1 Blong silim testemoni blong buk ia mo blong Buk blong Momon, mifala i talemaot se Profet Josef Smit, mo Petriak Haeram Smit, tufala i bin ded from bilif blong tufala. Wan grup blong ol man we oli holem masket—we oli peintem fes blong olgeta i blak—mo i gat samples 150 kasem 200 man long hem, oli bin sutum tufala i ded long Katej kalabus, long namba 27 Jun 1844, samples long faef klok aftenun. Oli sutum Haeram faswan, mo hem i bin foldaon mo singaot se: !Mi mi wan dedman! Josef i jiamaot long windo, mo oli bin sutum hem i ded, mo hem i singaot se: !O Lod, God blong mi! Afta we tufala i ded, oli bin sutum tufala bakegen long wan prapa nogud fasin, mo tufala tugeta i kasem fo bolet long wanwan long tufala.

2 Jon Teila mo Wilad Rijads, tu long Olgeta Twelef, tufala nomo i bin stap insaed long rum long tetaem ia; Jon Teila i kasem bigfala kil wetem fo bolet, be i kam gud finis; Wilad Rijad, tru long help blong God, i laef, mo i no kasem wan hol long klos blong hem.

3 Josef Smit, Profet mo Sia blong Lod, i bin mekem moa, be i no moa bitim Jisas, from wok ia blong fasin blong sevem man long wol ia bitim eni narafala man we i bin laef long wol ia. Long sotfala taem blong twante yia, hem i bin tekem Buk blong Momon i kam, we hem i bin transletem tru long presen mo paoa blong God, mo hem nao i bin rod ia blong oli printim long tufala bigfala pat blong wol; hem i bin sendem ful gospel we i no gat en we i stap insaed long buk ia, i go long ol fo pat blong wol ia; hem i bin tekem ol revelesen mo ol komanmen i kam, we oli stap insaed long buk ia blong Doktrin mo Ol Kavenan, mo tu, plante narafala pepa mo instraksen blong gud blong ol pikinini blong man; hem i bin mekem plante taosen Lata-dei Sent oli kam tugeta, oli setemap wan bigfala taon, mo hem i bin livim wan stori mo wan nem i stap we bae oli no save kilimdaon. Long ae blong God mo ol pipol blong hem, hem i bin wan haeman long laef mo long ded blong hem; mo semmak long olgeta we Lod i bin jusum long taem bifo, hem i bin silim misin blong hem mo ol wok blong hem wetem blad blong hemwan; mo i semmak long brata blong hem, Haeram. !Long laef ia long wol, tufala i no bin seperet, mo long ded, tufala i no bin seperet!

4 Taem Josef i bin go long Katej blong sarenda long wanem we oli talem se loa i talem, tu o tri dei bifo oli kilim hem i ded, hem i bin talem: “Mi stap olsem wan smol sipsip we i go blong oli kilimded hem; be mi mi kwaet nomo olsem moning blong wan gudfala dei; mi, tingting blong mi i no gat wan rong agensem God, mo agensem evri man. Bae mi ded mo bae mi no gat rong, be yet, bae oli talem hemia abaot mi—oli no gat sore nating mo kilimded hem.”—Long semfala moning ia, afta we Haeram i mekem hem i rere blong go—?weswe? ?bae yumi talem se blong go long ples blong kilimded ol animol? Yes from i bin olsem—hem i bin ridim ol toktok ia, kolosap long en blong nambatwelef japta blong buk blong Ita, insaed long Buk blong Momon, mo i makem pej ia mo tanem kona blong hem:

5 Mo i bin hapen se mi bin prea long Lod se bae hem i gat gladhat long olgeta Jentael, blong mekem se oli save gat bigfala lav. Mo i bin hapen se Lod i bin talem long mi: Sapos oli no gat bigfala lav, i nomata long yu, yu bin fetful; taswe, ol klos blong yu bae oli kam klin. Mo from yu bin luk wanem yu no strong long hem, nao bae yu kam strong, i go kasem we bae yu sidaon long ples we mi bin mekem rere long haos blong Papa blong mi. Mo naoia mi … talem tata long olgeta Jentael; yes, mo tu, long olgeta brata we mi lavem, kasem taem we yumi mit long fored blong jajmen jea blong Kraes, ples we evri man bae i save se ol klos blong mi oli no gat mak blong blad blong yu. Tufala man we i testifae, tufala i ded naoia, mo testeman blong tufala i laef mo gat paoa.

6 Haeram Smit i bin gat fotifo yia long Febwari 1844, mo Josef Smit i bin gat teti-eit yia long Disemba 1843; mo stat long taem ia i go, bae nem blong olgeta i stap wetem nem blong olgeta man we oli bin ded from bilif blong olgeta; mo man we i ridim buk ia long evri nesen, bae i save tingbaot se Buk blong Momon, mo buk ia, Doktrin mo Ol Kavenan blong jos, tufala i kam wetem praes blong hem, we i blad blong tufala gud man long nambanaentin senturi, blong mekem se fasin blong sevem man i kam long wan wol we i nogud tumas; mo sapos faea i save bonemdaon wan grin tri from glori blong God, nao bae i isi moa blong bonemdaon ol drae tri blong mekem plantesen blong ol nogud fasin i kam klin mo tabu. Oli bin laef blong kasem glori; oli bin ded blong kasem glori; mo glori, hemia praes we i no save finis blong olgeta. Bambae ol yia oli pas i go, be nem blong tufala, bae oli pasem i go long laen blong tufala olsem ol sas ston we i blong olgeta we oli kam tabu.

7 Tufala i no gat rong, olsem we kot i bin pruvum bifo, mo oli bin putum tufala long kalabus from ol sikret plan blong ol giaman fren mo ol nogud man; mo blad blong tufala we i no gat rong long floa blong Katej kalabus i wan bigfala sil we i fas long “ol Momon”, we eni kot long wol ia i no save sakemaot, mo blad blong tufala we i no gat rong we i stap long moto blong Stet blong Ilinoa, wetem promes blong fet blong Stet we gavna i brekem, i stap olsem wan witnes blong trutok blong gospel we i no gat en mo ful wol i no save talem se i no tru; mo blad blong tufala we i no gat rong i stap long flag blong fridom, mo long ofisol pepa blong Yunaeted Stet, mo i stap olsem wan ambasada blong relijin blong Jisas Kraes, we bae i tajem hat blong ol man we oli ones long medel blong ol nesen; mo blad blong tufala we i no gat rong, wetem blad we i no gat rong blong evri man we oli bin ded from bilif blong olgeta andanit long olta we Jon i bin luk, bae oli krae long Lod blong Ol Pipol kasem taem hem i pembak blad ia long wol. Amen.