Ɔfã 14
Nyikyerɛ a wɔnam Joseph Smith Nkɔnhyɛnyi no do dze maa David Whitmer, wɔ Fayette, New York, Ɔbiradzi, 1829. Whitmer ebusua no enya enyigye kɛsenara wɔ Mormon Nwoma no a wɔrekyerɛ ase no ho. Joseph kɛtsenaa Peter Whitmer Panyin, ne fie, ɔtsenaa hɔ kesii dɛ owiee nwoma no n’ase kyerɛ, na ne nsa kãa nwoma no a wɔdze rubopue guado no tum a wɔdze bɔkora do. Whitmer ne mbabanyin baasa no a, hɔn mu kor biara enya dase wɔ edwuma no no nokwar ho no, okitsaa hɔn dzendzen dɛ wobenya hɔn ankorankor dwuma bi edzi wɔ mu. Nyikyerɛ yi, nye ebien a odzi do no (afã 15 na 16) nye mbuae a wɔdze mae wɔ dza wɔnam Urim na Thummim do bisae no ho. Ekyir no, David Whitmer bɛyɛɛ Mormon Nwoma ho Adasegyefo Baasa no mu kor.
1–6, Edwumayɛfo a wɔwɔ wenyin ture no mu no benya nkwagye; 7–8, Onnyiewiei nkwa nye Nyame n’akyɛdze no mu dza ɔyɛ kɛse; 9–11, Christ na ɔbɔɔ sor na asaase.
1 Dwumadzi a ɔsõ na ɔyɛ ahobow rubopue adasamba mu.
2 Hwɛ, meyɛ Nyame; hom ntsie m’asɛm a nkwa na tum wɔ mu no, ɔyɛ ndam sen nkrantsee anofanu, na ohwira mu kodu dɛ ɔpaapaa akwaa nye ehuon nyina mu, dɛm ntsi hom tsie m’asɛm.
3 Hwɛ, haban no ahoa na twaber no asõ; dɛm ntsi, obiara a ɔpɛ dɛ otwa no, wɔmma ɔmfa n’ahoɔdzen ntow ne kantankrankye na ontwa ber a adzekyee wɔ do yi, ama ɔakora nkwagye a ɔwɔ hɔ daapem dze ama ne kra wɔ Nyame n’ahenman no mu.
4 Nyew, obiara a ɔbɔtow ne kantankrankye na oetwa no, ɔnoara na Nyame afrɛ no.
5 Dɛm ntsi, sɛ ibisa me a, wo nsa bɛkã; sɛ ebɔ mu a wobobue ama wo.
6 Hom mper dɛ hom bɛkyekyer me Zion. Dzi me mbrasɛm do wɔ adze nyinara mu.
7 Na sɛ idzi me mbrasɛm do na itsim kodu ewiei a ibenya onnyiewiei nkwa, akyɛdze a ɔsõ sen Nyame n’akyɛdze nyina.
8 Na ɔbɛba dɛ, sɛ ibisa Egya no wɔ me dzin mu wɔ gyedzi mu na egye dzi a, ibenya Sunsum Krɔnkrɔn no a okenyan wo ma ekasa, ama eegyina ayɛ ndzɛmba a ebɛtse nye dza ibohu nyina ho dasefo, na eso dɛ aabɔ nnuho ho dawur akyerɛ ebusuasantsen yi.
9 Hwɛ, emi nye Jesus Christ, Nyame tseasefo ne Ba no, nyia ɔbɔɔ ɔsorsor nye asaase, kan a sum nnkotum akata do;
10 Dɛm ntsi, ɔwɔ dɛ mefa me asɛmpa ne mãhyɛ no fi Amanamamfo hɔ dze brɛ Israel fifo.
11 Na, hwɛ, ɔwo nye David, ɔafrɛ wo dɛ bɔboa; na sɛ eyɛ dɛm ndzɛmba yi, na eyɛ nokwafo a, obehyira wo wɔ sunsum nye honam mu nyina, na w’akatua bɛyɛ kɛse. Amen.