EmaVi aMormon

1 Manje mine, Mormon, sengitawuniketa umbhalo lobekadze ngiwenta etandleni tendvodzana yami Moroni, buka ngikubonile cishe konkhe kubhujiswa kwebantfu bami, emaNefi.

2 Futsi seyiminyaka lengemakhulu lamaningi emvakwekufika kwaKhristu lapho nginiketa lemibhalo etandleni tendvodzana yami; futsi ngicabanga kutsi yona itawubona konkhe kubhujiswa kwebantfu bami. Kodvwa shengatsi Nkulunkulu abengayipha kutsi isindze kuko, kute ibhale lokutsite mayelana nabo, kanye nalokutsite mayelana naKhristu, kute mhlawumbe ngalelinye lilanga kubasite.

3 Manje, sengikhuluma lokutsite mayelana naloko lengikubhalile; ngoba emvakwekutsi sengente lokufinyetiwe kubongcwengcwe baNefi, kwehla kuye ekubuseni kwalenkhosi Bhenjamini, Amalekhi lakhulume ngayo, ngacwaninga emkhatsini walemibhalo leyayiletfwe etandleni tami, ngatfola laba bongcwengcwe, labebacuketse umlandvo lomncane webaphrofethi, kusukela kuJakobe kwehla kuya ekubuseni kwalenkhosi Bhenjamini, futsi ngalokunjalo nalamaningi emavi aNefi.

4 Futsi tintfo letikulaba bongcwengcwe tiyangitfokotisa, ngenca yetiphrofetho tekuta kwaKhristu; futsi bobabe bati kutsi labaningi babo bese bagcwalisekile; yebo, nami ngiyati kutsi letiningi tintfo lebetiphrofethiwe mayelana natsi kwehle kute kube ngulolusuku setigcwalisekile, futsi letiningi tato kundlulela ngale kwalolusuku kufanele ngempela tenteke—

5 Ngaloko-ke, ngikhetse leti tintfo, kucedzela umbhalo wami kuto, umbhalo wami losele lengitawutsatsa kubongcwengcwe baNefi; futsi angeke ngikwati kubhala incenye yalokulikhulu yetintfo tebantfu bami.

6 Kodvwa buka, ngitawubatsatsa laba bongcwengcwe, labacuketse letitiphrofetho kanye netembulo, ngibafake kanye nalokusele kwembhalo wami, ngoba bangulabakhetsekile kimi; futsi ngiyati bayawukuba ngulabakhetsekile kubomnaketfu.

7 Futsi ngenta loku ngenhloso yekuhlakanipha; ngoba kuyahletjelwa kimi, ngekusebenta kwaMoya weNkhosi lokimi. Manje, angitati tonkhe tintfo; kodvwa iNkhosi itati tonkhe tintfo letitawukwenteka; ngaloko-ke, yona isebenta kimi kutsi ngente ngekwentsandvo yayo.

8 Futsi umthandazo wami kuNkulunkulu umayelana nabomnaketfu, kutsi baphindze babe nelwati ngaNkulunkulu, yebo, inkhululeko yaKhristu; kute baphindze futsi babe bantfu labatsandzekako.

9 Manje mine, Mormon, ngiyachubeka nekucedzela umbhalo wami, lengiwutsatsa kubongcwengcwe baNefi; futsi ngiwenta njengekwati kanye nekucondza Nkulunkulu langinike kona.

10 Ngaloko-ke, kwenteka kutsi emvakwekutsi Amaleki sekanikete labongcwengcwe etandleni tenkhosi Bhenjamini, wabatsatsa wababeka kanye nalalabanye bongcwengcwe, lebebacuketse imibhalo lebeyindluliswe ngemakhosi kwehla, titukulwane ngetitukulwane kute kube tinsuku tenkhosi Bhenjamini.

11 Futsi yandluliswa yehla kusukela enkhosini Bhenjamini, titukulwane ngetitukulwane yate yawela etandleni tami. Futsi mine, Mormon, ngiyathandaza kuNkulunkulu kutsi ilondvoloteke kusukela ngalesi sikhatsi kuya phambili. Futsi ngiyati kutsi itawulondvolotwa; ngoba kukhona tintfo letinkhulu letibhalwe kuyo, lekuyotsi bantfu bami kanye nabomnakabo bahlulelwe ngato ngelusuku lolukhulu nelekugcina, njengekwelivi laNkulunkulu lelibhaliwe.

12 Manje, mayelana naleNkhosi Bhenjamini—yaba nemibango letsite emkhatsini webantfu bayo lucobo.

13 Futsi ngetulu kwaloko kwenteka kutsi emabutfo emaLamani eta ehla aphuma eveni laNefi, kutawulwa nebantfu bakhe. Kodvwa buka, inkhosi Bhenjamini yabutsela ndzawonye emabutfo ayo, yemelana nawo; futsi yalwa ngemandla emkhono wayo lucobo, ngenkemba yaLabani.

14 Futsi ngemandla eNkhosi balwa netitsa tabo, bate babulala letiningi tinkhulungwane temaLamani. Futsi kwenteka kutsi balwa nemaLamani bate bawacosha bawakhipha emaveni onkhe langemafa abo.

15 Futsi kwenteka kutsi emvakwekubakhona kwaboKhristu-mbumbulu, imilomo yabo seyivaliwe, futsi sebajeziswe ngekwemacala abo;

16 Futsi emvakwekubakhona kwebaphrofethi bemanga, nebashumayeli kanye nebafundzisi bemanga emkhatsini webantfu, futsi bonkhe laba sebajezisiwe ngekwemacala abo; futsi emvakwekubakhona kwembango lomkhulu kanye nalokuningi kuhlubukela kumaLamani, buka, kwenteka kutsi inkhosi Bhenjamini, ngekusitwa baphrofethi labangcwele labebasemkhatsini webantfu bakhe—

17 Ngoba buka, inkhosi Bhenjamini bekuyindvodza lengcwele; wabusa ngetulu kwebantfu bakhe ngekulunga; futsi bekukhona labaningi bantfu labangcwele eveni, futsi balikhuluma livi laNkulunkulu ngemandla kanye nangeligunya; futsi basebentisa kucina kwelivi lokukhulu ngenca yekutsi bantfu bebanetinhloko letilukhuni.

18 Ngaloko-ke, ngelusito lwalaba, iNkhosi Bhenjamini, ngekusebenta ngawo onkhe emandla emtimba wakhe kanye nemandla emphefumulo wakhe wonkhe, futsi ngalokunjalo nebaphrofethi, baphindze benta kutsi kubekhona kuthula eveni.