Ɔfã 36
Nyikyerɛ a wɔnam Joseph Smith Nkɔnhyɛnyi no do dze maa Edward Partridge, wɔ beebi a ɔbɛn Fayette, New York, Mumu 9, 1830 (hwɛ dza wɔakyerɛw wɔ Ɔfã 35 n’etsifi no). Joseph Smith n’abakɔsɛm no kã dɛ Edward Partridge “yɛɛ fasusu ma tseneneeyɛ, na ɔyɛ Ewuradze no nkorɔfo etsitsir no mu kor.”
1–3, Ewuradze dua Sidney Rigdon ne nsa do dze Ne nsa gu Edward Partridge do; 4–8, Wɔfrɛ banyin biara a ɔgye asɛmpa no na asɔfodzi no dɛ omfir edzi na ɔnkɛkã asɛmpa no.
1 Dɛm na Ewuradze Nyankopɔn, Israel Kokroko no se: Hwɛ, mese ɔwo m’akowaa Edward dɛ, woehyira wo, na wɔdze wo bɔn akyɛ wo, na wɔafrɛ wo dɛ fa ndze a ɔtse dɛ totorobɛnto kã m’asɛmpa no.
2 Mubodua m’akowaa Sidney Rigdon ne nsa do medze me nsa egu wo do, na ibenya mo Sunsum Krɔnkrɔn no, Ɔwerɛkyekyefo no mpo, ɔno na ɔbɛkyerɛkyerɛ wo ahenman n’asomdwee ndzɛmba no;
3 Na fa ndze kɛse bɔ no dawur, se dɛ: Hosanna, nhyira nkã ɔsorsor Nyankopɔn ne dzin.
4 Na afei, ɔfrɛ nye mbrasɛm yi na medze ma wo a ɔfa nyimpa nyinara ho—
5 Dɛ dodowara a wɔbɛba mo nkowaa Sidney Rigdon na Joseph Smith, Kakraba, hɔ, na woesuo frɛ nye mbrasɛm yi mu no, wɔnhyɛ hɔn asɔfo wɔasoma hɔn ma wɔakɛkã asɛmpa a ɔwɔ hɔ daapem yi wɔ aman mu—
6 Wɔmbɔ nnuho ho dawur nse dɛ: Hom ntwe homho mfi dɛm ebusuasantsen asokyewfo yi ho, na hom mfi ogya no mu mfi, hom nkyir ntar a honam nkekãa wɔ mu mpo.
7 Na wɔdze mbrasɛm yi bɛma m’asɔr ne elderfo no, dɛ obiara a ɔdze akoma kor bosuo mu no, wobotum ahyɛ no sɔfo na wɔasoma no, dɛ mbrɛ makã no.
8 Emi nye Jesus Christ, Nyame ne Ba no; dɛm ntsi, bɔ w’asen do na mebɛba me temple mu awerɛfir mu ara. Ɔnyɛ hɔ dɛm. Amen.