1 At ngeni, milyari a aniang i aring Benjamin mekapagsalita ya karing keang tau, mitubud ya busal da, king kapagnasan nang abalu nung ding keang tau maniwala la karing amanu a sinabi na karela.

2 At ginulisak la king metung a siwala, a sasabing: Wa, paniwalan mi ing eganaganang amanung sinabi yu kekami; at makanian mu naman, balu mi ing karelang kasiguraduan at katutuan, uli ning Espiritu na ning Guinung Mayupaya, a ginawang maragul a pamagbayu kekami, o karing kekaming pusu, a ala na kaming kapagnasang gawang marok, dapot gawang mayap a alang tuknang.

3 At ikami, ding kekaming sarili, makanian mu naman, king kapamilatan ning alang anggang kayapan ning Dios, at karing pamipakit ning keang Espiritu, mika dakilang panlalawe king sanu mang daratang, nung kailangan ya, malyari ming ulan ing anggang bage.

4 At yapin ing kasalpantayanan a atiu kekami karing bage a sinabi na kekami ning ari mi ing midala kekami king kanining dakilang kabeluan, anya magsaya kaming maki maragul a tula.

5 At makasadia kaming lungub king metung a pangaku king kekaming Guinu bang daptan ing keang kaburian, at bang maging mapamintu king keang kautusan king anggang bage a iutus na kekami, karing anggang mitatagan king kekaming aldo, bang emi adala karing sarili mi ing metung a alang anggang kaparusan, antimo ing sinabi na ning anghel, bang eke makainum king copa na ning mua ning Dios.

6 At ngeni, oreni ding amanung pignasan nang aring Benjamin karela; anya pin sinabi na karela: Kekayu lang sinabi ding amanu a kakung pagnasan; at ing pangaku a kekayung gewa metung yang mayap a pangaku.

7 At ngeni, uli ning pangakung kekayung gewa mayaus kayung anak nang Cristo, ding anak nang lalaki, at ding anak nang babai; uling lawan, king aldo ini beit na kayu king espiritu, uling sasabian yu a ding kekayung pusu mibayu la kapamilatan ning kasalpantaynan king keang lagiu; nung makanian, mibait kayu kea at meging anak na kayung lalaki at anak nang babai.

8 At king lalam ning kanining pamamuntukan meging malaya kayu, at alang aliwang mamuntukan a agawa na kayung malaya. Alang aliwang lagiu a mibiye nung nukarin ing kaligtasan datang; anya pin, buri ku dalan ye ing lagiu nang Cristo, ikayu ngang linub king pangaku king Dios a dapat kayung maging mapamintu angga king kapupusan ning bie yu.

9 At milyari a ninuman ing gawa kanini mayakit ya king wanan nang gamat ning Dios, uling abalu na ing lagiung inaus da kea; uling mayaus ya king lagiu nang Cristo.

10 At ngeni milyari, a ninuman ing e magdala king lagiu nang Cristo dapat mayaus ya king aliwang lagiu; anya pin, akit ne ing sarili na king kailing gamat ning Dios.

11 At buri ku mu namang dapat yung ganakan, a ini ing lagiu a sinabi ku a kakung dapat ibiye kekayu a e kapilanman mabura, maliban nung ita king kapamilatan ning pamikasala; nung makanian, mingat kayu a e kayu mikakasala, bang ing lagiu yu e mabura karing kekong pusu.

12 Sasabian ku kekayu, buri ku ganakan yung papanatilian ing lagiu lagi yang makasulat karing kekayung pusu, bang eda kayu akit king kailing gamat ning Dios, dapot damdaman yu at abalu ing siwala a nung kenu kayu mayaus, at makanian mu naman, ing lagiu a iyaus na kekayu.

13 Uling makananu neng abalu ning metung a tau ing Guinu a ena pigsilbian, at nung ninu ing ena kakilala, at marayu king kaisipan at kapagnasan ning keang pusu?

14 At pasibayu, kukuwanan ne wari ning metung a tau ing asno a bandi ning siping nang bale, at salikut ne? Sasabian ku kekayu, Ali; e ne man pabureng mangan kayabe da ring keang kawan, dapot kea neng itabi, at palualan ne. Sasabian ku kekayu, makanian mu naman king busal yu nung eye balu ing lagiu a iyaus da kekayu.

15 Nung makanian, buri ku a dapat kayung maging matatag at e makikimut, palaging mitmu karing mangayap a obra, bang i Cristo, ing Guinung Dios a Mayupaya, atatakan na kayu a kea, ba kayung midala king banua, ba kayung mika alang anggang kaligtasan at bie alang angga, king kapamilatan ning kabiasnan, at upaya, at justicia, at lunus kea a linalang king anggang bage, king banua at king yatu, a yang Dios king babo ning eganagana. Amen.