1 Ti katulongak, a ni Orson Hyde, natudingan babaen ti pannakaordenna a mangipakdaar iti agnanayon nga ebanghelio, babaen ti Espiritu ti sibibiag a Dios, iti tunggal tao, ken tunggal daga, kadagiti pagtitiponan dagiti nadangkes, kadagiti sinagogada, a mangikalintegan ken mangilawlawag kadakuada kadagiti amin a nasantuan a kasuratan.

2 Ket, adtoy, ket imutektekan, pagarigan daytoy dagiti amin a naordenan iti daytoy a kinasaserdote, a naituding nga ituloyda ti misionda—

3 Ket daytoy ti pagarigan kadakuada, nga agsaoda bayat ti panangtignay kadakuada ti Espiritu Santo.

4 Ket ania man ti sawenda no tignayen ida ti Espiritu Santo agbalin a nasantuan a kasuratan, agbalin a pagayatan ti Apo, agbalin a panunot ti Apo, agbalin a balikas ti Apo, agbalin a timek ti Apo, ken bileg ti Dios iti pannakaisalakan.

5 Adtoy, daytoy ti kari ti Apo kadakayo, O dakayo a katulongak.

6 Gapuna, agragsakkayo, ket saankayo nga agbuteng, ta siak nga Apo adda kadakayo, ket agtakderakto iti abayyo; ket paneknekandakto, a siak ni Jesucristo, a siak ti Anak ti sibibiag a Dios, a siak idi, a siak ita, ken siak ti umay.

7 Daytoy ti balikas ti Apo kenka, katulongak nga Orson Hyde, ken kasta met iti katulongak a ni Luke Johnson, ken iti katulongak a ni Lyman Johnson, ken iti katulongak a ni William E. McLellin, ken kadagiti amin a napudno nga elder ti simbaanko—

8 Mapankayo iti intero a lubong, ikasabayo ti ebanghelio iti tunggal parsua, nga agtignay iti turay nga intedko kadakayo, a mamuniag iti nagan ti Ama, ken ti Anak, ken ti Espiritu Santo.

9 Ket isu a mamati ken mabuniagan maisalakanto, ket isu a di mamati mailunodto.

10 Ket isu a mamati mabendisionanto kadagiti sumaruno a tanda, a kas iti naisurat.

11 Ket kadakayo maitedto a pakaammuanyo kadagiti tanda dagiti panawen, ken dagiti tanda iti yaay ti Anak ti Tao;

12 Ket adunto ti mamaneknek a kas iti Ama, kadakayo maitedto ti bileg a mamaglalantip kadakuada iti agnanayon a biag. Amen.

13 Ket ita, maipanggep kadagiti banag a mainayon kadagiti katulagan ken bilin, dagitoyda—

14 Addanto mabati kalpasanna, iti naituding a panawen ti Apo, a sabali nga obispo a mapatalgedan iti simbaan, a mangiturong a kas iti immuna;

15 Gapuna nangatodanto a saserdote a maikari, ket matudingandanto babaen ti Umuna a Panguluen ti Kinasaserdote a Melchizedek, malaksid no pudno nga an-annabo ida ni Aaron.

16 Ket no pudno nga an-annabo ida ni Aaron adda kalinteganda iti pagobispuan, no isuda dagiti inauna kadagiti lallaki nga annak ni Aaron;

17 Ta kalintegan ti inauna ti agpangulo iti daytoy a kinasaserdote, ken kadagiti tulbek wenno turay ti isu met laeng.

18 Awan ti asino man a tao nga addaan iti kalintegan iti daytoy nga akem, a mangiggem kadagiti tulbek daytoy a kinasaserdote, malaksid no pudno nga an-annabo ken inauna ni Aaron.

19 Ngem, kas nangato a saserdote iti Kinasaserdote a Melchizedek adda turayna a mangiwardas kadagiti amin a nababbaba a takem nga iwardasna iti takem ti obispo no awan ti pudno nga an-annabo ni Aaron a masarakan, no la ketdi maawagan ken mapatalgedan ken maordenan iti daytoy a bileg, kadagiti ima ti Umuna a Panguluen ti Kinasaserdote a Melchizedek.

20 Ket ti pudno nga an-annabo ni Aaron, met, nasken a madutokan babaen daytoy a Panguluen, ken mapaneknekan a maikari, ket matudingan, ken maordenan babaen dagiti ima daytoy a Panguluen, no saan saanda a nainkalintegan a napusgan a mangiwardas iti kinasaserdoteda.

21 Ngem, babaen ti paulog maipanggep iti kalinteganda iti kinasaserdote manipud iti ama nga agpababa iti anak, mabalinda a tuntonen ti pannakatudingda no iti ania man a panawen mapaneknekanda ti nagtaudanda, wenno mapaneknekan babaen ti paltiing manipud iti Apo babaen dagiti ima iti naagapad a nagan ti Panguluen.

22 Ket manen, awan ti obispo wenno nangato a saserdote a mapatalgedan iti daytoy a panagserbi ti masubok wenno mapabasol iti ania man a krimen, malaksid iti sango ti Umuna a Panguluen ti simbaan;

23 Ket no la ketdi mapaneknekan a nagbasol iti sango daytoy a Panguluen, babaen ti pammaneknek a saan a marubsi, madusanto;

24 Ket no agbabawi mapakawanto, a maibatay kadagiti katulagan ken bilin ti simbaan.

25 Ket manen, no la ketdi adda annak dagiti nagannak iti Zion, wenno iti sadino man nga istaka a nabangon, a dida isuro nga umawat iti doktrina ti panagbabawi, pammati ken ni Cristo nga Anak ti sibibiag a Dios, ken iti panagbuniag ken ti sagut ti Espiritu Santo babaen ti panangipatay kadagiti dakulap, no walon ti tawenna, dagiti nagannak ti pakaipabaklayan ti basol.

26 Ta daytoyto ti paglintegan kadagiti agindeg iti Zion, wenno iti ania man kadagiti istakana a nabangon.

27 Ket mabuniaganto dagiti annakda para iti pannakaugas dagiti basolda no agtawendan iti walo, ket awatenda ti pannakaipatay dagiti dakulap.

28 Ken isurodanto met dagiti annakda nga agkararag, ken magna a sililinteg iti imatang ti Apo.

29 Ken ngilinen met dagiti agindeg iti Zion ti Aldaw a Panaginana tapno mapagtalinaedda a nasantuan.

30 Ken kasta met a laglagipento dagiti agindeg iti Zion dagiti trabahoda, no ta matudinganda nga agtrabaho, iti amin a kinapudno; ta mapalagipanto dagiti sadut iti imatang ti Apo.

31 Ita, siak, ti Apo, saanak unay a maragsakan kadagiti agindeg iti Zion, ta adda dagiti sadut kadakuada; ken kasta met a dumakdakkel dagiti annakda iti kinadangkes; saanda met a napasnek a mangtunton iti kinabaknang ti kinaagnanayon, ngem napno dagiti matada iti kinaagum.

32 Saan koma a kastoy dagitoy a banag, ket nasken nga isardengda koman; gapuna, paidanonyo iti katulongak a ni Oliver Cowdery dagitoy a balikas iti daga ti Zion.

33 Ket itedko kadakuada ti bilin—nga isu a di agtungpal kadagiti kararagna iti imatang ti Apo iti dayta a panawen, palagipanyonto ida iti imatang ti ukom dagiti taok.

34 Pudno ken napudno dagitoy a balikas; gapuna, diyo ida pagbasolan, wenno kerrasan.

35 Adtoy, siak ti Alpha ken Omega, ket umayak a di agtantan. Amen.