1 Koi Au na Alifa kei na Omeka, na Karisito na Turaga; io, sai Au ga ko koya, na ivakatekivu kei na ivakataotioti, na Dauveivueti kei vuravura.

2 Ia koi Au, niu sa mai vakayacora ka vakacavara na lomai koya ka taukeni au, io na Tamada, me baleti au—au sa kitaka na ka oqo meu vakamalumalumutaka kina vei au na veika kecega—

3 Raica sa tu vei au na kaukauwa kecega, io me vakarusai sara mada ga kina ko Setani kei na nona cakacaka ena ivakataotioti kei vuravura, io ena siga levu ni veilewai, kau na solia vei ira kecega sa tiko kina, ka lewai ira kina na tamata ena nodra ivalavala kei na veika era a kitaka.

4 Ia sa dina sara me ra veivutuni na tamata kecega de ra na cudruvi, ni koi Au, na Kalou, sa tawacava.

5 O koya, niu sa sega ni dau vakasuka na noqu lewa, ia ena yaco ga na cudruvi, na dautagi, na tagiyaso kei na vakasequruqurubati io, vei ira era na kune ena ligaqu imawi.

6 Ia, sa sega ni volai ni na sega ni oti na rarawa, ia sa volai ni na tawacava na rarawa oqo.

7 Sa volai tale ga ni ra na cudruvi me tawamudu; o koya sa vakamatatataki sara na tikina oqo mai na ivolanikalou tale eso, me rawa ni cakacaka kina ka uqeta na lomadra na luve ni tamata, na veika kece ko ya me vakalagilagi kina na yacaqu.

8 O koya, au na vakamacalataka vei kemudou na veika vuni oqo, ni sa kilikili mo dou kila me vakataki ira na noqu iapositolo.

9 Au sa tukuna vei kemudou sa digitaki ena vuku ni ka oqo, mo dou vaka e le dua bau ga mo dou curu ki na noqu ivakavakacegu.

10 Ia, raica, na veika vuni ni bula vakalou, sa cecere vakaidina! Ia, raica, Au sa tawacava, ia na itotogi sa soli mai ligaqu sa itotogi tawacava, ni yacaqu ko Tawacava. O koya—

11 Na totogi tawamudu sa itotogi ni Kalou.

12 Na totogi tawacava sa itotogi ni Kalou.

13 O koya, Au sa vakaroti iko kina mo veivutuni, ka muria na noqu ivakaro ko sa ciqoma mai na ligana na noqu tamata ko Josefa Simici Lailai ena yacaqu;

14 Ia mai na noqu kaukauwa cecere ko sa ciqoma kina na veika ko ya;

15 O koya au sa vakarota kina mo veivutuni—veivutuni, deu na yaviti iko ena ititoko ni gusuqu, kei na noqu cudru, kei na noqu cudru waqawaqa, raica ena mosi na nomu rarawa—na kena mosi ko sa sega ni kila, na kena bibi ko sa sega ni kila, io, na kena dredre mo vosota ko sa sega ni kila.

16 Ia raica, koi Au na Kalou, au sa vakararawataki oti ena veika oqo ena vukudra kece, me ra kakua kina ni sotava na rarawa kevaka era sa veivutuni;

17 Ia kevaka era sa sega ni veivutuni era na vakararawataki me vakataki Au;

18 Na rarawa sa vakavuna vei au, na Kalou sara mada ga, ko koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yagoqu, ka sa rarawa sara kina na yagoqu kei na yaloqu—kau sa gadreva meu kakua ni gunu mai na bilo wiwi, ka vakasuka—

19 Ia, me vakalagilagi ga ko Tamaqu, kau sa gunuva na bilo ka vakacavara na noqu vakavakarau vei ira na luve ni tamata.

20 O koya, au sa vakaroti iko tale oqo mo veivutuni, deu na vakayalomalumalumutaki iko ena noqu kaukauwa cecere, mo tusanaka na nomu ivalavala ca, de na tau vei iko na itotogi kau tukuna tiko, ka ko a sota kaya na kena ka lailai sara ena gauna au a vakasuka kina na Yaloqu.

21 Au sa vakaroti iko mo kakua ni vunautaka tale e dua na ka ia na veivutuni ga, ia mo kakua mada ni vakatakila na veika oqo ki vuravura me yacova na gauna au sa lewa vakayalomatua kina.

22 Ni ra se sega ni rawata na lewenimanumanu, ia me ra vagunuvi mada ga ena sucu; raica, o koya me ra kakua mada ni kila na veika oqo, de ra na rusa kina.

23 Mo vuli vei au, ka muria na noqu vosa; mo bula ena yalomalua ni Yaloqu, ko na rawata kina na noqu vakacegu.

24 Koi Au ko Jisu Karisito; sa talai au mai ko Tamaqu, kau sa vakayacora na lomana.

25 Kau sa tukuna tale, au sa vakaroti iko mo kakua ni kocova na watina na kai nomu; io mo kakua tale ga ni segata mo vakamatea na kai nomu.

26 Kau tukuna tale, au sa vakaroti iko tale ga mo kakua ni kocokoco ena vuku ni nomu iyau, ia mo solia wale ga me tabaki kina na iVola i Momani, ka tiko kina na dina kei na vosa ni Kalou—

27 Oqori na noqu vosa vei ira na Matanitu tani, ka na sega ni dede sa na lako vei ira na Jiu, ka ra kedra ivovo ko ira na Leimanaiti, me ra vakabauta kina na kosipeli, ka kakua ni ra vaqara tiko na Mesaia me lako mai ni sa lako oti mai.

28 Kau tukuna tale, au sa vakaroti iko tale ga mo daumasu votu ka vakatalega kina na masu e vu ni yalomu; io, masu e matana levu se na tikina vuni, ena mata ni lewe levu se na nomu tikina taudua.

29 Ia mo kacivaka yani na itukutuku rekitaki, io, kacivaka ena veiulunivanua, kei na veitikina cecere, ka vakakina ena kedra maliwa na tamata ko na vakatarai mo raici ira.

30 Ka mo vakayacora ena yalomalumalumu, ka vakabauti au, kakua ni vosavakacacataki ira na dau veivakacacani.

31 Raica mo kakua ni vunautaka na ivakavuvuli dredre, ia mo vunautaka ga na veivutuni kei na vakabauta na iVakabula; kei na bokoci ni ivalavala ca ena papitaiso, kei na bukawaqa, io, ena Yalo Tabu.

32 Raica, oqo e dua na ivakaro bibi ka sa iotioti kau na solia vei iko me baleta na ka oqo; ni sa na rauta vinaka na nomu bula tiko e veisiga, me yacova na iyalayala ni nomu bula.

33 Ena yaco vei iko na leqa kevaka ko sa beca na ivakasala oqo, io, na vakarusai ni nomu bula kei na nomu iyau.

34 Mo solia e dua na iwase ni nomu iyau, io, na tiki ni nomu qele, kei na ka kecega me qai vakavo ga na ka me bula kina na nomu matavuvale.

35 Mo sauma na dinau sa veiyalayalatitaki tu vua na dautabaivola. Vagalalataki iko mai na ivesu oqo.

36 Mo biuta na nomu itikotiko kei na nomu vale, vakavo ga kevaka o gadreva mo mai raica na nomu matavuvale;

37 Mo dauvosa ena galala vei ira kecega; io, vunau, veivakayaloqaqataki, tusanaka na dina, io vakadomoilevu, ena irorogo ni reki, ka kailavaka—Osana, osana, sa kalougata na yaca ni Turaga na Kalou!

38 Mo daumasu tiko ga, raica au na sovaraka vei iko na Yaloqu, ena qai levu kina na nomu kalougata—io, ena sivia sara mai na ka mo a rawata mai na veika talei ni vuravura ka dau caca wale.

39 Raica, ko sa sega li ni marau ena itukutuku oqo ka reki na lomamu ena levu ni mamarau?

40 Se ko sa vakatitiqa tiko ga me vaka e dua na ivakavuvuli mataboko?

41 Se ko sa sega beka ni rawa ni yalomalua ka yalomalumalumu, ka caka dodonu e mataqu? Io, mo lako mai vei au, na nomu iVakabula. Emeni.