1 Ndɛ da yi na ɔnam nyikyerɛ a wonyae ntsi, asɔfompanyin eduonu anan a wɔyɛ abaguafo kuw no hyiaa mu wɔ Joseph Smith, Kakraba, ne fie, na wɔtseew abaguafo etsitsir dze maa Christ n’asɔr no, dza no mu nyimpa yɛ asɔfompanyin duebien, na president kor anaa baasa dɛ mbrɛ obehia.

2 Nyikyerɛ a wonyae no na wɔnam do dze tseew dɛm abaguafo etsitsir kuw yi, hɔn na wobesiesie nsɛm a ɔyɛ dzen a ɔbɛba asɔr no mu, dza asɔr no anaa bishop n’abaguafo no enntum ennsiesie ma abodwee ammba ekuw no ntamu no.

3 Joseph Smith, Kakraba, Sidney Rigdon, na Frederick G. Williams na dɔm a wɔwɔ nhyiamu no ase gyee hɔn too mu dɛ wɔnyɛ president; Joseph Smith, Panyin, John Smith, Joseph Coe, John Johnson, Martin Harris, John S. Carter, Jared Carter, Oliver Cowdery, Samuel H. Smith, Orson Hyde, Sylvester Smith na Luke Johnson nye asofompanyin a abaguafo no nyinara dze ndze kor yii hɔn dɛ wongyina nyɛ abaguafo mma asɔr no.

4 Afei, wobisaa abaguafo a wɔabobɔ hɔn edzin wɔ ha yi dɛ, ana dwuma a wɔdze ahyɛ hɔn nsa no wɔpen do, na wobedzi dwuma wɔ dɛm dzibew no dɛ mbrɛ sor mbra no se, na hɔn nyina buaa dɛ wɔagye hɔn dwuma no ato mu, na wɔbɛyɛ no dɛ mbrɛ Nyankopɔn n’adom a ɔdze ama hɔn no tse.

5 Nyimpa a wogyinae maa asɔr no, na wɔdze edzin a wɔabobɔ wɔ sor ha no mae ma wɔtoow ho aba no, hɔn dodow yɛ eduanan ebiasa, na hɔn nye yi: Asɔfompanyin baakron, elderfo duesuon, asɔfo baanan, na asɔrmba duebiasa.

6 Wɔtoow aba dɛ: Abaguafo etsitsir no nnyi tum dɛ wɔbɛyɛ biribiara gyedɛ hɔn a wɔabobɔ hɔn edzin no mu beesuon wɔ hɔ, anaadɛ hɔn ananmusifo a woeyi hɔn wɔ no kwan do no wɔ hɔ.

7 Beesuon yi wɔ tum dɛ woyi asɔfompanyin binom a wɔfata na wobotum ayɛ edwuma ma wɔbɛhyɛ abaguafo no a wonnyi hɔ no anan mu.

8 Wɔtoow aba dɛ: aber biara a dzibew bi bɛda hɔ pan wɔ abaguafo a wɔabobɔ hɔn edzin yi ɔnam owu, anaadɛ osian mbrato ntsi woyi obi edzi fi ne dzibew do, anaa otu fi asɔr no bea hɔ a, ɔwɔ dɛ president anaa presidentfo no yi obi ma asɔfompanyin abaguafo no a osian dɛm dwumadzi yi ntsi woehyia mu na wogyina asɔr no ananmu no hwɛ hyɛ nyia oefi mu no ananmu.

9 Wɔnam nyikyerɛ do yi asɔr no mu president a ɔnoara so nye abaguafo no hɔn president no, na asɔrtɔw nyina no kã ho ma wɔgye no to mu dɛ ɔnhwɛ asɔr no do.

10 Na ne dzibew no na ɔma no ho kwan ma ɔhwɛ asɔr no mu abaguafo no do; na ɔyɛ ne ndzinoa dɛ onya presidentfo beenu bi so ma wɔboa no, a wɔnam dɛm kwan kor no ara a wɔnam do yii no no do, yi hɔn.

11 Na sɛ hɔn a wɔboa no no mu kor anaa beenu nyina a woeyi hɔn dɛ wɔmboa no no nnyi hɔ a, ɔwɔ tum dɛ odzi bano wɔ abaguafo no do a ɔboafo biara nnkã ho; na sɛ ɔnoara so nnyi hɔ a, presidentfo no wɔ tum dɛ wogyina n’ananmu hwɛ do, hɔn nyina anaa hɔn mu biara.

12 Aber biara a Christ n’asɔr mu abaguafo etsitsir no behyia wɔ no kwan do no, wɔ nhwɛdo a wɔahyehyɛ ato hɔ no do no, ɔyɛ abaguafo duebien no dwuma dɛ wɔbɔtow aba ahwɛ duebien no hɔn mu nyia ɔwɔ dɛ odzi kan kasa, wɔbɛhyɛ ase efi nkanee kor ara dze ekesi nkanee duebien no.

13 Aber biara a abaguafo yi behyia wɔ asɛm bi ho no, ɔwɔ dɛ abaguafo duebien no dzi kan hwɛ dɛ asɛm no yɛ dzen anaa ɔnnyɛ dzen; sɛ ɔnnyɛ dzen a, abaguafo no mu beenu ara na wɔbɛkasa ho, dɛ mbrɛ woedzi kan akyerɛ wɔ sor ha no.

14 Mbom sɛ wɔdwen ho hu dɛ asɛm no yɛ dzen a, wobeyi baanan, na sɛ ɔyɛ dzen papaapa a, wobeyi beesia; mbom kwan biara do no, onnyi dɛ hɔn a wobeyi hɔn dɛ wɔnkã no bor beesia.

15 Asɛm biara mu no, nyia wɔabɔ no sombo no wɔ kyɛfa dɛ abaguafo no mu fã twitwa gye no, aama woekwetsir dɛ wɔbɛkã nsɛm a ɔnnsɛ akyerɛ no anaadɛ woeebua no ntɛnkyew.

16 Na abaguafo a woeyi hɔn dɛ wɔnkasa wɔ abaguafo no enyim no wɔ dɛ wɔhwehwɛ asɛm no mu yie, hu no mu nokwar nyina ansaana wɔdze asɛm no abɔto abaguafo no nyina enyim, na hɔn mu biara wɔ dɛ ɔkasa wɔ kwan pa na pɛrpɛrdzi do.

17 Dɛm abaguafo a wobeyi hɔn dɛ nkanee a ɔyɛ 2, 4, 6, 8, 10 na 12 nye ankorankor a ɔwɔ dɛ wogyina ma nyia wɔabɔ no sombo no, na wotwitwa gye no, aama woekwetsir dɛ wɔbɛkã nsɛm a ɔnnfata akyerɛ no anaa woeebua no ntɛnkyew.

18 Asɛm biara mu no nyia ɔkɔbɔɔ sombo no, na nyia wɔbɔɔ no sombo no nyina wɔ kwan dɛ wɔkasa dze gye hɔnho wɔ abaguafo no enyim, woetsie adasegye no ewie ekyir no na abaguafo a woeyi hɔn dɛ wɔnhwehwɛ asɛm no mu ewie hɔn asɛm kã no.

19 Woetsie adasefo no, abaguafo no, nyia ɔkɔbɔɔ sombo na nyia wɔbɔɔ no sombo nyina akasa ewie no, afei president no bɛda n’adwen pɔw wɔ asɛm no ho edzi, na oebisa, abaguafo duebien no ma wɔatow aba wɔ adwenpɔw no ho.

20 Mbom sɛ abaguafo nkaa no a wɔannkasa no, anaa hɔn mu kor mpo tsie dasegye no nye no ho akyɛpa no na gyangyanbiara ohu mfom bi wɔ adwen pɔw a president no dze too gua no a, wotum da no edzi, na wodzi asɛm no bio.

21 Na sɛ wodzi asɛm no ahwɛyie mu bio wie na ekyir yi wohu dɛ nokwar bi epue a, ɔbɛsesã adwen pɔw no a ɔbɔe no dɛ mbrɛ ɔfata.

22 Mbom sɛ nokwar biara emmpue bio a, adwen pɔw no ara a odzi kan no do na wogyina, na abaguafo no mu dodowara wɔ tum dɛ wɔkyerɛ dɛmara.

23 Asɛm a ɔyɛ dzen a ɔfa nkyerɛkyerɛ anaa nokwar fapem ho no sɛ dza wɔakyerɛw ato hɔ no nndɔɔsõ a ɔbɛma abaguafo no etum ehu asɛm no mu yie a, dza president no wɔ dɛ ɔyɛ nye dɛ ɔdze asɛm no to Ewuradze enyim ama oeenya Ewuradze n’adwen wɔ ho wɔ nyikyerɛ kwan do.

24 Sɛ asɔfompanyin no wɔ akwantu mu so a, wɔwɔ tum dɛ wohyia mu na wɔfa dɛm kwan yi ara do dze frɛ na wɔhyehyɛ abaguafo bi a wobesiesie nsɛm a ɔyɛ dzen a nkorɔfo dodow biara dze abɔto hɔn enyim no.

25 Na dɛm asɔfompanyin abaguafo no wɔ tum dɛ dɛm aber no woyi hɔn mu kor ma ɔhwɛ nhyiamu no do.

26 Ɔyɛ dɛm abaguafo kuw no hɔn dwuma dɛ wɔkyerɛw kwan a wɔfaa do dzii asɛm bi na dase na nsɛm a wɔkãa wɔ ho nyina dze bɔɔ adwen pɔw no kɛma Asɔr no ne President a Odzi Kan na n’Apamfo no ntsɛmara.

27 Sɛ nkorɔfo a wodzii hɔn asɛm no, anaa hɔn mu binom enyi anngye kwan a dɛm abaguafo no hɔn adwen pɔw no ho a, otum dze kɔto Asɔr no President a Odzi Kan na n’Apamfo no, totɔserɛ abaguafo etsitsir egua no enyim ma wɔsan frɛ asɛm no bio; hɔn so bɛfa nhwɛdo kwan a wɔakyerɛw ato hɔ no do dze akã asɛm no tse dɛ mbrɛ wɔmmbɔɔ adwen pɔw wɔ dɛm asɛm no ho no pɛn mpo.

28 Gyedɛ asɛm no yɛ dzen papaapa, ansaana wɔato nsa afrɛ dɛm asɔfompanyin abaguafo no a wɔwɔ akwantu mu no ma wɔaakã asɔr no mu asɛm no; na sɛ asɛm no nnyɛ dzen biara anaa ho nnhia kɛse biara a, onnhia dɛ wɔto nsa frɛ dɛm abaguafo no.

29 Asɔfompanyin a wɔwɔ akwantu mu anaa wɔtse amanandze no wɔ tum dɛ wɔkã dɛ ohia anaa onnhia dɛ wɔto nsa frɛ dɛm abaguafo no ma wɔba.

30 Soronko bi da abaguafo anaadɛ asɔfompanyin a wɔwɔ akwantu mu no na abaguafo etsitsir a wɔyɛ akwantufo no a wɔyɛ asomafo duebien no hɔn adwen pɔw mu.

31 Hɔn a wodzi kan no hɔn adwen pɔw no, wotum san hwehwɛ mu bio; na mbom kuw a wɔtɔ do ebien no hɔn adwen pɔw no wonntum nnhwehwɛ mu bio.

32 Hɔn a wodzi ekyir yi dze, gyedɛ asɔr no mu dzibewdzi etumdzifo etsitsir na wɔato nsa afrɛ hɔn ebisa hɔn hɔn mbrato ho nsɛm.

33 Wɔgyee too mu: dɛ president anaa presidentfo a wɔtse Asɔr no ne President a Odzi Kan na n’Apamfo egua no do na wobenya tum a wɔdze bua dɛ ohia anaa onnhia dɛ wɔsan dzi asɛm bi a wɔdze abɔto hɔn enyim no bio na wɔahwehwɛ ntotɔserɛ na dase na nsɛm a wɔkãa faa ho no nyina mu.

34 Iyi ekyir no, abaguafo duebien no twee ntonto anaa wɔtoow aba dze hwɛɛ nyimpa a ɔsɛ dɛ odzi kan kasa, na ma no nsunsuando bɛyɛɛ nye yi: 1, Oliver Cowdery; 2, Joseph Coe; 3, Samuel H. Smith; 4, Luke Johnson; 5, John S. Carter; 6, Sylvester Smith; 7, John Johnson; 8, Orson Hyde; 9, Jared Carter; 10, Joseph Smith, Panyin; 11, John Smith; 12, Martin Harris.Wɔbɔɔ mpaa wiei no, wɔdze nhyiamu no baa ewiei.