1 From se Lod i bin talemaot long mi se ol enemi blong mi, tugeta long Misuri mo long Stet ia, oli stap lukaotem mi bakegen; mo from se oli stap kam lukaotem mi we i no gat wan risen blong hem, mo oli no gat wan pis sado o kala blong jastis, o raet we i stap long saed blong olgeta blong stap statem ol kot kes agensem mi; mo from se evri samting we oli stap priten blong talem oli stanap long giaman samting olsem peint we i dak, i dak evriwan, mi ting se hem i nid mo i waes blong mi aot long ples ia blong wan sot taem, blong mi save stap sef, mo blong pipol ia i stap sef. Mi wantem talem long olgeta evriwan we mi bin mekem bisnis wetem, se mi livim ol wok blong mi wetem ol ripresentativ mo ol klak we bae oli mekem ol wok long wan fasin we i kwik mo i stret, mo bae mi mekemsua se mi pemaot evri kaon blong mi long stret taem; hemia taem bae mi salem ol propeti, o, sapos no, olsem we i nid, o, olsem we mi save mekem. Taem mi lanem se strong win i finis evriwan, nao bae mi kambak long yufala bakegen.

2 Mo long saed blong ol denja we Lod i singaotem mi blong mi pas tru long olgeta, oli olsem wan smol samting long mi, from se fasin blong man i wantem samting mo bigfala nogud kros blong man, i bin pat blong evri dei blong laef blong mi; from wanem i hapen olsem, mi no save andastanem; be nomo sapos Lod i bin odenem mi stat long stat blong wol from sam gud samting, o nogud samting, i stap long yufala long olsem wanem yufala i jusum blong singaotem. Yufala i mas jajem blong yufalawan. God i save evri samting ia, se oli gud o nogud. Be, wota we i dip, hem i wanem we mi stap swim long hem oltaem. Hem i olsem wan samting nating long mi; mo mi filim, olsem Pol, blong stap glad long taem blong hadtaem; from se kasem tedei, God blong ol papa blong mi i bin mekem mi fri long olgeta evriwan, mo bambae hem i mekem mi fri stat long naoia i go; from luk, mo luk gud, bambae mi winim evri enemi blong mi, from we Lod God i bin talem samting ia.

3 From hemia, evri sent oli mas stap glad mo mas stap glad tumas; from God blong Isrel i God blong olgeta, mo bae hem i givim wan stret praes olsem pei antap long hed blong olgeta evriwan we oli stap mekem nogud long olgeta.

4 Mo bakegen, i tru, olsem ia nao Lod i talem: Bae wok blong tempol blong mi, mo evri wok we mi bin givim long yufala, bae i mas gohed mo i no mas stop; mo fasin blong yufala blong wok strong wetem strong tingting, mo fasin blong yufala blong stap gohed blong wok, mo fasin blong yufala blong save wet longtaem, mo ol wok blong yufala, bae oli mas dabol, mo bae yufala i no save lusum pei blong yufala nating, mi, Lod blong Ol Pipol mi talem. Mo sapos oli givim hadtaem long yufala, olsem ia nao oli bin givim hadtaem long ol profet mo ol stret mo gud man we oli bin stap fastaem long yufala. From evri samting ia, i gat wan pei i stap long heven.

5 Mo bakegen, mi givim wan toktok long yufala long saed blong baptaes blong ol dedman blong yufala.

6 I tru, olsem ia nao Lod i talem long yufala long saed blong ol dedman blong yufala: Taem eniwan long yufala i baptaes long bihaf blong ol dedman blong yufala, bae i mas gat wan man blong raetem rekod blong hem, mo hem i mas stap olsem wan ae witnes long ol baptaes blong yufala; bae hem i mas harem wetem ol sora blong hem, blong hem i testifae wetem trutok, Lod i talem;

7 Blong mekem se evri samting we yufala i raetemdaon, bae oli raetemdaon tu long heven; blong wanem we yufala i silim long wol ia, bae oli silim long heven; blong wanem we yufala i tekemaot long wol ia, bae oli tekemaot long heven;

8 From we bae mi stap rere blong putumbak plante samting long wol, long saed blong prishud, Lod blong Ol Pipol i talem.

9 Mo bakegen, yufala i mas kipim ol rekod oli stap long oda oltaem, blong oli save stap long ol akaev blong tabu tempol blong mi, blong oli stap tingbaot stat long wan jeneresen i go long narafala jeneresen, Lod blong Ol Pipol i talem.

10 Bae mi talem long evri sent, se mi bin wantem, wetem ful hat blong mi, blong stanap long pulpit mo toktok long olgeta long saed blong baptaes blong ol dedman, long nekis Sabat dei. Be, from se bae i no posibol blong mi mekem, bae mi raetem toktok blong Lod wanwan taem, long saed blong topik ia, mo tu, long saed blong plante narafala samting, mo sendem i kam long yufala tru long leta.

11 Naoia, mi endem leta blong mi fastaem, from mi no gat tumas taem; from enemi i stap lukaot, mo olsem we Sevya i bin talem, prins blong wol ia i stap kam, be hem i no gat paoa long mi.

12 Luk, prea blong mi we i go long God, i blong mi sevem yufala evriwan. Mo mi saenem nem blong mi, olsem wokman blong yufala long wok blong Lod, we mi profet mo sia blong Jos Ia blong Jisas Kraes blong Ol Lata-dei Sent.