¶ 1 BEA hili eni nae hoko o behe, nae bekia ae tu‘i oe fānau a Amoni ko Nahasi, bea nae fetogi ia i he bule e hono foha.

2 Bea nae behe e Tevita, Teu fai ofa kia Hanuni koe foha o Nahasi, koeuhi nae fai ofa kiate au e he ene tamai. Bea nae fekau atu e Tevita ae kau tagata ke lea fakafiemalie kiate ia koeuhi ko ene tamai. Bea behe, nae hoko atu ae kau tamaioeiki a Tevita ki he fonua oe fānau a Amoni kia Hanuni koeuhi ke fakafiemalie kiate ia.

3 Ka nae behe e he houeiki oe fānau a Amoni kia Hanuni, Oku ke mahalo koa kuo fai fakaabaaba e Tevita ki hoo tamai, i he ene fakau mai ae kau fakafiemalie kiate koe? ka ikai kuo ha‘u a ene kau tamaioeiki kiate koe, koeuhi ke hakule, bea ke fakahiga‘i, bea ke mataki‘i ae fonua?

4 Koia nae buke e Hanuni ae kau tamaioeiki a Tevita, mo ne tele ho nau kava, mo ne tuuji ua a ho nau gaahi kofu o feouga mo ho nau tuugaiku, mo ne toki fekau‘i ke nau alu.

5 Bea nae alu ai ae niihi mo nau fakaha kia Tevita ae mea kuo fai ki he kau tagata. Bea naa ne fekau atu ke fetaulaki kiate kinautolu: he nae ma lahi aubito ae kau tagata. Bea nae behe e he tu‘i, Mou nofo ki Jeliko kae oua ke tubu hake a ho mou kava, bea mou toki omi.

¶ 6 Bea i he toki ilo e he fānau a Amoni kuo nau fakanamuku‘i akinautolu kia Tevita, nae ave e Hanuni moe fānau a Amoni ha taleniti siliva e afe ke totogi aki ha gaahi jaliote moe kau heka hose mei Mesobotemia, bea mei Silia‐meaka, bea mei Soba.

7 Koia naa nau totogi ke ma‘u ai ae gaahi jaliote e tolu mano moe ua afe, bea moe tu‘i o Meaka bea mo hono kakai; bea naa nau ha‘u o fakanofo e nau tau i Metiba. Bea nae fakataha akinautolu e he fānau a Amoni mei ho nau gaahi kolo, o nau ha‘u ki he tau.

8 Bea i he ene fanogo ki ai a Tevita, naa ne fekau atu a Joabe, bea moe kau tau kotoabe koe kau tagata to‘a lahi.

9 Bea nae hu mai kitua ae fānau a Amoni mo nau fakanofo ae tau i he ao oe mataba oe kolo: bea nae nofo kehe takataha ae gaahi tu‘i nae ha‘u, i he botu goue.

10 Bea i he ene jio e Joabe kuo fakanofo ae kau tau ke tau‘i ia i ao bea mei tua, naa ne fili mai ae kau malohi mei Isileli, mo ne tuku akinautolu ke tau‘i ae kakai Silia.

11 Bea naa ne tuku a hono toe oe kakai ki he nima o hono tokoua ko Abisai, bea naa nau tali tau akinautolu ki he fānau a Amoni.

12 Bea naa ne behe, Kabau e malohi fau ae kakai Silia kiate au, te mou toki tokoni kiate au; bea kabau e malohi fau ae fānau a Amoni kiate koe, teu toki tokoni e au kiate koe.

13 Mou loto to‘a, bea ke tau fai galigali tagata ma a ho tau kakai, bea koeuhi koe gaahi kolo o ho tau Otua bea ke fai e Jihova ae mea oku ne finagalo lelei ki ai.

14 Koia nae unuunu atu a Joabe moe kakai nae kau moia, ki he ao oe kakai Silia ke fai ae tau; bea naa nau hola mei hono ao.

15 Bea i he jio e he fānau a Amoni kuo hola ae kakai Silia, naa nau hola foki akinautolu mei he ao o Abisai ko hono tokoua, mo ne hu atu ki he kolo. Hili ia nae ha‘u a Joabe ki Jelusalema.

¶ 16 Bea i he jio e he kakai Silia kuo nau tuutamaki i he ao o Isileli, naa nau kouna atu ae kau tagata fekau, ke nau omi ae kau Silia nae nofo i he kau vai e taha: bea nae tataki akinautolu e Sofaki koe eiki ki he kau tau o Hetatesa.

17 Bea nae fakaha ia kia Tevita; bea naa ne tanaki fakataha a Isileli katoa, mo ne laka atu i he Joatani, mo ne hoko atu kiate kinautolu, bea ne teuteu ke fai ae tau kiate kinautolu. Bea behe, hili ae teuteu ae tau e Tevita ke fai ki he kakai Silia, naa nau fai moia ae tau.

18 Ka nae hola ae kakai Silia mei he ao o Isileli; bea nae tamate‘i e Tevita oe kakai Silia ae kau tagata nae heka jaliote, koe toko fitu afe, moe kakai haele e toko fa mano, bea naa ne tamate‘i a Sofaki koe eiki nae bule ki he kau tau.

19 Bea i he jio e he kau tamaioeiki a Hetatesa kuo nau tuutamaki i he ao o Isileli, naa nau alea ke nau melino mo Tevita, bea naa nau hoko o tokalalo kiate ia: bea nae ikai toe loto ae kakai Silia ke tokoni ki he fānau a Amoni.