¶ 1 BEA nae fakataha e Tevita, ki Jelusalema, ae houeiki kotoabe o Isileli, ae houeiki oe gaahi faahiga, moe gaahi eiki oe gaahi kaugagaue aia nae tauhi ki he tu‘i i ho nau lakaga, moe gaahi eiki nae bule ki he gaahi toko afe, moe gaahi eiki nae bule ki he gaahi toko teau, moe kau tauhi koloa kotoabe nae bule ki he koloa moe faga manu ae tu‘i, moia nae i hono gaahi foha, moe kau matābule, moe kau tagata malohi lahi, bea moe kau tagata to‘a kotoabe.

2 Bea nae toki tuu hake a Tevita koe tu‘i ki hono va‘e, o ne behe, E hoku kaiga, mo hoku kakai, fanogo mai kiate au: naaku tokaga i hoku loto ke laga ha fale koe mālōlōaga ki he buha oe fuakava a Jihova, bea koe botu ke tuu ai ae va‘e o ho tau Otua, bea naaku fai ae tokonaki ma ae laga fale:

3 Ka nae behe mai e he Otua kiate au, E ikai te ke laga ekoe ha fale ki hoku huafa, koeuhi koe tagata faa tau koe, bea kuo ke liligi ae toto.

4 Ka nae fili mua au e Jihova koe Otua o Isileli mei he fale kotoabe o eku tamai keu hoko koe tu‘i ki Isileli o taegata: he kuo ne fili a Juta ke bule; bea mei he fale o Juta, koe fale o eku tamai aaku; bea mei he gaahi foha o eku tamai naa ne finagalo lelei kiate au keu hoko koe tu‘i ki Isileli katoa:

5 Bea i hoku gaahi foha kotoabe, (he kuo foaki e Jihova ae gaahi foha toko lahi kiate au,) kuo ne fili a Solomone ko hoku foha, ke nofo ki he nofoa fakatu‘i oe buleaga o Jihova ke bule‘i a Isileli.

6 Bea naa ne behe kiate au, Ko Solomone ko ho foha, koia ia e laga a hoku fale, mo hoku gaahi loto a: he kuou fili ia ke hoko ko hoku foha, bea teu hoko au ko ene tamai.

7 Bea teu fokotuu mau foki a hono buleaga ke taegata, o kabau te ne malohi ke fai a eku gaahi fekau mo eku gaahi fakamāu, o hage koia oku fai he aho ni.

8 Koia foki, mou tauhi mo kumi ki he gaahi fekau kotoabe a Jihova ko ho mou Otua, i he ao o Isileli katoa koe fakataha kia Jihova, bea i he afio ki ai a ho tau Otua: koeuhi ke mou ma‘u ae fonua lelei ni, bea tuku fakaholo ia koe tofia ki hoo mou fānau ki mui iate kimoutolu o taegata.

¶ 9 Bea ko koe, E Solomone ko hoku foha, ke ke ilo ekoe ki he Otua o hoo tamai, bea ke tauhi kiate ia aki ho loto katoa, bea i he loto fie fai: he oku hakule e Jihova ae loto kotoabe, bea oku ne ilo‘i ae filioi moe fakakaukau kotoabe: kabau te ke kumi kiate ia, te ke ilo ia ekoe; bea kabau te ke jiaki ia, te ne jiaki koe o lauikuoga.

10 Bea ke tokaga eni; he kuo fili koe e Jihova ke ke laga ha fale ma ae fale tabu: ke ke malohi koe, bea ke gaue.

¶ 11 Bea nae toki age e Tevita kia Solomone ko hono foha ae fakatātā ki he fale huaga fakamalumalu, bea mo hono gaahi botu fale oia, bea koe gaahi botu tukugakoloa i ai, bea mo hono gaahi botu fale ki oluga, mo hono gaahi botu fale ki loto, bea moe botu ma ae afioaga oe aloofa,

12 Bea moe fakatātā oe mea kotoabe nae ilo eia mei he laumalie, i he gaahi loto a oe fale o Jihova, bea moe gaahi botu‘i fale kotoabe nae tuu takatakai, moe gaahi botu tukuga koloa oe fale oe Otua, bea moe gaahi tukuga koloa oe gaahi mea nae fakatabu‘i:

13 Bea koe gaahi lakaga foki oe kau taulaeiki moe kau Livai, bea moe gaue kotoabe oe tauhi i he fale o Jihova, bea koeuhi koe gaahi nāunāu oe gaue i he fale o Jihova:

14 Koe koula nae fakamamafa ki he mea koula, ma ae gaahi nāunāu ki he gaue kehekehe kotoabe: moe siliva nae fakamamafa ki he gaahi mea siliva ki he gaue kehekehe kotoabe:

15 Io, ae mamafa oe koula ma ae gaahi tuugamāma, bea ma ae gaahi aiaga lolo koula, koe fakamamafa ma ae tuugamāma taki taha, bea ma a hono gaahi aiaga lolo: bea nae fakamamafa ae siliva ma ae gaahi tuugamāma siliva, ki he tuugamāma mo hono gaahi aiaga lolo, o fakatatau ki he aga oe tuugamāma taki taha.

16 Bea naa ne fakamamafa ae koula ma ae gaahi balebale oe ma oe ao, ki he balebale taki taha; bea moe siliva ki he gaahi balebale siliva:

17 Moe koula haohaoa foki ki he gaahi mea hikofi kakano, moe gaahi ibu luoluo, bea moe gaahi ibu inu: bea nae fakamamafa ae koula ma ae gaahi ibu koula luoluo, ki he ibu luoluo taki taha; bea behe moe fakamamafa ae siliva ki he gaahi ibu siliva luoluo taki taha:

18 Bea moe koula nae fakamaa nae fakamamafa ma ae feilaulauaga oe mea namu kakala; moe koula ki he fakatātā oe jaliote oe gaahi jelubi aia nae malofa a ho na kabakau, mo fakamalumalu aki ae buha oe fuakava o Jihova.

19 Nae fakailo mai eni kotoabe i he tohi e Jihova, i he iate au a hono nima, ae gaahi gaue kotoabe oku i he fakatātā ni.

20 Bea nae behe e Tevita kia Solomone ko hono foha, Ke ke malohi koe mo ke to‘a lahi, mo gaue: oua naa ke manavahe, be te ke lilika: he ko Jihova koe Otua, ko hoku Otua, e kau ia kiate koe; e ikai te ne fakatukutuku‘i koe, be te ne liaki koe, kae oua ke ke fakaoji ae gaue kotoabe ki he tauhi ae fale o Jihova.

21 Bea vakai, koe gaahi lakaga oe kau taulaeiki moe kau Livai e anautolu ae gaahi gaue kehekehe i he fale oe Otua: bea e iate koe ki he gaahi gaue kehekehe kotoabe, ae kau tagata boto kotoabe oku fie fai, ki he gaahi gaue kehekehe; bea e tali fekau foki meiate koe ae houeiki bea moe kakai kotaabe.