Ɔfã 47
Nyikyerɛ a wɔnam Joseph Smith Nkɔnhyɛnyi no do dze mae, wɔ Kirtland, Ohio, Ebɔw 8, 1831 John Whitmer a, nna ɔasom dadaw dɛ Nkɔnhyɛnyi no ne krakye no twetwee noho ahyɛse no ber a wɔsee no dɛ ɔnsom dɛ Asɔr n’abakɔsɛmkyerɛwfo na ɔkyerɛwfo no, a ɔbɛhyɛ Oliver Cowdery n’ananmu no. Ɔkyerɛɛw dɛ, “Nkyɛ mennkɛpɛ dɛ mebɛyɛ naaso muhun dɛ Ewuradze Ne pɛ na ɔnyɛ, na sɛ dɛm na ɔpɛ a, mebɛpɛ dɛ obodua Joseph Adzehunyi no do ada no edzi.” Joseph nyaa nyikyerɛ yi ekyir no, John Whitmer gyee too mu na ɔsoom wɔ dzibew a wɔdze ahyɛ ne nsa no.
1–4, Wɔdze hyɛ John Whitmer nsa dɛ ɔnkyerɛw Asɔr n’abakɔsɛm no na ɔnkyerɛw mma Nkɔnhyɛnyi no.
1 Hwɛ, oye ma me dɛ m’akowaa John hwɛ kyerɛw dza osisi aber biara no na ɔhwɛ do so, na ɔboa ɔwo m’akowaa Joseph ma ɔkyerɛw ndzɛmba nyinara a wɔdze bɛma wo no, kɛpem dɛ wɔbɛfrɛ no dɛ ɔnkɛyɛ ndwuma binom so.
2 Bio, nokwar, mese wo dɛ, obotum so ama ne ndze do akasa wɔ nhyiamu ase ber biara a ɔsɛ no.
3 Na bio, mese wo dɛ meyi no esi hɔ dɛ ɔnhwɛ asɔr ne kyerɛwsɛm na abakɔsɛm do daa nyina, osiandɛ medze dzibew bi so ama Oliver Cowdery.
4 Dɛm ntsi, susuampaara dɛ odzi nokwar no, wɔdze Ɔwerɛkyekyefo no bɛma no ma ɔakyerɛw ndzɛmba yinom. Ɔnyɛ hɔ dɛm. Amen.