1 Nokwar, mese hom m’anyɛnkofo dɛ, medze me ndze kasa kyerɛ hom, mo Sunsum ne ndze mpo, ama maada me pɛ edzi akyerɛ hom wɔ hom enuanom a wɔwɔ Zion asaase do ho, hɔn mu dodowara yɛ ahobrɛadze ampa, na wɔreper esũa nyansa na woehu nokwar no.

2 Nokwar, nokwar, mese hom dɛ, nhyira nye dɛm nkorɔfo no, na hɔn nsa bɛkã, na Emi, Ewuradze, muhu hɔn a wɔdwe nyinara nye hɔn a mepɛ mbɔbɔr ama sɛ medze hɔn ba atsɛmbu ase a meedzi bem.

3 Hwɛ, dza mekã kyerɛ hom wɔ skuul a ɔwɔ Zion ho nye dɛ, Emi, Ewuradze, ɔyɛ me enyigye pii dɛ wonya skuul wɔ Zion, na m’enyi gye m’akowaa Parley P. Pratt so ho osiandɛ ɔtse mo mu.

4 Na mber dodow biara a ɔbɔkɔ do atsena mo mu no, ɔbɔkɔ do ahwɛ skuul no a ɔwɔ Zion asaase do no do ekesi dɛ mebɛma no mbrasɛm fofor bi so.

5 Na medze nhyira mbɔho behyira no ma ɔaakyerɛkyerɛ kyerɛwsɛm nye esumasɛm nyina mu dze aama skuul no nye asɔr a ɔwɔ Zion no ntowdo.

6 Na hɔn a wɔwɔ skuul hɔ no, Emi, Ewuradze, mepɛ dɛ muhu hɔn mbɔbɔr; eso hɔn mu binom wɔ hɔ a ɔsɛ dɛ wɔtsẽa hɔn, na hɔn ndwuma bɛda edzi.

7 Wɔdze ekuma ato dua no ndwow ho dada; dɛ dua biara a ɔannsow eduaba pa no, wobotwa no egu na wɔatow no akyen gya mu. Emi, Ewuradze, na makã.

8 Nokwar, mese hom a hom wɔ hɔn mu nyina a hom nyim dɛ hɔn akoma abobɔ na hɔn esunsum abotow na wodzi nokwar, na wɔpɛ dɛ wɔdze hɔnho bɔ afɔr dzi hɔn ahyɛmu do no—nyew, afɔrbɔdze biara a Emi, Ewuradze, mebɛhyɛ no—mebɛgye hɔn ato mu.

9 Na emi, Ewuradze, mebɛma wɔayɛ dɛ dua a wɔatsɛw no wɔ esutsen pa ho. Wɔbɔsow eduaba a ɔsom bo pii.

10 Nokwar, mese hom dɛ, ɔyɛ me pɛ dɛ wosi fi ma me wɔ Zion asaase do, tse dɛ nhwɛdo a medze ama hom no.

11 Nyew, hom mfa mo dɔm no hɔn ebupɛn du no nsi.

12 Hwɛ, iyi nye ebupɛn du na afɔrbɔdze a Emi, Ewuradze, morohwehwɛ efi hɔn nsamu, ama wɔdze esi dan ama medze ama Zion no nkwagye—

13 Ɔbɛyɛ bea a ahotseweefo nyina ndaase bea, a hɔn a wɔafrɛ hɔn dɛ wɔmbɛyɛ ɔsomdwuma wɔ hɔn ɔfrɛ na dzibewdzi horow nyina mu no bɛgye nkyerɛkyerɛ efi.

14 Ama woeenya ntseasee a odzi mu wɔ hɔn ɔsomdwuma no ho, wɔ nwomasũa mu, nye fapem ho, nye nkyerɛkyerɛ, nye biribiara a ho hia ma Nyankopɔn n’ahenman no wɔ asaase do, dɛm ahenman no a wɔdze ne nsaafee ama hom no.

15 Na mber dodow biara a mo nkorɔfo besi dan ama me wɔ Ewuradze ne dzin mu, na wɔnnkɛma wɔdze adze fĩ biara akɔ mu dze egu ho fĩ no, m’enyimnyam bɛhyerɛn do;

16 Nyew, na m’enyim bɔwɔ hɔ, osiandɛ mebɛba mu, na hɔn a wɔbɛba mu nyina a hɔn akoma mu tsew no bohu Nyame.

17 Mbom sɛ wogu ho fĩ a, meremmba mu, na m’enyimnyam rennhyerɛn hɔ; osiandɛ meremmba temple a no mu nntsew mu.

18 Na afei, hwɛ, sɛ Zion yɛ ndzɛmba yinom a ɔbɛyɛ prɔmprɔm, na ɔatserɛw no mu, na oenya enyimnyam, na ɔayɛ kɛse, na no ho ayɛ hu.

19 Na asaase do aman bedzi no nyi, na wɔase dɛ: Ampa, Zion yɛ hɛn Nyame no kuropɔn, na ampa, Zion runntum nnhwe ase, nna orunntu mmfi ne sibew, osiandɛ Nyame wɔ hɔ, na Ewuradze ne nsa so wɔ hɔ;

20 Na ɔdze no tum ahoɔdzen akã ntam dɛ ɔbɛyɛ ne nkwagye na n’abantsentsen.

21 Dɛm ntsi, nokwar, dɛm na Ewuradze se, hom mma Zion ndzi ehurusi osiandɛ iyi nye Zion—akoma a no mu tsew; dɛm ntsi, hom mma Zion ndzi ehurusi, ber a emumuyɛfo nyina besi nkrum no.

22 Na hwɛ, na hu, awerdzi reba ndzebɔnyɛfo do ntsɛm dɛ ekyinehyia-mframa; na woana na obefi nsa?

23 Na Ewuradze ne ntsẽa botwuw afa hɔn do anago na adzekyee, na no ho amandzɛɛ bɛyɛ nyimpa nyina hu; nyew, onnkegyaa ekesi dɛ Ewuradze bɛba;

24 Na hɔn mbusu a wɔabɔ na emumuyɛdze nyina bɛma Ewuradze n’ebufuhyew aba hɔn do.

25 Eso, sɛ Zion bɔ mbɔdzen yɛ ndzɛmba nyinara a mahyɛ no a, obefi nsa.

26 Mbom sɛ ɔammbɔ mbɔdzen enndzi adze nyina a mahyɛ no do a, medze ɔhaw kɛse, nye atseetsee, nye ɔyardɔm, nye nkrantsee, nye awerdzi, nye ogyaframee bɛba abɛsera no dɛ mbrɛ no ndwuma nyina tse.

27 Na wɔmma wɔnkenkan ngu n’asomu bio dɛ, emi, Ewuradze magye n’afɔrbɔdze; na sɛ ɔannyɛ bɔn bio a, dɛm ndzɛmba yinom mu biara nnkɛba no do;

28 Na medze nhyira behyira no, na mama ne nhyira nye n’ebusuasantsen so dze ayɛ mbɔho mbɔho afebɔɔ kesi afebɔɔ, dɛm na Ewuradze hom Nyankopɔn se. Amen.