Jekjōn 38
Revelesōn letok kōn Josep Smith Rikanaan eo, ilo Fayette, New York, Jānwōde 2, 1831. Iien in ekar juon kwelo̧k an Kabun̄ in.
1–6, Kraist eaar kōm̧anm̧an men otemjeļo̧k; 7–8, E ej pād ilubwiljin Ro Rekwōjarjar An, ro ejjab etto renaaj lo E; 9–12, Kanniōk otemjej ej ijurwewe im̧aan Mejān; 13–22, Eaar kōpooje juon āneen kallim̧ur n̄an ro Rekwōjarjar An ilo iien in im indeeo; 23–27, Ro Rekwōjarjar kar jiron̄ er bwe ren juon wōt im jeļāņae doon āinwōt jeimjāān jeimjatin; 28–29, Tariņae ko kar kwaļo̧ki ļo̧k im̧aan; 30–33, Ro Rekwōjarjar rej itōn bōk kajoor jān ijo eutiej im ilo̧k ilubwiljin aolep laļ ko; 34–42, Kabun̄ in kar jiron̄ e n̄an kōjparoke ro rejeram̧ōl im aikuj im n̄an pukot m̧weiie ko an indeeo.
1 Āindein Irooj ami Anij ej ba, em̧ool Jisōs Kraist, N̄a E eo Eļap, Alpa im Omega, jinoin im jem̧ļo̧kin, ejja eo wōt eaar erreļo̧k ioon depakpak in indeeo, im aolep inelep in serap ko in lan̄, m̧okta jān kar kōm̧anm̧ane laļ;
2 Ejja Eo wōt ejeļā aolep men otemjeļo̧k, bwe aolep men otemjeļo̧k rej pād kiiō im̧aan Meja;
3 N̄aij ejja eo wōt eaar ekkōnono, im laļ eaar kōm̧m̧an, im aolep men otemjeļo̧k raar itok kōn N̄a.
4 N̄aij ejja eo wōt E kar bōk Zaion an Inok tok ilo Ubō make; im em̧ool, Ij ba, em̧ool jon̄an wōt eo raar lōke ilo Eta, bwe N̄aij Kraist, im ilo Eta make, jān kajoor in bōtōktōk eo Iaar lutōkļo̧k, Iaar akweļap im̧aan Jemān kōn er.
5 Ak lo, bwe in ro renana Iaar likūt wōt ilo tomede ko an marok m̧ae ekajet eo ilo raan eo eļap, eo enaaj itok ilo jem̧ļo̧k in laļ;
6 Im em̧ool āindein Inaaj kōm̧m̧an bwe ro renana ren jab rōļo̧k, ro reban ron̄ Ainikiō ak kapen burueer, im wo, wo, wo, ej jorrāān eo aer.
7 Ak lo, em̧ool, em̧ool, Ij ba n̄an kom̧ bwe Meja rej pād ioomi. N̄aij pād ilubwiljimi im kom̧ij jab maron̄ lo Eō;
8 Ak raan eo ejjab etto ej itok im kom̧ naaj lo Eō, im jeļā ke N̄aij mour; bwe ron̄el nuknuk in marok enaaj potak kiiō epaak, im e eo ej jab erreo ejamin mour ilo raan eo.
9 Kōn menin, kan̄ōrn̄ōre ipūmi im pojak. Lo, aelōn̄ eo ej ami, im rikōjdat eo ej jamin anjo̧.
10 Em̧ool Ij ba n̄an kom̧, kom̧ erreo, ak jab aolep; im ejjeļo̧k bar juon eo ippān Ikanooj in m̧ōņōņō;
11 Bwe aolep kanniōk eankeke Im̧aō; im kajoor ko an marok rej anjo̧ ioon laļ, ilubwiljin ro nejin armej raņ, im̧aan mejān aolep inelep ko in lan̄—
12 Eo ej kōm̧m̧an bwe ikōn̄ en irooj, im aolep indeeo ej metak, im enjeļ raņ rej kōttare kien eo eļap n̄an m̧wijm̧wij n̄an m̧adm̧ōd e laļ, n̄an ain tāō ko bwe ren tili; im, lo, rikōjdat ekoba.
13 Im kiiō Ij kwaļo̧k n̄an kom̧ juon mennin ittino, juon men eo me eaar pād ilo jikin ko rettino, n̄an bōktok n̄an kajejjet em̧ool ko̧kkure eo ami ilo tōrean iien, im kom̧ ar jab jeļā kake;
14 Ak kiiō Ij ba kake n̄an kom̧, im kom̧ij jeraam̧m̧an, jab kōnke nana ko ami, ak jab būruōn jab tōmak ko ami; bwe em̧ool jet iaami ewōr ruōmi Im̧aō, ak Inaaj tūriam̧okake n̄an m̧ōjņo̧ ko ami.
15 Kōn menin, kom̧in pen jān kiiō m̧aanļo̧k; jab mijak, bwe aelōn̄ eo ej ami.
16 Im n̄an lo̧mo̧o̧ren eo ami Ij lewōj n̄an kom̧ juon kien, bwe Iaar ron̄ jar ko ami, im ro rijeram̧ōl rekar ellotaan Im̧aō, im ro rim̧weiie Ikar kōm̧anm̧an er, im aolep kanniōk ej Aō, im N̄a ejjeļo̧k Aō kalijekļo̧k.
17 Im Ikar kōm̧m̧an bwe laļ en m̧weiie, im lo e ej Aō eran ne, kōn menin, bar juon alen Inaaj jutak ioon.
18 Im Ij erļo̧kewaj im watōk ekkar n̄an lewōj n̄an kom̧ eļapļo̧k m̧weiie, em̧ool juon āneen kallim̧ur, juon āneen elutōkļo̧k kōn milik im hōnni, eo me ioon enaaj ejjeļo̧k lia n̄e Irooj ej itok;
19 Im Inaaj lewōj e n̄an kom̧ n̄an āneen ami jolōt, eļan̄n̄e kom̧ij pukote e kōn aolepān būruōmi.
20 Im men in enaaj Aō bujen ippemi, kom̧ naaj bōk e n̄an āneen ami jolōt, im n̄an āneen jolōt eo an ro nejimi indeeo, ke laļ ej jutak, im kom̧ naaj bōk e ami bar juon alen ilo indeeo, ejamin bar jako.
21 Ak, em̧ool Ij ba n̄an kom̧ bwe iien ej itok im enaaj ejjeļo̧k ami kiin̄ ak irooj, bwe Inaaj ami kiin̄ im oņaake kom̧.
22 Kōn menin, ron̄jake Ainikiō im ļoore Eō, im kom̧ naaj juon armej reanemkwōj, im enaaj ejjeļo̧k ami kakien ak kakien ko Aō n̄e Ij itok, bwe N̄aij ami rileļo̧k kien, im ta emaron̄ dāpij Peiū?
23 Ak, em̧ool Ij ba n̄an kom̧, katakin doon ekkar n̄an opij eo n̄an e Ikar jitōn̄ kom̧;
24 Im em̧m̧aan otemjej en kautiej ļeo jein im jatin āinwōt e make, im kōm̧m̧an erreo im kwōjarjar Im̧aō.
25 Im bar juon alen Ij ba n̄an kom̧, em̧m̧aan otemjej en kautiej ļeo jein im jatūm āinwōt e make.
26 Im wōn em̧m̧aan ilubwiljimi ewōr jon̄oulruo nejin m̧aan, im ej jab kalijekļo̧k n̄an er, im rej jerbal n̄an e ilo pokake, im e ej ba n̄an juon iaer: Kwōn nuknuk kōn kopā ko im kwōn jijet ije; im n̄an eo bar juon: Kwōn nuknuk kōn nuknuk ekkarpenpen im jijet ijjuweo—im ej kalimjek ļōm̧aro nejin im ba N̄a ijim̧we?
27 Lo, men in Iaar lewōj n̄an kom̧ āinwōt juon būrabōļ, im e em̧ool ej āinwōt N̄a. Ij ba n̄an kom̧, kom̧in juon; im eļan̄n̄e kom̧ij jab juon kom̧ij jab Aō.
28 Im bar juon alen, Ij ba n̄an kom̧ bwe rikōjdat eo ej ilo jikin ko rettino ej kappukot mour ko ami.
29 Kom̧ij ron̄ kōn tariņae ko ilo laļ ko rettoļo̧k, im kom̧ij ba bwe enaaj wōr ejjab etto tariņae ko reļļap ilo laļ ko rettoļo̧k, ak kom̧ij jab jeļā bōro ko būruōn armej ro ilo laļ in ami make.
30 Ij ba n̄an kom̧ men kein kōnke jar ko ami; kōn menin, ko̧koņ mālōtlōt ilo ubōmi, n̄e nana an armej raņ eab kwaļo̧k men kein n̄an kom̧ jān nana ko aer, ilo jekjek eo me enaaj kōnono ilo lo̧jiln̄ōmi kōn juon ainikien eļļaajļo̧k jān eo me enaaj kōm̧akūtkūt laļ; ak eļan̄n̄e kom̧ij pojak kom̧ jamin mijak.
31 Im bwe kom̧in maron̄ deor jān kajoor eo an rikōjdat eo, im kuktok n̄an Ippa juon armej eweeppān, ejjeļo̧k libbijinjin im ejjeļo̧k ruōn—
32 Kōn menin, kōn jibadbad in Ij lewōj n̄an kom̧ kien eo bwe kom̧in etal n̄an Ohio eo; im ijeņ Inaaj lewōj n̄an kom̧ kien eo Aō; im ijeņ kom̧ naaj im̧wem̧we kōn kajoor jān ijo eutiej;
33 Im jān ijeņ, jabdewōt eo Ikōņaan enaaj etal ilubwiljin aolep laļ ko, im naaj ba n̄an er ta renaaj kōm̧m̧an; bwe ewōr Ippa juon jerbal eļap kar ko̧koņe, bwe Israel naaj lo̧mo̧o̧ren, im Inaaj tōl er ijoko jabdewōt Ikōņaan, im ejjeļo̧k kajoor enaaj dāpij Peiū.
34 Im kiiō, Ij lewōj n̄an kabun̄ in ilo jikin kein juon kien, bwe jet em̧m̧aan ilubwiljier naaj jitōn̄ er, im renaaj ijjitōn̄ jān ainikien kabun̄ in;
35 Im renaaj kalimjekļo̧k wōt ro rijeram̧ōl im ro riaikuj, im jerbal n̄an aer jipan̄ bwe ren jab en̄taan; im jilkinļo̧k er n̄an jikin eo me Ikar jiron̄ er;
36 Im en̄in naaj jerbal eo aer, n̄an peeke jerbal ko an men ko m̧weiien kabun̄ in.
37 Im er ro ewōr aer jikin kallib ko im rej jab maron̄ wia kaki, ren likūti wōt ak jata kaki n̄e ej em̧m̧an n̄an er.
38 Lale bwe aolep men otemjeļo̧k ren koon; im n̄e armej rej im̧wem̧we kōn kajoor jān ijo eutiej im ej jilkinļo̧k er, aolep men kein otemjeļo̧k renaaj kuktok n̄an ilo ubōn kabun̄ in.
39 Im eļan̄n̄e kom̧ij kappukot m̧weiie ko me ej wōt ankilaan Jemān n̄an liwōj n̄an kom̧, kom̧ naaj armej ro rem̧weiietata ian aolep armej, bwe kom̧ naaj bōk m̧weiie ko an indeeo; im emennin aikuj bwe m̧weiie ko an laļ in rej Aō n̄an liwōj; ak ekkōl kōn juwa, n̄e kom̧ ab erom āinwōt riNipai ro etto.
40 Im bar juon alen, Ij ba n̄an kom̧, Ij lewōj n̄an kom̧ juon kien, bwe em̧m̧aan otemjej, jim̧or elder, pris, rikaki, im barāinwōt uwaan, kom̧in etal kōn maron̄ eo an, kōn jerbal ko an pein, n̄an kōpooj im kōtōpraki men ko me Iaar jiron̄ kom̧.
41 Im ami kwaļo̧k naan en ainikien kakkōl, em̧m̧aan otemjej n̄an eo riturun, ilo ineem̧m̧an im ilo ettā.
42 Im kom̧in diwōjļo̧k jān ilubwiljin ro renana. Lo̧mo̧o̧ren kom̧ make. Kom̧in erreo kom̧ ro rej ineek jāpe ko an Irooj. Em̧ool āindein. Amen.