, o an kalibutan in magpapabilin, o mayada pa usa nga tawo ha bawbaw han kalibutan nga angay matalwas?

37 Ungod nasiring ako ha iyo, Dire; kay ine in tungod han pagtuo nga adton mga milagro in nahihimo; ngan pinaagi hin pagtuo nga an mga anghel in nagpapakita ngan nagseserbi ngadto han tawo; sanglit, kun ine nga mga nahuna-huna in umokoy kairo han anak han katawhan, kay ine tungod han ira kawaray pagtuo, ngan an ngatanan in kawang la.

38 Kay waray tawo nga matatalwas, subay han mga tugon ni Cristo, labot la kun hira in magkamayada hin pagtuo ha iya ngaran; sanglit, kun ine nga mga nahuna-huna in umokoy na, adton pagtuo in umokoy liwat; ngan makangingirhat an kamutangan han tawo, kay hira in baga sugad hin waray pagtubos nga nahitabo.

39 Kundi pamati, mga hinigugma ko nga kabugtoan, ako in maghuhukom hin labaw pa nga mag-upay nga mga kinaiya nga gawi ha iyo, kay ginhuhukman ko kamo nga may pagtuo kan Cristo tungod han iyo kamapainobsanon; kay kun waray kamo pagtuo ha iya kun sugad dire kamo naangay mahiapi han ihap han mga tawo han iya simbahan.

40 Ngan liwat, mga hinigugma ko nga kabugtoan, magyayakan ako ha iyo mahitungod han paglaum. Paunan-o mahitatabo nga kamo in makakaabot hin pagtuo, labot la kun kamo in magkakamayada hin paglaum?

41 Ngan ano ine nga iyo ginlalauman? Ungod nasiring ako ha iyo nga kamo in may paglaum pinaagi han pagbayad han sala ni Cristo ngan an gahum han iya pagkabanhaw, nga bumuhat ngadto ha kinabuhi nga waray katapusan, ngan ine in tungod han iyo pagtuo ha iya subay hadton mga panaad.

42 Sanglit, kun an tawo in may pagtuo hiya in kinahanglan nga magkaada hin paglaum; kay kun waray pagtuo waray liwat paglaum.

43 Ngan liwat, ungod nasiring ako ha iyo nga dire hiya magkakaada hin pagtuo ngan paglaum, labot la kun hiya in magin tinuod nga mapainobsanon, ngan may tinuod mga mapainobsanon nga kaburut-on.

44 Kun sugad, adton iya pagtuo ngan paglaum in kawang la, kay waray bisan usa man nga kakarawton ha atubangan han Diyos, labot la adton buotan ngan may tinuod nga mapainobsanon nga kaburut-on; ngan kun an tawo in buotan ngan may tinuod nga mapainobsanon ha iya kaburut-on, ngan nauyon pinaagi han gahum han Espiritu Santo nga hi Jesus amo hi Cristo, kinahanglan hiya in magkamayada hin paghigugma; kay kun waray hiya paghigugma hiya in waray gamit; sanglit kinahanglan gud nga hiya magkaada hin paghigugma;

45 Ngan an paghigugma in nakakapag-ilob hin maiha, ngan maloloy-on, ngan waray pagkaawa, ngan dire mapalabi-labihon, dire nag-uungara para la han iya kalugaringon, dire madali masina, dire naghuhuna-huna hin maraot, ngan dire nalilipay ha karaotan kundi nalilipay ha kamatuoran, nag-aantos han ngatanan nga kakurian, natuod han ngatanan nga nahuna-huna, ngan nalaum han ngatanan nga nahuna-huna, nag-iilob han ngatanan nga kakurian.

46 Sanglit, mga hinigugma ko nga mga kabugtoan, kun waray kamo gugma, waray kamo kapulsanan, kay an gugma in dire nagkukulang. Sanglit, kumapot hin maupay ha gugma, nga amo an pinakamaupay han ngatanan, kay ngatanan nga butang in mayada pagkulang —

47 Kundi an gugma amo an uray nga gugma ni Cristo, ngan ine in nakakag-antos hin kadayonan; ngan hin-o man nga mahibibilngan nga mayada hito ha urhi nga adlaw, ito in magigin maupay para ha iya.

48 Sanglit, mga hinigugma ko nga kabugtoan, pag-ampo ha Amay ha bug-os nga abilidad, nga kamo in mapuno hin sugad hine nga gugma, ngan iya iginhatag ha ngatanan nga ungod nga mga sumurunod han iya Anak, nga hi Jesucristo; agud kamo in magin mga anak han Diyos; ngan kun hiya in magpakita kita in magigin sugad ha iya, kay aton hiya makikita nga hiya na; nga magkakaada unta kita hine nga paglaum; agud kita in magin uray bisan sugad ha iya nga uray. Amen.