Liyebisi ya Bakambi 1
Biblia mpe Buku ya Mormon eteyi ete libala kati na mwasi moko mpe mobali moko ezali mobeko ya likolo ya Nzambe longola se soki Alobi ndenge mosusu (tala 2 Samwele 12:7–8 mpe Yakobo 2:27, 30). Nsima ya emoniseli moko na Joseph Smith, kosalela mabala na balongani ebele etiamaki na kati ya bandimi ya Eklezia na ebandeli ya mibu 1840 (tala eteni 132). Uta mibu 1860 kino 1880, mbulamatari ya Etazini apesaki mobeko mpo na kopekisa esaleli oyo na biyamba. Mibeko yango misungamaki suka suka na Esambiselo ya Likolo ya Etazini. Nsima ya kozwa emoniseli, Mokambi Wilford Woodruff abimisaki Manifesto oyo elandi, oyo endimamaki na Eklezia lokola uta na bakonzi mpe esengeli kotiama na misala na mokolo ya 6, sanza ya zomi ya mobu 1890. Likambo oyo ememaki nsuka ya kosalela libala na balongani ebele kati na Eklezia.
Epayi ya nani Ekoki Kozala Lotomo:
Awa esili mikanda ya bapanzi nsango kotambwisama mpo na ntina ya politiki, uta Salt Lake City, oyo mibimisami na etando ya ekolo mobimba, na ndimbola ete Lisanga ya Maponami ya Utah, kati na mbando na bango ya sika na Sekeletele ya Mambi ya Mboka, balobi ete mabala na balongani ebele ezali se kosalema polele mpe ete mabala ntuku minei to mingi koleka esalemaki na Utah na sanza ya motoba eleki soki te na bowumeli ya mobu eleki, mpe lisusu ete na koloba na bango liboso epayi ya bato bakambi ya Eklezia bateyaki, balendisaki mpe bapusaki bato bakoba na momeseno ya libala ya ndongo—
Boye, ngai, lokola Mokambi ya Eklezia ya Yesu Klisto ya Basantu ba Mikolo mya Nsuka, nalobi awa, na lolenge ya lipombo koleka, nalobi ete bofundi oyo ezali lokuta. Tozali te koteya libala ya ndongo to mabala na balongani ebele, ezala kopesa moto mokna nzela ya kosalela yango, mpe nawangani ete ezala mabala ntuku minei to mpe motango mosusu ya mabala na balongani ebele makulisamaki na eleko wana kati na Batempelo na biso to mpe na esika mosusu kani kati na Telitwale.
Likambo se moko eyebisamaki, na oyo wapi bafundi balobi ete libala esalemaki kati na Endowment House (Ndako ya Dotasio), na Salt Lake City, na eleko ya milona ya mobu 1889, kasi nakokaki te koyeba nani asalaki molulu yango; nyonso oyo esalemaki na likambo wana eyebanaki epayi na ngai te. Mpo na oyo balobi ete esalamaki kati na Endowment House (Ndako ya Dotasio), na malakisi na ngai, ebukamaki noki.
Mbala mingi lokola mibeko misilaki kopesama na Likita ya bantoma nyonso kopekisaka mabala na balongani ebele, wapi mibeko milobamaki kozala ya mobeko likonzi na ndako ya basambisi ya botubi ya nsuka, nasakoli awa mokano na ngai ya komiyangelama na mibekowana, mpe kosalela nguya na ngai elongo na bandimi ya Eklezia likolo ya oyo nayangeli ete basala mpe lokola.
Ezali na eloko moko te kati na mateya na ngai na Eklezia to kati na oyo wana ya baninga na ngai bakambi, na ntango oyo epesami, oyo ekoki kolimbolama lokola kokotisa na mitema soki mpe kolendisa libala ya ndongo; mpe ntango Mpaka moko ya Eklezia asaleli elobeli oyo emonani kopesa liteya ya lolenge wana, asilaki na lombangu kopamelama. Mpe sikawa nalobi yango polele na bato nyonso ete bokebisi na ngai na Basantu ya Mikolo ya Nsuka ezali komipekisa kosala libala oyo kani epekisami na mobeko ya mboka.
Wilford Woodruff
Mokambi ya Eklezia ya Yesu Klisto
ya Basantu ba Mikolo mya Nsuka.
Mokambi Lorenzo Snow alakisaki oyo elandi:
“Napesi likanisi ete, mpo toyebi Wilford Woodruff lokola Mokambi ya Eklezia ya Yesu Klisto ya Basantu ba Mikolo mya Nsuka, bobele se moto oyo likolo ya mabele na ntango oyo, oyo azali na bafungola ya makuli ya bokangi, tokamati ye mpenza lokola oyo apesami likoki na libongi ya mosala na ye ya kobimisa Manifesto oyo matangami awa na matoyi na biso, mpe oyo matiami elaka ya 24, sanza ya libwa ya mobu 1890, mpe ete lokola Eklezia eyangani na Likita Monene, tondimi mayebisi na ye mpo na oyo etali mabala na balongani ebele lokola se liuti na bakonzi mpe esengeli kotiama na misala.”
Salt Lake City, Utah, ya 6, sanza ya zomi ya mobu 1890.
Matangi uta na Masakoli Misato na
Mokambi Wilford Woodruff
mpo na oyo etali Manifesto
Nkolo akopesa soki moke te nzela epayi na ngai to epayi ya moto mosusu oyo afandi na ebonga lokola Mokambi ya Eklezia oyo mpo na kobungisa bino. Oyo ezali kati na manaka te. Oyo ezali kati na mayele ya Nzambe te. Soki nasengelaki komeka oyo wana, mbele Nkolo alingaki kolongola ngai uta na esika na ngai, mpe akosala bongo na moto nyonso oyo akomeka kobungisa bana ya bato uta na maloba kitoko ya molimo ya Nzambe mpe uta na mosala na bango. (Likita Monene ya Katikati ya mobu ya mbala ntuku motoba na yambo ya Eklezia, na mokolo ya yambo ya mosala, ya 6, sanza ya zomi ya mobu 1890, Salt Lake City, Utah. Nsango epesamaki na zulunale Deseret Evening News, ya 11, sanza ya zomi ya mobu 1890, lok. 2.)
Likambo ezali te soki nani azali na bomoi soki mpe nani akufi, soki nani abiangami kokamba Eklezia oyo, basengeli nde kokamba yango engebene na bofuli ya Nzambe ya Bokasi nyonso. Soki basali yango na lolenge oyo te, bakoki mpe kosala yango soki moke te. …
Nazwaki kala mingi te boko bimoniseli mosusu, mpe ya motuya monene mpo na ngai, mpe nakoyebisa bino nini Nkolo alobelaki ngai. Tika ete namema mayele na bino na oyo ebiangami manifesto. …
Nkolo ayebisaki ngai natuna Basantu ya Mikolo ya Nsuka motuna moko, mpe Ayebisaki ngai lisusu ete soki balingi kotia litoyi na nini nalobaki epayi na bango mpe koyanola motuna motunani epayi na bango, na Molimo mpe nguya ya Nzambe, balingaki kopesa eyano lolenge se moko, mpe balingaki nyonso kondima se lolenge moko mpo na oyo etali likambo oyo.
Motuna ezali oyo: Nini ezali nzela ya bwania koleka mpo na Basantu ya Mikolo ya Nsuka kolanda—kokoba komeka kosalela libala na balongani ebele, elongo na mibeko ya ekolo koboyaka yango mpe botelemeli ya bato nkoto ntuku motoba, mpe kofutaka ntalo ya bobotoli ya bozwi ya bato mpe bobungisi ya Batempelo, mpe bosukisi ya makuli nyonso kati na yango, ezala mpo na bato na bomoi mpe bakufi, mpe bokangami na boloko ya Bokambi ya Yambo mpe Bazomi na mibale mpe bakambi ya mabota kati na Eklezia, mpe bobotoli ya bozwi ya bato (nyonso oyo na yango moko esengeli kosukisa momeseno yango); to, nsima ya kosala mpe konyokwama nini oyo tozwi na nzela ya botosi na biso na libongisi oyo to kosukisa momeseno yango mpe komipesa na mobeko, mpe na nzela ya kosalaka bongo kotika Baprofeta, Bapostolo mpe batata bipayi na bango, ete bakoka kolakisa bato mpe koya na misala ya Eklezia, mpe lisusu kotika Batempelo na maboko ya Basantu ete bakoka koya kosala makuli ya Nsango malamu, ezala mpo na bato na bino oyo bazali na bomoi mpe bakufi na bino?
Nkolo alakisaki ngai na nzela ya limoni mpe ya emoniseli nini ekosalema soki totikaki te momeseno oyo. Soki tosukisaki yango te, bolingaki te kozala na ntina ya … moto moko te ya bato oyo bazali na tempelo oyo ya Logan; mpamba te makuli nyonso elingaki kokangama na kati ya mabele ya Siona. Mobulu molingaki koyangela na kati ya Yisalaele, mpe bato mingi balingaki bakomisama bakangemi. Mobulu oyo elingaki koya likolo ya Eklezia mobimba, mpe tosengelaki kotindama kosukisa momeseno yango. Sikawa, motuna ezali, ezala soki momeseno yango esengelaki kosukisama na lolenge oyo, to na lolenge Nkolo amonisi epayi na biso, mpe kotika Baprofeta mpe Bapostolo mpe batata na biso bato ya nsomi, mpe batempelo na maboko ya bato, mpo ete bakufi bakoka kosikolama. Motango monene esilaki kala kokangolama uta na ndako ya boloko na mokili ya milimo na bato na ye, mpe mosala mokokoba to mokosukisa? Oyo ezali motuna natie liboso ya Basantu ya Mikolo ya Nsuka. Bokata makambo bino moko. Nalingi bopesa yango eyano bino moko. Nakopesa yango eyano te; kasi nalobi na bino wana ezali solo mpenza lolenge biso lokola bato tolingaki kozala soki tokamataki nzela tozwi te.
… Namonaki solo mpenza nini elingaki koleka soki eloko yoko esalamaki te. Nasili kozwa molimo oyo likolo na ngai mpo na ntango molai. Kasi nalingi koloba eye: Esengelaki natika batempelo nyonso kokende uta na maboko na bino; nasengelaki kokende na boloko ngai moko, mpe kotika bato nyonso mosusu kokende kuna, soki Nzambe ya lola atindaki ngai kosala oyo nasalaki mpenza te; mpe ntango ngonga ekokaki ete natindamaki kosala oyo wana, ezalaki nyonso polele epayi na ngai. Nakendaki liboso ya Nkolo, mpe nakomaki nini Nkolo ayebisaki ngai kokoma. …
Natiki oyo epayi na bino, mpo ete bomanyola mpe botala yango malamu. Nkolo azali kosala elongo na biso. (Likita ya likonzi ya Logan, Cache, Utah, Mokolo ya eyenga, ya yambo, sanza ya zomi na moko ya mobu 1891. Nsango epesamaki na zulunale Deseret Weekly, ya 14, sanza ya zomi na moko ya mobu 1891.)
Sikawa nakoyebisa bino nini emonisamaki epayi na ngai mpe nini Mwana ya Nzambe asalaki na likambo oyo. … Makambo nyonso oyo elingaki koleka, lokola Nzambe ya Bokasi nyonso azali na bomoi, soki Manifesto epesamaki te. Boye, Mwana ya Nzambe amonisaki motema na ngai kondima ete likambo wana elakisama epayi na eklezia mpe epayi na mokili mpo na ntina oyo ezali kati na mayele na ye moko. Nkolo azwaki mokano ya kotia Siona. Azwaki mokano ya kosilisa tempelo oyo. Azwaki mokano ete lobiko ya bato na bomoi mpe ya bakufi esengeli kopesama na banse oyo ya bangomba. Mpe Nzambe ya Bokasi nyonso azwaki mokano ete Zabulu akoki kopekisa yango te. Soki bokoki kososola oyo wana, fungola na yango ezali wana. (Ezwami uta na liteya epesamaki na eleko ya motoba ya bobulisi ya Tempelo ya Salt Lake, sanza ya minei ya mobu 1893. Mikanda Mibetami na masini ya Misala ya Bobulisi, Ebombelo ya Masolo ya Makomi, Etuka ya Mambi ya Kala ya Eklezia, Salt Lake City, Utah.)