Eteni 12
Emoniseli epesami na nzela ya Profeta Joseph Smith epayi ya Joseph Knight Tata na Harmony, Pennsylvania, na sanza ya mitano ya mobu 1829. Joseph Knight andimaki nsango ya Joseph Smith ete azali na bapalaki ya Buku ya Mormon mpe andimaki mosala ya bobongoli oyo ezalaki kokende liboso na ntango wana mpe mbala mingi apesaki lisalisi na biloko epayi ya Joseph Smith mpe mokomeli na ye, oyo lipesaki bango makoki ya kokoba kobongola. Na bosenga ya Joseph Knight, Profeta alukaki koyeba uta na Nkolo mpe azwaki emoniseli yango.
1–6, Basali kati na elanga ya vinyo bakozwa lobiko; 7–9, nyonso oyo bazali na mposa mpe bazali na makoki bakoki kopesa lisalisi na mosala ya Nkolo.
1 Mosala monene mpe ya kokamwa ezali penepene na kosalema na kati ya bana ya bato.
2 Tala, nazali Nzambe; tiaka bokebi na liloba ya ngai, oyo ezali na bomoi mpe nguya, na mopotu koluta mipanga nyonso mipeli bipayi nyonso mibale, kino na kokabola biteni ya matongi mpe mafuta, mpe boye, tiaka bokebi na liloba ya ngai.
3 Tala, elanga esili kokomela mpo na kobuka; mpe boye, ye oyo alingi kobuka mbuma tika ye akata na likwangola na bokasi na ye, mpe abuka mbuma wana ezali mokolo kowumela, ete akoka kobomba mpo na lobiko ya libela ya molimo na ye kati na bokonzi ya Nzambe.
4 Iyo, moto nyonso oyo akokata na likwangola mpe akobuka, se moko oyo kaka abiangami na Nzambe.
5 Boye, soki okosenga uta na ngai okozwa; soki okobeta bakofungolela yo.
6 Sikawa, lokola osengaki, tala, nalobi epayi na yo, bomba mitindo na ngai, mpe luka komema liboso mpe kotia ntina ya Siona.
7 Tala, nalobi epayi na yo, mpe lisusu epayi ya baoyo nyonso bazali na mposa ya komema liboso mpe kofandisa mosala oyo;
8 Mpe moto moko te akoki kopesa lisalisi kati na mosala oyo longola se soki akozala na bomikitisi mpe soki atondi na bolingo, kozalaka na bondimi, elikya, mpe bolingani, kozalaka na montei na makambo nyonso, nyonso oyo mokumba mopesami epayi na ye.
9 Tala, nazali pole mpe bomoi ya mokili, oyo azali koloba maloba oyo, boye tiaka bokebi na bokasi na yo nyonso, mpe nsima nde okobiangama. Amene.