¶ 1 BEA nae toki behe e Tevita, Koeni ae fale o Jihova koe Otua, bea koe feilaulauaga eni oe gaahi feilaulau tutu ma a Isileli.

2 Bea nae fekau e Tevita ke tanaki fakataha mai ae kakai muli kotoabe i he fonua o Isileli; bea naa ne tuku ae kau tagata ta maka ke ta ae gaahi maka tātā ke laga aki ae fale oe Otua.

3 Bea nae tokonaki e Tevita ae ukamea o lahi aubito koeuhi koe fa‘o ki he gaahi mataba oe gaahi huaga, bea mo hono gaahi hokoaga; bea moe balasa lahi aubito tae faa fakamamafa;

4 Bea moe gaahi akau sita lahi aubito: he nae omi ekinautolu o Saitoni mo Taia ae akau sita lahi aubito kia Tevita.

5 Bea nae behe e Tevita, Oku kei talavou mo vaivai a hoku foha ko Solomone, bea oku totonu ke lelei lahi aubito ae fale e laga kia Jihova, ke ogoogolelei ia mo nāunāuia i he gaahi fonua kotoabe: koia teu tokonaki eni ki ai. Bea koia nae tokonaki ki ai e Tevita o lahi aubito i he heeki ai ke ne bekia.

¶ 6 Bea naa ne toki ui kia Solomone ko hono foha, mo ne tuku tala kiate ia ke laga ha fale kia Jihova koe Otua o Isileli.

7 Bea nae behe e Tevita kia Solomone, E hoku foha, ko au eni, bea nae i hoku loto ia keu laga ha fale ki he huafa o Jihova ko hoku Otua;

8 Ka nae hoko mai ae folofola a Jihova kiate au, o behe, Kuo lahi ae toto kuo ke liligi, bea kuo ke fai ae gaahi tau lahi: e ikai te ke laga ekoe ha fale ki hoku huafa, koeuhi kuo ke liligi ae toto lahi aubito ki he kelekele i hoku ao.

9 Vakai, e fanau‘i kiate koe ha foha, aia e hoko koe tagata oe melino; bea teu tuku kiate ia ae mālōlō mei hono gaahi fili kotoabe oku nofo takatakai hake; koeuhi e fakahigoa ia ko Solomone, bea teu foaki ae melino moe fiemalie ki Isileli i hono gaahi aho oona.

10 E laga eia ha fale ki hoku huafa; bea e hoko ia ko hoku foha, bea ko ene tamai au; bea teu fokotuu ae nofoa fakatu‘i o hono buleaga i Isileli ke taegata.

11 Koia, e hoku foha, ofa ke iate koe a Jihova; bea ke monuia koe, mo ke laga ae fale o Jihova ko ho Otua, o hage ko ene folofola kiate koe.

12 Kae kehe be ke foaki e Jihova kiate koe ae boto moe ilo lelei, mo ne fekau‘i koe koeuhi ko Isileli, koeuhi ke ke fai ki he fono a Jihova ko ho Otua.

13 Te ke toki monuia, o kabau te ke tokaga ke fai ae gaahi fono moe gaahi fakamāu aia nae fekau‘i ai a Mosese koeuhi ko Isileli: ke ke malohi koe, mo ke loto to‘a; oua naa ke manavahe be te ke lilika.

14 Koeni, vakai, lolotoga a eku majiva kuou tokonaki ma ae fale o Jihova, koe taleniti koula e taha kilu, moe taleniti siliva e taha miliona; bea moe balasa moe ukamea tae faa fakamamafa; he oku lahi noabe ia: kuou tokonaki foki ae gaahi taaga akau moe gaahi maka; bea te ke faa fakalahi ekoe ki ai.

15 Bea oku iate koe foki ae kau tufuga toko lahi aubito, koe kau tufuga ta maka mo ta akau, moe kau tagata nimameaa ki he gaue kehekehe kotoabe.

16 Oku ikai faa lau‘i ae koula, moe siliva, bea moe balasa, moe ukamea. Koia, ke ke tuu hake koe mo ke gaue bea ke iate koe a Jihova.

¶ 17 Nae fekau foki e Tevita ki he houeiki kotoabe o Isileli ke tokoni kia Solomone ko hono foha,  o behe,

18 Ikai oku kau mo kimoutolu a Jihova ko ho mou Otua? bea ikai kuo ne foaki kiate kimoutolu ae fiemalie mei he botu takatakai kotoabe? he kuo ne tuku mai ki hoku nima ae kakai oe fonua; bea kuo ikuna ae fonua i he ao o Jihova, bea i he ao o hono kakai.

19 Bea koeni mou tuku bau ho mou loto mo ho mou laumalie ke kumi kia Jihova ko ho mou Otua; koia, mou tutuu hake mo laga ekimoutolu ae fale tabu kia Jihova koe Otua, koeuhi ke omi ae buha oe fuakava a Jihova, moe gaahi nāunāu tabu oe Otua ki he fale aia e laga ki he huafa o Jihova.