Ɔfã 4
Nyikyerɛ a wɔnam Joseph Smith Nkɔnhyɛnyi no, do dze maa n’egya, Joseph Smith Panyin, wɔ Harmony, Pennsylvania, Kwakwar 1829.
1–4, Akokodur som gye Ewuradze n’asɔfoe nkwa; 5–6, Nyame su ma wɔfata ɔsomdwumadzi no; 7, Ɔwɔ dɛ wɔhwehwɛ Nyame ne ndzɛmba ekyir kwan.
1 Afei hwɛ, dwumadzi a ɔyɛ ahobow bi rubopue adasamba mu.
2 Dɛm ntsi, O hom a hom rebɛyɛ Nyame n’edwuma, hom nhwɛ mfa hom akoma, ahom, adwen nye ahoɔdzen nyina nsom no, ama hom eetum egyina Nyame n’enyim wɔ da a odzi ewiei no mu dɛ afɔdzi biara nnyi homho.
3 Dɛm ntsi, sɛ hom wɔ pɛ dɛ hom bɔsom Nyame a, wɔto nsa frɛ hom wɔ edwuma no ho;
4 Na hwɛ haban no ahoa dada na twaber no asõ; na hwɛ nyia ɔdze ahoɔdzen tow ne kantankrankye no, ɔnoara na ɔbɔboa ano ama noho aama ɔaannhera, mbom ɔdze nkwagye abrɛ ne kra;
5 Na nyia n’enyiwa bɛyɛ kor wɔ Nyame n’enyimnyam nko do, na ɔwɔ gyedzi, enyidado, ayamuyie na ɔdɔ no, na ɔfata edwuma no ne yɛ.
6 Hom nkaa gyedzi, ɔbra pa, nyimdzee, ahohyɛdo, abotar, enuadɔ, nyamesu, ayamuyie, ahobrɛadze, mbɔdzembɔ.
7 Hom mbisa, na hom nsa bɛkã; hom mbɔ mu, na wobobue ama hom. Amen.