Ɔfã 24
Nyikyerɛ a wɔdze maa Joseph Smith Nkɔnhyɛnyi no na Oliver Cowdery, wɔ Harmony, Pennsylvania, Ayɛwoho, 1830. Ɔwɔ mu dɛ nna wɔkyekyeer Asɔr no nndzii abosoom anan mpo dze, naaso atseetsee no mu bɛyɛɛ dzen, dɛm ntsi okehiaa dɛ banodzifo no kɔhwehwɛ beebi a hɔ yɛ dwoodwo no suma kakra. Wɔdze nyikyerɛ ebiasa a odzi do yi mae wɔ dɛm aber no mu dze ahyɛ hɔn dzen, nkuran na ɔakyerɛkyerɛ hɔn.
1–9, Wɔfrɛ Joseph Smith dɛ ɔnkã asɛmpa na ɔnkyerɛkyerɛ ndzɛmba ase, onsansan kyerɛwsɛm no mu; 10–12, Wɔfrɛ Oliver Cowdery dɛ ɔnkã asɛmpa no; 13–19, Wɔda mbra a ɔfa anwanwadze ho, ndom, ananadze huntuma mpopoee na sika-kotoku anaa bɔtɔ a onnyi dɛ wɔfa dze fir edzi.
1 Hwɛ, wɔfrɛɛ wo na wɔsaan mu yii wo dɛ kyerɛw Mormon Nwoma no, na bra me somdwuma no mu; na meeyi wo efi w’amandzehu mu, na meetu wo fo dɛ wɔagye wo efi w’atamfo nyina nsa, na wɔagye wo efi Satan no tum nye sum mu!
2 Naaso, kwan nnda hɔ mma wo wɔ wo mbrato ho; naaso, kɔ wo kwan na mma nnyɛ bɔn bio.
3 Krɔn wo dzibew; na sɛ idua wo haban mu edziban na isiesie ho wie a, kɔ asɔr a ɔwɔ Colesville, Fayette na Manchester ntsɛmara, na wɔbɔhwɛ wo; na mibehyira hɔn wɔ sunsum nye honam mu nyina;
4 Mbom sɛ wɔanngye wo a, medze ndom bɛba hɔn do na nnyɛ nhyira.
5 Na kɔ do frɛ Nyame wɔ me dzin mu, na kyerɛw ndzɛmba a Ɔwerɛkyekyefo no dze bɛma wo no, na siansian kyerɛwsɛm ne nyina mu kyerɛ asɔr no.
6 Na wɔdze dza ɔwɔ dɛ ekã na ekyerɛw bɛma wo wɔ dɔn no ara mu, na wobetsie, annyɛ dɛm a medze ndom bɛba hɔn do na nnyɛ nhyira.
7 Na fa wo mber nyina som wɔ Zion; na iyi mu na ibenya ahoɔdzen.
8 Nya abotar wɔ amandzehu mu, osiandɛ ibohu pii; na mbom sɔw ne nyina, na, hwɛ, menye wo wɔ hɔ, kesi wo nda ewiei mpo.
9 Na honam mu ndwumayɛ dze, irinnya ho ahom, osiandɛ iyi nnyɛ wo frɛ. Yɛ dza wɔfrɛɛ wo ho no na ibenya dza edze bɔkrɔn wo dzibew, na esansan kyerɛwsɛm no nyina mu akyerɛ, na kɔ do fa wo nsa gu nkorɔfo do na si nsɔr no pi.
10 Na wo nuabanyin Oliver bɔkɔ do ama me dzin do wɔ wiadzemba enyim, nye asɔr no so enyim. Na mma onnsusu dɛ obotum akã m’edwuma ho nsɛm nyina akyerɛ; na hwɛ, menye no wɔ hɔ kesi ewiei.
11 Mo mu na obenya enyimnyam, na nnyɛ nankasa noho bi, sɛ mberɛwyɛ anaa ahoɔdzen mu o, sɛ nkyehoma anaa fahodzi mu o;
12 Na aber nyina, wɔ mbea nyina do no, obobue n’ano dze abɔ m’asɛmpa no dawur tse dɛ ɔdze totorobɛnto ndze, adzekyee nye adzesaa nyina. Na mebɛma no ahoɔdzen a wonnhun bi da wɔ adasa mu.
13 Mma mmper nnhwehwɛ anwanwadze ne yɛ, gyedɛ mehyɛ wo, gyedɛ mbɔnsam no tu, ayarsa, nye dza wɔdze tsia mbowatsena hɔn bɔr, nye dza wɔdze tsia owu no bɔr;
14 Na dɛm ndzɛmba yinom no na mma nnyɛ, gyedɛ hɔn a wɔpɛ dɛ eyɛ ma hɔn no bisa wo, ama kyerɛwsɛm no aahyɛ mã; na yɛ dza wɔakyerɛw no.
15 Na beebiara a ebɛhɛn, na wɔanngye wo wɔ me dzin mu no, nkyɛ ɔwɔ dɛ igya nhyira no, poroporow w’ananadze huntuma gu hɔn do fa gya ndom, na fa yɛ dasegye tsia hɔn, na tsew w’anan ho wɔ kwankyɛn.
16 Na ɔbɛba dɛ obiara a ɔdze ne nsa bɛkã wo ayɛ wo basabasa no, hyɛ ma wɔntsẽa no wɔ me dzin mu; na, hwɛ, mebɛtsea no dɛ mbrɛ w’asɛm se wɔ mankasa me ber ano.
17 Na obiara a ɔnye wo bɔkɔ mbra ase no, wɔdze mbra no bɔdom no.
18 Na mma mmfa sika kotoku, anaa bɔtɔ, anaa poma, anaa ntar ebien osiandɛ dɛm dɔn noara mu asɔr no dze dza ihia wɔ edziban ho, nye atar, nye mpaboa, nye sika, nye bɔtɔ bɛma wo.
19 Na wɔafrɛ wo dɛ fa adze a ɔyɛ dzen besiesie mo wenyin ture mu, nyew, wɔ mber a odzi ekyir yi mu mpo; nyew, na hɔn so a ahyɛ hɔn asɔfo nyina no, wɔbɛyɛ dɛmara. Amen.