1 At ngeni, milyari a i Alma, a mitakas ibat karing ipus nang aring Noah, sinisi ya karing keang kasalanan at karokan, at minta yang pasalikut king busal ding tau, at megumpisa yang tinuru karing amanu nang Abinadi —

2 Wa, tungkul ketang datang, at tungkul mu naman king pamanyubling mie da ring mete, at ing pamanatbus karing tau, a malyari kapamilatan ning upaya, at kasakitan, at pangamate nang Cristo, at ing keang pangasubling mie at ing pamanukiat king banua.

3 At nung makananu la karakal ding damdam king amanu na tiru nala. At tiruanan nalang palihim, bang e miras keng beluan ning ari. At dakal la ding meniwala karing keang amanu.

4 At milyari a nung makananu la karakal ding maniwala kea minta la king metung a lugal a ausan dang Mormon, kaibat nang tinggap ing lagiung ita ibat king ari, bilang atiu karing angganan na ning labuad a pamugaran, karing panaun o karing kapanaunan, da reng mangabangis a animal.

5 Ngeni, king Mormon ating sibul ning malinis a danum, at i Alma minta ya, karin bilang malapit king metung a malating gubat, nung nukarin ne selikut ing keang sarili neng aldo king pamanintun na ning ari.

6 At milyari a nung makananu la karakal ding maniwala kea minta la karin bang damdaman dala ring keang amanu.

7 At milyari kaibat ning dakal a aldo ating mayap a bilang mititipun king lugal nang Mormon, bang damdaman dala ding amanu nang Alma. Wa, ding eganaganang maniwala karing keang amanu mitipuntipun la, bang damdaman de. At tiruanan na la, at penaral ne karela ing pamanisi, at ing pamanatbus, at ing kasalpantayanan king Guinu.

8 At milyari a sinabi na karela: Lawan, oreni ding danum nang Mormon (uling makanian lang mayayaus) at ngeni, uli ning maki kapagnasan kang lumapit king kawan ning Dios, at bang mayaus lang tau na, at bisa lang magdala king bayat a darala ning metung at metung, ba lang maging mayan;

9 Wa, at bisa lang makipagmalun karetang magmalun; wa, at pamatulan la detang mangailangan king pamatula, at bang talakad la bilang saksi para king Dios king eganaganang panaun at king eganaganang bage, at king eganaganang lugal a malyari kang munta, anggiyang angga king kamatayan, ba na kayung ayatbus ning Dios, at mibilang karetang king mumunang pamanyubling mie, ba kayung mika bie alang angga —

10 At ngeni, sasabian ku kekayu, nung ini ing kaburian ning pusu mu, nanu ing atin kayu laban king pamagpabiniag king lagiu ning Guinu, bilang metung a saksi king arapan na a ikayu linub kayu king metung a pangaku kea, a pagsilbian ye at pamintuan yula ding keang kautusan, ba nang itugtug ing keang Espiritu a mitmung kasaganan kekayu?

11 At ngeni anyang ding tau dimdam dala ding amanung deni, pelakpak dala ding gamat da king tula, at gilisak da: Oini ing kaburian ning pusu mi.

12 At ngeni milyari a i Alma kinua ne i Helam, ya bilang metung karing minuna, at minta ya at tinalakad ya king danum, at menangis, a sasabing: O Guinu, itugtug ye ing kekayung Espiritu keng kekayung alipan, ba nang agawa ining obra a ating kabanalan ning pusu.

13 At aniang asabi nala ding amanung deni, ing Espiritu ning Guinu atiu kea, at sinabi na: Helam, bibiniagan daka, bilang ating autoridad ibat king Mayupayang Dios, bilang patutu a ika linub ka king pangaku para pagsilbian ya angga king mate ka king mortal a katawan; at sana ing Espiritu ning Guinu mitugtug ya keka; at ipagkalub ne sana keka ing alang anggang bie, king kapamilatan ning pamanatbus nang Cristo, a keang sinadia ibat king pangatalakad na ning yatu.

14 At kaibat nalang sinabing Alma dening amanung deni, di Alma at Helam pareu lang limbug king danum; at tinikdo la at linto la ibat king danum a matula, uling mitmu la king Espiritu.

15 At pasibayu, i Alma midala ya pang aliwa, at minta la king danum king kaduang ukdu, at bininiagan ne agpang ketang minuna, dapot ena ne pepalbug pasibayu ing keang sarili king danum.

16 At king anti kanining paralan bininiagan nala ding balang metung a minta king lugal nang Mormon; at atin lang kabilangan a aduang dalan at apat a kaladua; wa, at mebiniag la karing danum nang Mormon, at kinatmu la king grasya ning Dios.

17 At meyaus lang ing pisamban ning Dios, o ing pisamban nang Cristo, ibat king panaun a ita. At milyari a ninumang mebiniag king upaya at autoridad ning Dios miragdag ya king keang pisamban.

18 At milyari a i Alma bilang ating autoridad ibat king Dios, menordina yang sacerdote; anggiyang metung a sacerdote karing balang limangpulu karing karelang bilang ding keang inordina bang manaral karela, at para ituru dala tungkul king bage agpang king kayarian ning Dios.

19 At inutusan nala a ala lang dapat ituru maliban karing bage a keang tiru, at nung sanung mesabi king asbuk da ring banal a propeta.

20 Wa, inutus nala a ala lang dapat panaral maliban king pamanisi at kasalpantayanan king Guinu, a menatbus karing keang tau.

21 At inutus nala a alang dapat misasalangsangan king metung at metung, dapot dapat lang lumawe king metung a kapagnasan, a ating metung a kasalpantayanan at metung a binyag, a ding karelang pusu abe-abe la king pamisanmetung at king pamikalugud king balang metung.

22 At anya inutusan nala para manaral. At anya meging anak nala ning Dios.

23 At inutusan nala a dapat deng igalang ing aldo sabbath, at gawan yang banal, at makanian mu naman ing balang aldo dapat lang magpasalamat king Guinu a karelang Dios.

24 At inutusan nala naman ding sacerdote a keang inordinan dapat lang magobra king sarili dang gamat para king karelang pamangabiayan.

25 At ating metung a aldo king balang paruminggo a sinadia na a dapat lang mitipuntipun abe-abe bang turuanan nala ding tau at bang samban de ing Guinu a karelang Dios, at makanian mu naman, kasing dalas ning karelang kagiwan, tipunan la ding karelang sarili.

26 At ding sacerdote ela dapat masa karing tau king karelang pangabiayan; dapot king karelang obra tanggap lang grasya ning Dios, ba lang sikan king Espiritu, a ating beluan king Dios, ba lang makaturu a ating upaya at autoridad ibat king Dios.

27 At pasibayu i Alma inutus na a ding tau king pisamban dapat dang ibiye ing dake ibat king karelang pibandian, balang metung agpang kanitang atiu kea; nung atin yang dakal dapat yang mamiye dakal; at keang atin dapot ditak, dapot ditak mu ing kailangan; at kea a ala dapat yang dinan.

28 At anya pin dapat dang idake ing karelang pibandian king sarili dang kaburian at king mayap a kapagnasan king Dios, at karing sacerdote a mangailangan, wa, at karing balang mangailangan, a lubas a kaladua.

29 At oini ing sinabi na karela, bilang inutusan ning Dios; at linakad lang matulid king arapan ning Dios, idadake da karing balang metung king temporal at espiritual agpang king karelang pamangailangan at king karelang kakulangan .

30 At ngeni milyari a ing eganaganang ini milyari king Mormon, wa, karing danum nang Mormon, king gubat a malapit karing danum nang Mormon; wa, ing lugal nang Mormon, ding danum nang Mormon, ing gubat nang Mormon, kalagu da karing mata detang minta karin king beluan na ning karelang Manatbus, wa, at kanuan da, uling ila magkanta la king keang papuri kapilanman.

31 At deting bage megawa la karing angganan na ning labuad, bang ela miras king beluan na ning ari.

32 Dapot oini, milyari a ing ari, uling abalu na ing aguman da ring tau, pepadala nala ding keang ipus bang banten dala. Anya pin king aldo itang mitipuntipun la bang makiramdam karing amanu ning Guinu abalu na la ning ari.

33 At ngeni ing ari sinabi na a amuyutan na lang Alma ding tau balang salangsang laban kea; anya pin pepadala na la ding keang sundalu para paten dala.

34 At milyari a i Alma at ding tau na ning Guinu misabianan la king pamaniatang da ring sundalus ning ari; anya kinua dala ding karelang tolda at ding karelang pamilia at meko la papunta king ilang.

35 At atin lang bilang a apat a ralan at limangpulung kaladua.