1 Ket ita, napasamak a kalpasan ti pannakaisao ni Abinadi dagitoy a balikas inunnatna ti imana ket kinunana: Dumtengto ti panawen a makitanto ti amin ti panangisalakan ti Apo; inton agkikinnitanto ti tunggal pagilian, puli, pagsasao, ken tattao ken ipudnodanto iti sanguanan ti Dios a nainkalintegan dagiti panangukomna.

2 Ket kalpasanna dagiti managdakdakes ket mapapanawto, ket addaandanto iti rason nga aganug-og, ken agsangit, ken agdung-aw, ken agngaretnget; ket gapu daytoy ti saanda panangipangag iti timek ti Apo; ngarud saan a subboten ida ti Apo.

3 Agsipud ta nailubongan ken sinasairoda, ket addaan bileg ti sairo kadakuada; wen, uray pay iti uleg idi ugma a nangallilaw kadagiti immuna a nagannaktayo, a nakaigapuan ti pannakatnagda; a nakaigapuan ti panagbalin amin a sangatauan a nailubongan, nagartem, sinasairo, makaammo iti dakes manipud iti naimbag, agpasakupda iti sairo.

4 Isu nga amin a sangkatauan ket napukaw; ket kitaen, napukawda koma iti awan patinggana no saan a gapu iti panangsubbot ti Dios kadagiti taona manipud iti pannakapukaw ken pannakatnag a kasasaad.

5 Ngem laglagipenyo nga asino man nga agtultuloy iti bukodna a nailubongan a kababalin, ket agtultuloy kadagiti wagas ti basol ken panagsupring maibusor iti Dios, agtalinaed iti pannakatnag a kasasaad ket addaan iti amin a bileg ti sairo nga agturay kenkuana. Ngarud kasla awan ti naaramid a pannubbot kenkuana, ta kabusor ti Dios; ket kasta met a kabusor ti Dios ti sairo.

6 Ket ita no saan nga immay ni Cristo iti lubong, nga agsasao kadagiti banag a dumteng a kasla dimtengdan, awan koma ti pannubbot.

7 Ken no saan koma a nagungar ni Cristo, wenno napekka ti bedbed ti patay tapno saan nga agballigi ti tanem, ken nasken a ti patay awanan ti pannilud, awan koma ti panagungar.

8 Ngem adda panagungar, saan ngarud agballigi ti tanem, ken ti pannilud ti patay ket pinarmek ni Cristo.

9 Isu ti silaw ken biag ti lubong; wen, silaw nga awan inggana, a saan a pulos a mapasipnget; wen, ken biag met nga awan inggana, tapno awanton ti ipapatay.

10 Makawesanto uray daytoy bagi a matay iti bagi a saan a matayen, ket makawesanto daytoy bagi nga agrupsa iti bagi a saan nga agrupsa, ket maiturongto nga agtakder iti sanguanan iti pangukoman ti Dios, tapno maukom a mayannurot iti aramidda nasayaatda man wenno dakesda—

11 No nasayaatda, iti panagungar ti awan inggana a biag ken ragsak; ket no dakesda, iti panagungar ti awan inggana a pannakailunod, ta nayawatda iti sairo, a nangsakup kadakuada, nga iti pannakailunod—

12 Ta sinurotda dagiti maibatay kadagiti bukodda a nailubongan a pagayatan ken tarigagayda; ta saanda pulos nga immawag iti Apo bayat ti pannakaitanggaya ti takiag ti kaasi kadakuada; agsipud ta naitanggaya ti takiag ti asi kadakuada, ngem saanda kinayat; isuda a naballaagan kadagiti kinadangkesda ket saanda latta tinallikudan dagitoy; ken nabilinda nga agbabawi ngem saanda pay la agbabawi.

13 Ket ita, saan kadi rumbeng koma nga agpigerger ken agbabawikayo kadagiti basolyo, ken laglagipenyo a maisalakankayo babaen ken gapu laeng ken ni Cristo?

14 Ngarud, no isuroyo ti linteg ni Moises, isuroyo met nga isu ti anniniwan dagiti banag a dumteng—

15 Isuroyo ida a dumteng ti pannakasubbot babaen ken ni Cristo nga Apo, nga isu ti kakaisuna nga Agnanayon nga Ama. Amen.