1 At ngeni, milyari a kaibat neng pipusan aring Benjamin ing pamagsalita karing amanung inatad na kea ning anghel na ning Guinu, inarap no ring keang mata padurut karing keraklan at ikit na, sinakab la king gabun, uling ing takut king Guinu dinatang karela.

2 At ikit da ing sarili da king karelang sariling makayatung kabilian, mas mababa kesa king alikabuk na ning yatu. At ginulisak la ngan king metung a siwala, a sasabing: O miye pakalulu, at gamitan ing dayang manatbus nang Cristo bang tanggap tamung kapatawaran karing kekatamung kasalanan, at ding kekatamung pusu maging malinis la; uling maniwala kami kang Jesucristo, ing Anak ning Dios, a miglalang king banua at yatu, at karing anggang bage; a tipa busal ding anak da ring tau.

3 At milyari a kaibat dalang asabi deting bage ing Espiritu na ning Guinu dinatang ya karela, at kinatmu la king tula, king pamananggap dang kapatawaran karing karelang kasalanan, at maki kapayapan ning konsensiya, uli na ning sobrang kasalpantayanang atiu karela kang Jesucristo a datang, agpang karing amanu a i aring Benjamin sinabi na karela.

4 At i aring Benjamin biklat neng pasibayu ing keang asbuk at megumpisa yang migsalita karela, a sasabing: Kakaluguran ko at kapatad ko, kamaganak ko at tau ko, aduan ku ing makiramdam kayung pasibayu, bayung damdaman at aintindian ding mitagan karing kakung amanu a sabian ku kekayu.

5 Uling lawan, nung ing beluan king kayapan ning Dios king panaun a iti agising na kayu king panamdam na ning kekayung kelan, at kekayung kelang ulaga at makasalanang kabilian —

6 Sasabian ku kekayu, nung miras na kayu king beluan na ning kayapan ning Dios, at ing keang alang kapante upaya, at ing keang kabiasnan, at ing keang pamanupaya, at ing keang kapibabatan karing anak da ring tau; at makanian mu naman, ing pamanatbus a misadia manibat king pangatatag na ning yatu, bang king kapamilatan na ing kaligtasan datang kea a mibili king keang kapanaligan king Guinu, at maging masikap king pamanupad karing keang kautusan, at misusundu king kasalpantayanan angga king kapupusan ning keang bie, ing buri kung sabian ing bie ning katawang mortal —

7 Sasabian ku, a ini ing taung tanggap kaligtasan, king kapamilatan na ning pamanatbus a misadia manibat king pangatatag ning yatu para karing sablang tau a mebie manibat king pamikasala nang Adan, o mabibie ngeni, o mie, angga king kapupusan na ning yatu.

8 At iti ing paralan nung makananu yang datang ing kaligtasan. At alang aliwang kaligtasan maliban kening mesabi; ni alang nanumang kabilian nung makananu yang miligtas ing tau maliban karening kabilian a sinabi ku kekayu.

9 Maniwala king Dios; maniwala a ya pin, at lelangan na ing eganaganang bage, king banua at king yatu; maniwala a atiu ngan kea ing kabiasnan, at ing anggang upaya, king banua at king yatu; maniwala ing tau e nala ngan aintindian ding eganaganang bage a aintindian ning Guinu.

10 At pasibayu, maniwala a dapat kayung sumisi karing kekayung kasalanan at gulutan yula, at magpakumbaba kayu king arapan na ning Dios; at maniawad laus king pusu a patawaran na kayu; at ngeni, nung maniwala kayu karing anggang bage a reti siguraduan yu a gagawan yu la.

11 At pasibayu sasabian ku kekayu anti ing sinabi ku kekayu kanita, uling miras na kayu king beluan na ning glorya ning Dios, o nung abalu yu ne ing keang kayapan at mekatakman king keang lugud, at mekatanggap kapatawaran karing kekayung kasalanan, a maging sangkan ning lubus a maragul a tula karing kekayung kaladua, makanian man buri kung ganakan yu, at parati yung gaganakan, ing kadakilan ning Dios, at ing kekayung sariling kelan, at ing keang kayapan at kasakitan kekayu, e karapatdapat a melalang, at magpakumbaba angga king lalam ning pamagpakumbaba, mamaus king lagiu na ning Guinu aldo-aldo, at tatalakad matatag king kasalpantayanan ketang datang, a mesabi king asbuk na ning anghel.

12 At lawan, sasabian ku kekayu a nung gawan yu iti ikayu parati kayung masaya, at kumatmu king lugud ning Dios, at parating papanatilian ing kapatawaran karing kekayung kasalanan; at dagul kayu king beluan na ning glorya na a linalang kekayu, o king beluan kanitang makatuliran at tutu.

13 At e kayu mika kaisipang panasakitan ing metung at metung, dapot mie payapa, at mamiye king balang tau agpang ketang dapat kea.

14 At e yula paburen ding kekayung anak a dumanup la, o malubas; ni paburen yulang mikasala karing batas ning Dios, at makilaban at makipate king metung at metung, at silbian ing demonyu, a maestro ning kasalanan, o ing marok a espiritu a sinabi da ring kekatamung ninunu, ya bilang kalaban ning eganaganang kayapan.

15 Dapot ituru yu lang lumakad karing dalan ning katutuan at kapayapan; ituru yu lang mikakalugud king metung at metung, at magsilbi king metung at metung.

16 At makanian mu naman, ikayu mismu ing sumaup karetang mangailangan king kekayung saup; ibiye yu ing kekayung pibandian kea a mangailangan; at eyu paburen a ing aduan na kekayu ning pulubi mawala yang ulaga, at itabi ye bang mate.

17 Siguru sabian yu: Ing tau ing migdala king sarili na ning keang sariling kasakitan; nung makanian aguantan ko ring kakung gamat, at eku na ibiye kea ing kakung pamangan, o idake kea ing kakung pibandian bang eya magkasakit, uling ding keang kaparusan makatuliran la —

18 Dapot sasabian ku kekayu, O tau, ninuman ing gawa kanini ya mu naman mika maragul yang sangkan para sumisi; at anggang eya sumisi ketang agawa na ya mate ya kapilan man, at ala lang lugal king kayarian ning Dios.

19 Uling lawan, e tamu ngan wari pulubi? E tamu wari mamasa king pareung Tau, anggiyang king Dios, kareng eganaganang pibandian a atiu kekatamu, pareu karing pamangan at imalan, at karing gintu, at karing pilak, at king balang klasi ning eganaganang pibandian a atiu kekatamu?

20 At lawan, anggia man king panaun a iti, mamaus kayu king keang lagiu, at makisabi para king kapatawaran da ring kekayung kasalanan. At paburen na wari a ing kekayung pamakisabi mawalang ulaga? Ali; tigtug ne ing keang Espiritu kekayu, at pepalyarian na a ding kekayung pusu kumatmu la king tula, at pepalyarian nang ding kekayung asbuk misara la bang e kayu makapagsalita, a masyadung maragul ing kekayung tula.

21 At ngeni, nung ing Dios, a linalang kekayu, nung kaninu kayu mamasa para king kekayung bie at para king eganaganang atiu kekayu at ikayu, ibiye na kekayu ing nanumang aduan yu a ustu, king kasalpantayanan, a maniwala kayung tanggap kayu, O nung makanian mas kailangan yu lang idake keng pibandian a atin kayu king metung at metung.

22 At nung atulan ye ing tau a maniawad kekayu keng pibandian bang eya mate, at sangkanan ye, nu anti ya pang mas makatuliran ing kekayung maging kayatulan uli ning pamagkaimut yu keng kekayung kabiayan, nung sanung eyu pibandian dapot king Dios ya, nung ninu ya mu ring makibandi keng bie mu; at makanian man e kayu maniawad, o sisisi king bage a agawa mu.

23 Sasabian ku keka, kalulu ya ing taung ita, uling ing pibandian na mawalang kayabe na; at ngeni, sasabian ku ing bage a ini karetang mangakualta tungkul karing bage king tau king yatung ini.

24 At pasibayu, sasabian ku karing pakakalulu, ikayung e makualta dapot ating sapat, para mie king aldo-aldo; ding amanuan ku ikayu ngan a e mamiye karing magpalimus, uling ala kayu; buri ku sabian yu karing kekayung pusu a: E ku mamiye uling ala ku, dapot nung atin ku mamiye ku.

25 At ngeni, nung sabian yu ini karing kekayung pusu manatili kayung alang sala, nung ali misumpa kayu; at ing kekayung sumpa makatuliran ya uling magnasa kayu ketang eyu tinggap.

26 At ngeni, alang-alang karing bage a sasabian ku kekayu — ita pin, alang alang king pamanatili king kapatawaran karing kekayung kasalanan king aldo-aldo, bang lumakad kayung alang kasalanan king arapan ning Dios — buri ku a idake yu ing kekayung pibandian karing pakakalulu, balang tau agpang ketang atiu kea, gagawan ding bage anti ing pamipakan karing danupan, imalanan ing lubas, pamamunta karing masakit at sumaup king karelang kapasnawan, king espiritual at temporal, agpang karing karelang kakulangan.

27 At lawan a ding anggang bage deti magagawa la king kabiasnan at ayus; uling e kailangan a ing tau dapat yang mulayi kesa king keang sikanan. At pasibayu, kailangan a dapat yang masikap, a king makanian malyaring sambutan ne ing premyu, anya pin, ding eganaganang bage dapat lang magawa king ayus.

28 At buri ku a dapat yung ganakan, a ninuman kekayu ing mandam king keang siping bale dapat neng ibalik ing bage a keang dinam, anti king keang pekikasundu, nung ali mikasala kayu; at malyaring papalyarian yu a ing kekang siping bale mikasala ya naman.

29 At katataulian, e ku la ngan asabi kekayu ding anggang bage a malyaring mikasala kayu; uling ating dakal a dalan at paralan, a masyadu lang dakal a e ku la abilang.

30 Dapot ini mu ing asabi ku kekayu, a nung e yu la banten ding kekayung sarili, at ding kekayung kaisipan, at ding kekayung amanu, at ding kekayung dapat, at pamintuan ding kautusan ning Dios, at misundu king kasalpantayanan karing kekayung dimdam agpang king pamaniatang ning Guinu tamu, anggiang angga king kapupusan ning bie yu, dapat kayung mate. At ngeni, O tau, ganakan, at e ko mate.