Eteni 46
Emoniseli epesami na nzela ya Profeta Joseph Smith na Eklezia, na Kirtland, Ohio, na mokolo ya 8, sanza ya misato ya mobu 1831. Na ntango oyo ya ebandeli ya Eklezia, emekoleli ya kokambaka makita ya eklezia lolenge moko etiamaki naino te. Nzokande, momeseno ya kondimaka se bobele bandimi mpe baninga ya solo na makita ya elambo mpe mayangani mosusu ya Eklezia ekomaki momeseno na lolenge loko. Emoniseli oyo elakisi bolingi ya Nkolo mpo na oyo etali lolenge ya koyangela mpe kokamba makita mpe malakisi na Ye mpo na ntina ya koluka mpe kososolaka makabo ya Molimo.
1–2, Bampaka basengeli kokamba makita lokola bakambami na Molimo Mosantu; 3–6, Bato oyo bazali koluka bosolo basengeli te kotiama libanda uta na misala ya elambo; 7–12, Bosenga uta na Nzambe mpe boluka kozwa makabo ya Molimo; 13–26, Litangi ya boko makabo oyo epesami; 27–33, Bakambi ya Eklezia bapesami nguya ya kososola makabo ya Molimo.
1 Boyoka, O bino bato ya eklezia na ngai; mpo solo nalobi epayi na bino ete makambo oyo elobamaki epayi na bino mpo na litomba mpe boyekoli na bino.
2 Kasi kutu ata makambo oyo wana ekomamaki, epesami ntango nyonso na bampaka ya eklezia na ngai uta na ebandeli, mpe ekotikala se bongo, ete bakamba makita nyonso lokola batambwisami mpe bakambami na Molimo Mosantu.
3 Nzokande botindami soki moke te kobengana moto soki nani uta na makita na bino ya bato nyonso, oyo masalemi liboso ya mokili.
4 Botindami lisusu te kobengana ata moto nani oyo azali ya eklezia uta na makita na bino ya elambo; nzokande, soki ata moto nani abukaki mobeko, botika ye alia elambo te kino akosala oyo ekozongisa boyokani.
5 Mpe lisusu nalobi epayi na bino, bosengeli te kobengana moto moko libanda uta na makita ya elambo na bino oyo azali na bosolo mpenza ya koluka kozwa bokonzi—nalobi oyo na ntina ya baoyo wana bazali bato ya eklezia te.
6 Mpe lisusu nalobi epayi na bino, na ntina ya makita ya kofandisa, ete soki ezali na bato oyo bazali ya eklezia te, baoyo bazali na bosolo mpenza ya koluka bokonzi, bokobengana bango te.
7 Kasi botindami na makambo nyonso kosenga uta na Nzambe, oyo apesaka na motema ya kokaba; mpe atako bongo nalingi ete bosala na bosantu nyonso ya motema oyo Molimo etatoli epayi na bino, kotambolaka alima liboso na ngai, komanyolaka nsuka ya lobiko na bino, kosalaka makambo nyonso na losambo mpe bozongisi matondi, ete bokoka kosenginiama na milimo mabe te, soki te malongi ya bazabulu, to mitindo ya bato; mpo ndambo ewuti na bato, mpe mosusu ewuti na bazabulu.
8 Yango wana, bokeba mbele bokosama; mpe ete bokoka kokosama te, boluka na bosolo mpenza makabo ya malamu koleka nyonso, komikundolaka ntango nyonso mpo na ntina nini epesami;
9 Mpo solo nalobi epayi na bino, epesami mpo na litomba ya baoyo wana balingaka ngai mpe babombaka mitindo na ngai nyonso, mpe ye oyo akomeka kosala bongo; ete nyonso bakoka kozwa litomba ya moto oyo alukaka soki te oyo asengaka uta na ngai, oyo asengaka mpe asengaka te mpo na ntina ya elembo te ete bakoka kobebisa yango na bilula-lula na bango.
10 Mpe lisusu, solo nalobi epayi na bino, nalingi ete bomikundolaka ntango nyonso, mpe bokanga na mayele na bino ntango nyonso nini makabo wana ezali, oyo epesami epayi ya eklezia.
11 Mpo nyonso bapesami makabo nyonso te; mpo makabo ezali mingi, mpe na moto moko moko epesami likabo moko na Molimo ya Nzambe.
12 Na boko moko epesami, mpe na boko likabo mosusu epesami, mpo ete nyonso bakoka kozwa litomba na nzela oyo.
13 Na boko epesami na Molimo Mosantu koyeba ete Yesu Klisto azali Mwana ya Nzambe, mpe ete abakamaki na ekulusu mpo na masumu ya mokili.
14 Na basusu epesami kondima na maloba na bango, mpo ete bakoka kozwa bomoi ya seko soki bakokoba kozala sembo.
15 Mpe lisusu, na boko epesami na Molimo Mosantu koyeba banzela ekeseni ya kosala mosala, lokola ekosepelisa Nkolo se moko oyo, engebene na bolingi na ye Nkolo, oyo akoki na boboto na ye engebene na bizaleli ya bana ya bato.
16 Mpe lisusu, epesami epayi ya boko na Molimo Mosantu koyeba misala ya ndenge na ndenge, soki ezali ya Nzambe, ete mamonisi ya Molimo makoka kopesama na moto moko moko mpo na kozwa lokola litomba na nzela wana.
17 Mpe lisusu, solo nalobi epayi na bino, na boko epesami, na Molimo ya Nzambe, liloba ya bwania.
18 Na mosusu epesami liloba ya boyebi, mpo ete nyonso bakoka koteyama mpo na kozala na bwania mpe kozala na boyebi.
19 Mpe lisusu, na boko epesami kozala na bondimi ya kobikisama na bokono;
20 Mpe na basusu epesami kozala na bondimi ya kobikisa bokono.
21 Mpe lisusu, na boko epesami mosala ya kosala makamwisi;
22 Mpe na basusu epesami kosakola;
23 Mpe na basusu bososoli ya milimo.
24 Mpe lisusu, epesami na boko koloba na minoko.
25 Mpe na mosusu epesami bolimboli ya minoko.
26 Mpe makabo oyo nyonso mawutaka epayi ya Nzambe, mpo na litomba ya bana ya Nzambe.
27 Mpe epayi ya episikopo ya eklezia, mpe epayi na baoyo Nzambe akopona mpe akokulisa mpo na kokengela eklezia mpe mpo na kozala bampaka kati na eklezia, bososoli ya makabo nyonso wana esengeli kopesama epayi na bango, mbele moko na kati na bino aloba ete azali ya Nzambe nzokande azali soki moke te ya Nzambe.
28 Mpe ekosalema ete oyo akosenga na Molimo akozwa na Molimo;
29 Ete ekoki kopesama epayi na boko ete bazala na makabo nyonso wana, na ntina ete mondimi moko moko akoka kozala na litomba na nzela wana.
30 Oyo akosenga na Molimo asengi engebene na bolingi ya Nzambe; yango wana esalemi kutu lokola asengi yango.
31 Mpe lisusu, nalobi epayi na bino, ezala nyonso kani bokosala na Molimo, makambo nyonso esengeli kosalema na nkombo ya Klisto;
32 Mpe bosengeli kozongisa matondi epayi ya Nzambe na Molimo mpo na mapamboli nyonso oyo bopambolami na yango.
33 Mpe bosengeli ntango nyonso kosalela bolamu mpe bosantu liboso na ngai. Kutu bongo. Amene.