Vahe 14
1 Koe fai ofa a Helami kia Tevita. 2 Koe monuia a Tevita i he mea kehekehe. 8 Koe tau e ua naa ne malohi ai ki he kau Filisitia.
¶ 1 KA koeni, nae kouna atu e Helami koe tu‘i o Taia ae kau talafekau kia Tevita, ke ave ae gaahi taaga sita, moe kau tufuga maka, moe kau tufuga akau, ke laga ha fale moona.
2 Bea nae ilo e Tevita kuo fakababau mei a Jihova ke tu‘i ia ki Isileli, he nae hakeaki‘i ke maoluga a hono buleaga, koeuhi ko ene kakai Isileli.
¶ 3 Bea nae toe fakatokolahi e Tevita a hono gaahi unoho i Jelusalema: bea nae toe tubu ia Tevita ae gaahi foha moe gaahi ofefine kehe.
4 Koeni ia ae higoa oe fānau naa ne ma‘u i Jelusalema: ko Samua, mo Sobabi, mo Natani, mo Solomone,
5 Mo Ibia, mo Ilisua, mo Ilifileti,
6 Mo Noka, mo Nefeki, mo Jafia,
7 Mo Ilisama, mo Beliata, mo Ilifileti.
¶ 8 Bea i he fanogo e he kakai Filisitia kuo fakanofo a Tevita koe tu‘i ki Isileli katoa, nae alu hake ae kakai Filisitia kotoabe ke kumi kia Tevita. Bea nae fanogo ki ai a Tevita, bea naa ne alu atu ke talia akinautolu.
9 Bea nae ha‘u ae kakai Filisitia mo nau fakamafola atu akinautolu i he botu talalo o Lifemi.
10 Bea nae fakafehui e Tevita ki he Otua, o ne behe, Teu alu hake ke tau‘i ae kakai Filisitia? bea te ke tuku mai akinautolu ki hoku nima? Bea nae behe kiate ia e Jihova, Ke ke alu hake; he teu tukuage akinautolu ki ho nima.
11 Koia naa nau hoko hake ki Beali‐bilasimi; bea nae teia akinautolu i ai e Tevita. Bea nae toki behe e Tevita, Kuo ba atu ae Otua ki hoku gaahi fili aki a hoku nima o hage koe ba atu ha gaahi vai: koia nae ui ai ae botu koia ko Beali‐bilasimi.
12 Bea i he e nau tuku a ho nau gaahi tamabua i ai, nae fekau e Tevita, bea nae tutu akinautolu i he afi.
13 Bea nae toe ha‘u ae kakai Filisitia o fakamafola atu akinautolu i he botu talalo.
14 Koia nae toe fehui ai e Tevita ki he Otua; bea nae behe e he Otua kiate ia, Oua naa ke alu hake kiate kinautolu; foki atu meiate kinautolu, bea hoko mai kiate kinautolu i he botu oku feouga tonu moe vaoakau molibeli.
15 Bea e hoko o behe, oka ke ka ogo‘i ae mumuhu i he ulu‘i akau molibeli, te ke toki alu atu ki he tau: koeuhi kuo muomua atu iate koe ae Otua ke ne teia ae tau ae kakai Filisitia.
16 Koia nae fai e Tevita o hage koia nae fekau kiate ia e he Otua: bea naa nau teia ae kau tau oe kakai Filisitia mei Kibione o a‘u atu ki Kesa.
17 Bea nae mafola atu ae ogoogo o Tevita ki he gaahi fonua kotoabe; bea nae fakahoko e Jihova ae manavahe kiate ia ki he gaahi buleaga kotoabe.