Ɔfã 52
Nyikyerɛ a wɔnam Joseph Smith Nkɔnhyɛnyi no do dze maa Asɔr no mu Elderfo no, wɔ Kirtland, Ohio, Obiradzi 6, 1831. Wɔyɛɛ ehyiadzi bi wɔ Kirtland a, wɔhyɛɛ ase wɔ Obiradzi 3 na wowiee Obiradzi 6. Ehyiadzi yi ase no nye da a odzi kan a wɔhyɛɛ sɔfopanyin dzibew na ator na ndaadaa sunsum dwumadzi bi daa edzi na wɔkãa hɔn enyim.
1–2, Wɔhyehyɛ dɛ wɔbɛyɛ ehyiadzi no a odzi do no wɔ Missouri; 3–8, Wɔda elderfo binom a ɔsɛ dɛ wɔbɔ mu tu kwan no edzi; 9–11, Ɔwɔ dɛ elderfo no kyerɛkyerɛ dza asomafo na nkɔnhyɛfo no akyerɛw no; 12–21, Hɔn a Sunsum no ekenyan hɔn no sow ayɛyi na nyansa aba; 22–44, Woyiyi elderfo binom a sɛ worutu kwan akɔ akɛyɛ ehyiadzi wɔ Missouri a, wɔnkã asɛmpa no wɔ kwan mu.
1 Hwɛ, dɛm na Ewuradze nam no Sunsum ndze do kã kyerɛ elderfo a ɔasan mu afrɛ hɔn wɔ nda a odzi ekyir yi mu no—
2 Ɔse: Emi Ewuradze, merebɛda dza mepɛ dɛ hom yɛ fi aber yi mu dze kɛpem aber a ehyiadzi a wɔrebɛyɛ no wɔ Missouri, bea a mibehyira do dze ama mo nkorɔfo a wɔyɛ Jacob n’asefo no nkaa, nye hɔn a wɔyɛ ahyɛmudzi no n’adzedzifo no edzi akyerɛ hom.
3 Dɛm ntsi, nokwar, mese hom dɛ, hom mma mo nkowaa Joseph Smith, Kakraba, nye Sidney Rigdon mboaboa hɔnho na womfi hɔn efiefi na wontu kwan nkɔ Missouri asaase do.
4 Na susuampaara dɛ wodzi nokwar ma me no, wɔbɛma woehu dza ɔsɛ dɛ wɔyɛ.
5 Na eso, susuampaara dɛ wodzi nokwar no, wɔbɛma woehu hom egyapadze asaase no.
6 Na susuampaara dɛ wonndzi nokwar no, wobotwa hɔn akyen, dɛ mbrɛ me pɛ tse, dɛ mbrɛ mohwɛ a oye ma me mpo.
7 Na bio, nokwar, mese hom dɛ, hom mma m’akowaa Lyman Wight nye m’akowaa John Corrill ntu hɔn kwan no ntsɛm;
8 Na m’akowaa John Murdock, nye m’akowaa Hyrum Smith so mfa Detroit nkɔ dɛm bea kor noara do.
9 Na wɔmma wɔnhyɛ akwantu no ase mfi ha nkɔ na wɔnkã nyamesɛm no wɔ kwan no do, mma wɔnnkã asɛm fofor biara nnkã dza nkɔnhyɛfo na asomafo no akyerɛw, nye dza Ɔwerɛkyekyefo no nam gyedzi mpaabɔ do bɛkyerɛ hɔn no ho.
10 Wɔmma wɔnkɔ beenu beenu, na dɛm ntsi wɔmma wɔnkã nyamesɛm no wɔ kwan no do nkyerɛ mboanofo biara, na wonnuma hɔn wɔ nsu mu, na wɔmfa hɔn nsa ngu hɔn do wɔ nsu no nkyɛn.
11 Na dɛm na Ewuradze se, mubotwa m’edwuma do tsia wɔ tseneneeyɛ mu, osiandɛ nda no reba a mobɔsoma atsɛmbu akɔ konyimdzi mu.
12 Na wɔmma m’akowaa Lyman Wight nhwɛ yie, osiandɛ Satan rohwehwɛ apo no do dɛ ntsɛw.
13 Na hwɛ, nyia odzi nokwar no, wɔbɛyɛ no ɔhwɛfo wɔ ndzɛmba pii do.
14 Na bio, mebɛma hom nhwɛdo wɔ ndzɛmba nyina mu, amma wɔaanndaadaa hom; osiandɛ Satan atahye asaase do, na oefir edzi redaadaa amanaman—
15 Dɛm ntsi, nyia ɔbɔ mpaa, na ne sunsum abotow no, sɛ odzi m’ayɛdze do a ɔno na mebɛgye no.
16 Nyia ɔkasa, na no sunsum abotow, na ɔdwe wɔ kasa mu na ɔma ntowdo no, sɛ odzi m’ayɛdze do a, ɔno na ɔyɛ Nyame nedze.
17 Na bio, nyia noho bɔpopo wɔ mo tum ase no, wɔbɛma no ahoɔdzen, na ɔbɔsow aba a ɔfata ayɛyi na nyansa, dɛ mbrɛ me nyikyerɛ nye mo nokwar a medze ama hom no tse.
18 Na bio, nyia wodzi no do konyim na ɔnnsow aba dɛ mbrɛ nhwɛdo yi kyerɛ no a, ɔnnyɛ medze.
19 Dɛm ntsi, ɔnam nhwɛdo yi do hom bohu esunsum ahorow nyinara a wɔwɔ ɔsorsor n’ase.
20 Na nda no aba, na mbrɛ nyimpa ne gyedzi tse no wɔbɛyɛ ama no.
21 Hwɛ, mbrasɛm yi na medze ma asɔr no mu elderfo no a masan mu eyi hɔn no.
22 Na bio, nokwar, mese hom dɛ, wɔmma m’akowaa Thomas B. Marsh nye m’akowaa Ezra Thayre so ntu hɔn kwan no, na wɔnkã nyamesɛm no wɔ kwan no mu araa nkodu asaase kor yi ara so do.
23 Na bio, wɔmma m’akowaa Isaac Morley nye m’akowaa Ezra Booth ntu hɔn kwan, na wɔnkã nyamesɛm no so wɔ kwan no do mfa nkodu dɛm asaase kor no ara so do.
24 Na bio, wɔmma mo nkowaa Edward Partridge nye Martin Harris nye mo nkowaa Sidney Rigdon na Joseph Smith, Kakraba ntu hɔn kwan no.
25 Wɔmma mo nkowaa David Whitmer na Harvey Whitlock so ntu hɔn kwan, na wɔnkã asɛmpa no wɔ kwan no do, mfa mbra asaase kor no ara so do.
26 Na wɔmma mo nkowaa Parley P. Pratt na Orson Pratt ntu hɔn kwan, wɔnkã asɛmpa no wɔ kwan no do, mfa mbra asaase kor no ara do mpo.
27 Na wɔmma mo nkowaa Solomon Hancock na Simeon Carter so ntu hɔn kwan mfa mbra dɛm asaase kor no ara do, na wɔnkã asɛmpa no wɔ kwan no do.
28 Wɔmma mo nkowaa Edson Fuller na Jacob Scott so ntu hɔn kwan.
29 Wɔmma mo nkowaa Levi W. Hancock na Zebedee Coltrin so ntu hɔn kwan.
30 Wɔmma mo nkowaa Reynolds Cahoon na Samuel H. Smith so ntu hɔn kwan.
31 Wɔmma mo nkowaa Wheeler Baldwin na William Carter so ntu hɔn kwan.
32 Na hom nhyɛ mo nkowaa Newel Knight na Selah J. Griffin beenu yi asɔfo na hɔn so wontu hɔn kwan.
33 Nyew, nokwar, mese hom dɛ, wɔmma nkorɔfo yinom nyina ntu hɔn kwan nkɔ bea kor do, na mma obiara nntow wɔ ne nyɛnko ne fapem do, anaadɛ ɔmmfa kwan a ne nyɛnko afã do no do.
34 Nyia obedzi nokwar no, wɔbɔbɔ noho ban na wɔama ɔasow eduaba pii.
35 Na bio, mese hom dɛ, wɔmma mo nkowaa Joseph Wakefield na Solomon Humphrey ntu hɔn kwan nkɔ boka asaase do;
36 Wɔmma wɔnye hɔn ebusua ebusua nyɛ edwuma, na mma wɔnnkã biribiara nnkã dza nkɔnhyɛfo nye asomafo no, dza woehu na wɔatse na wɔgye dzi nokwar mu no, ama nkɔnhyɛ no nyina aahyɛ mã.
37 Osian mbrato ntsi, wɔngye dza wɔdze maa Heman Basset no mfi ne nsamu na wɔmfa mma Simonds Ryder.
38 Na bio, nokwar, mese hom dɛ, hom nhyɛ Jared Carter sɔfo, na wɔnhyɛ George James so sɔfo.
39 Wɔmma elderfo a wɔaka no nhwɛ nsɔr no do na wɔnkã asɛm no nkyerɛ hɔn a wɔwɔ mantɔw a etwa hɔn ho ehyia no; na wɔmma wɔmfa hɔnankasa hɔn nsa nyɛ edwuma na mma wɔnnyɛ abosondze na emumuyɛdze biara.
40 Na wɔ adze nyina mu no, wɔnkaa ehiafo na abɔbɔfo, ayarfo nye hɔn a wɔretseetsee hɔn no, na nyia ɔnnyɛ ndzɛmba yinom no nnyɛ mo suanyi.
41 Na bio, hom mma mo nkowaa Joseph Smith, Kakraba, na Sidney Rigdon nye Edward Partridge ngye dasegye nwoma mfi asɔr no hɔ. Na wɔngye kor mma m’akowaa Oliver Cowdery so.
42 Na dɛ mbrɛ makã no, sɛ hom dzi nokwar a, hom bɔboa hom ano edzi ehurusi wɔ Missouri asaase do, dza ɔyɛ hom egyapadze a seseiara ɔyɛ hom atamfo asaase no.
43 Mbom, hwɛ, emi Ewuradze mebɛyɛ ntsɛm agye kuropɔn no wɔ ne ber mu no, na medze dɛw na enyigye abɔ nokwafo no abɔtsir.
44 Hwɛ, emi nye Jesus Christ, Nyankopɔn ne Ba no, na mebɛma hɔn do wɔ da a odzi ewiei no mu. Ɔnyɛ hɔ dɛm. Amen.