Eteni 110
Eteni oyo ezali kokundola mamoni oyo ebimisamaki na Profeta Joseph Smith mpe Oliver Cowdery kati na tempelo ya Kirtland, Ohio, na mokolo ya 3, sanza ya minei ya mobu 1836. Ezalaki na libaku ya likita ya mokolo ya Saba. Mambi ya kala ya Joseph Smith masakoli ete: “Na ntango ya nsima ya nzanga, nasalisaki Bakambi mosusu na kokabolaka Elambo ya mpokwa ya Nkolo na Eklezia, esilaki biso kozwa yango uta na Bazomi na mibale, baoyo kani ezalaki na bango litomba ya kosalela na mesa ya bule na mokolo oyo. Nsima ya kosala mosala oyo mpo na bandeko na ngai bandimi, namibendanaki na mesa ya koteyela, ntango bilamba ezalaki ya kokita, mpe namigumbamaki, elongo na Oliver Cowdery, na losambo ya makasi mpe ya nie. Nsima ya kotelema uta na losambo, limoni oyo elandi awa efungwamaki na biso mibale.”
1–10, Yehova Nkolo amonisami na nkembo mpe andimi Tempelo ya Kirtland lokola ndako na Ye; 11–12, Mose mpe Eliyasi bamonani moto na moto na ntango na ye mpe bapesi bafungola mpe bileko na bango; 13–16, Eliya azongi mpe apesi bafungola ya eleko na ye lokola elakamaki na Malaki.
1 Elamba elongolamaki uta na mayele na biso, mpe miso ya bososoli na biso efungwamaki.
2 Tomonaki Nkolo kotelemaka likolo ya etelemelo ya mesa ya koteya, liboso na biso; mpe na nse ya makolo na ye ezalaki libanga esalemi na wolo ya peto, na langi lokola ngelingeli.
3 Miso na ye ezalaki lokola lolemo ya moto; nsuki ya moto na ye ezalaki mpembe lokola mvula ya mpembe pee; elongi na ye engengaki koleka bongengi ya moi; mpe mongongo na ye ezalaki lokola lokito ya mai minene kokitaka na lombangu, kutu mongongo ya Yehova, kolobaka:
4 Nazali ya yambo mpe ya nsuka; nazali ye oyo azali na bomoi, nazali ye oyo babomaki; nazali molobeli na bino epayi ya Tata.
5 Tala, masumu na bino elimbisami bino; bozali peto liboso na ngai; boye, botombolamitu na bino likolo mpe bosepela.
6 Tika mitema ya bandeko na bino bandimi esepela, mpe tika mitema ya bato na ngai nyonso esepela, baoyo basili, na bokasi na bango, kotonga ndako oyo na nkombo na ngai.
7 Mpo tala, nandimi ndako oyo, mpe nkombo na ngai ekozala awa; mpe nakomimonisa na bato na ngai na boboto kati na ndako oyo.
8 Iyo, nakomonana epayi ya basali na ngai, mpe kolobela bango na mongongo na ngai moko, soki bato na ngai bakobomba mitindo na ngai, mpe soki bati bosoto na ndako esantu oyo te.
9 Iyo mitema ya bankoto mpe bankoto zomi mikosepela mingi mpenza mpo na mapamboli oyo makosopana, mpe dotasio oyo basali na ngai balatisami na yango kati na ndako oyo.
10 Mpe lokumu ya ndako oyo ekopalangana na bamboka ya bapaya; mpe oyo ezali ebandeli ya lipamboli oyo ekosopana likolo ya mitu ya bato na ngai. Kutu bongo. Amene.
11 Esilaki limoni oyo kokangama, lola efungolamaki lisusu epayi na biso; mpe Mose amonanaki liboso na biso, mpe apesaki biso bafungola ya bosangani ya Yisalaele uta na biteni minei ya mabele, mpe bokambami ya mabota zomi uta na mboka epayi na nordi.
12 Nsima na oyo, Eliyasi amonanaki, mpe apesaki eleko ya nsango malamu ya Abalayama, kolobaka ete na biso mpe nkona na biso na nkola nyonso nsima na biso ekopambolama.
13 Esilaki limoni oyo kokangama, limoni mosusu ya monene mpe ya nkembo elakisamaki na biso; mpo profeta Eliya, oyo akamatamaki na lola na kozangaka komeka liwa, atelemaki liboso na biso, mpe alobaki:
14 Tala, ntango esili kokoka nie mpenza, oyo elobamaki na monoko ya Malaki—kotatolaka ete ye [Eliya] akotindama, liboso ete mokolo monene mpe ya nsomo ya Nkolo moya—
15 Mpo na kobalola mitema ya batata epayi ya bana, mpe bana epayi ya batata, mbele mokili mobimba mobetama na bolakeli mabe—
16 Boye, bafungola ya eleko oyo epesami na maboko na bino; mpe na oyo bokoki koyeba ete mokolo monene mpe ya nsomo ya Nkolo ezali penepene, kutu na bikuke.