Eteni 111
Emoniseli epesami na nzela ya Profeta Joseph Smith, na Salem, Massachusetts, na mokolo ya 6, sanza ya mwambe ya mobu 1836. Na ntango oyo bakambi ya Eklezia bazalaki na banyongo ya makasi mpenza likolo ya mikumba na bango kati na mosala ya kosakola. Lokola bayokaki ete mosolo mingi ekomonana mpo na bango na Salem, Profeta, Sidney Rigdon, Hyrum Smith, mpe Oliver Cowdery bakendaki mobembo kuna uta na Kirtland, Ohio, mpo na kosala botuni likolo ya maloba oyo, mpe lisusu mpo na koteya nsango malamu. Bandeko bandimi bakokisaki misala mingi ya mombongo na biloko ya Eklezia mpe bateyaki ndambo ya mateya. Ntango emonanaki kaka lokola ete mpo na bango mosolo ezalaki te, bango bazongaki na Kirtland. Mingi ya biloko minene kati na makambo oyo mazingaki emoniseli oyo elakisami na maloba ya emoniseli yango.
1–5, Nkolo atalelaka mposa ya ntango ya basali na Ye; 6–11, Akosalela Siona na ngolu nyonso mpe akobongisa makambo nyonso mpo na bolamu ya basali na Ye.
1 Ngai, Nkolo Nzambe na bino nazali kosepela na boyei na bino na mobembo oyo, ata kutu maboma na bino.
2 Nazali na biloko mingi ya motuya kati na engumba oyo mpo na bino, mpo na litomba ya Siona, mpe mpo na bato mingi kati na engumba oyo, baoyo nakosangisa na ntango elongobani ya ngai moko, na nzela na bino, mpo na litomba ya Siona.
3 Boye, elongobani ete bosengeli kosala ete boyebana kati na bondeko elongo na bato kati na engumba oyo, lokola bokotindama, mpe lokola ekopesama bino.
4 Mpe ekosalema na ntango elongobani ete nakopesa engumba oyo na maboko na bino, ete bokozwa nguya likolo na yango, na lolenge ete bakoyeba mwango na bino ya nkuku te; mpe nkita na yango oyo esalemi na wolo mpe palata ekozala ya bino.
5 Bomitungisa mpo na oyo etali banyongo na bino te, mpo nakopesa bino nguya ya kofuta yango.
6 Bomitungisa te na oyo etali Siona, mpo nakosala na ye na boboto nyonso.
7 Botikala na esika oyo, mpe na bituka ya nzinganzinga;
8 Mpe esika wapi ezali bolingi na ngai ete bosengeli kotikala, mingi mingi, ekoyebisama epayi na bino na kimia mpe nguya ya Molimo na ngai, oyo mokosopana epayi na bino.
9 Esika oyo bokoki kozwa yango na nzela ya kofutela. Mpe boluka koyeba na molende mpo na oyo etali bafandi mpe babandisi ya kala kala ya engumba oyo;
10 Mpo biloko ya motuya ezali mingi koleka moko mpo na bino kati na engumba oyo.
11 Boye, bozala na bwania lokola nioka mpe nzokande na kozangaka lisumu; mpe nakobongisa makambo nyonso mpo na bolamu na bino, na lombangu lokola bokokoka kozwa yango. Amene.