¶ 1 KOENI koe gaahi foha o Lubeni, koe uluaki fanau kia Isileli, (he koe uluaki fanau ia; ka koe mea i he ene fakauli‘i ae mohega o ene tamai, koia nae foaki ai ae inaji oe uluaki fanau ki he gaahi foha o Josefa koe foha o Isileli: bea oku ikai lau ae hohoko o fai mei he uluaki fanau.

2 He nae malohi hake a Juta ki hono gaahi tokoua, bea nae meiate ia ae eiki bule, ka koe inaji oe uluaki fanau nae ia Josefa ia:)

3 Io, koe gaahi foha o Lubeni koe uluaki fanau kia Isileli, ko Henoke, mo Falu, mo Hesiloni, mo Kalimi.

4 Koe gaahi foha o Joeli; ko Simaia ko hono foha, mo Koki ko hono foha oona, mo Simi ko hono foha oona,

5 Ko Maika ko hono foha oona, ko Liaia ko hono foha oona, ko Beali ko hono foha oona,

6 Ko Biela ko hono foha oona, aia nae ave  fakabobula e Tekilati‐bilesa koe tu‘i o Asilia: koe eiki ia oe faahiga o Lubeni.

7 Bea koe tuu ki mua eni i hono gaahi tokoua oona i ho nau gaahi faahiga, i he ene lau hake ae hohoko o ho nau gaahi toutagata, ko Jehieli, mo Sakalia,

8 Mo Bela koe foha o Asasi, koe foha o Sema, koe foha o Joeli, aia nae nofo i Aloeli, o a‘u atu ki Nibo mo Beali‐mioni.

9 Bea ki he feituu hahake naa ne nofo o a‘u atu ki he huaga oe toafa mei he vaitafe ko Iufaletesi: koeuhi nae tubu o lahi e nau faga manu i he fonua o Kiliati.

10 Bea i he gaahi aho o Saula naa nau fai ae tau ki he kakai Hekaa, bea naa nau to hifo i ho nau nima: bea naa nau nofo i ho nau gaahi falefehikitaki i he feituu hahake kotoabe o Kiliati.

¶ 11 Bea nae nofo hagatonu mai kiate kinautolu ae fānau a Kata, i he fonua o Besani, mo Salika:

12 Ko Joeli koe eiki lahi, bea hoko moia a Safami, mo Janei, mo Safati i Besani.

13 Bea ko ho nau kaiga eni i he fale oe nau gaahi tamai, ko Mikaeli, mo Mesulami, mo Seba, mo Jolei, mo Jakani, mo Sia, mo Heba, koe toko fitu.

14 Bea koe fānau eni a Abieli koe foha o Huli, koe foha o Jaloa, koe foha o Kiliati, koe foha o Mikaeli, koe foha o Jesisai, koe foha o Jato, koe foha o Busa;

15 Ko Ahi koe foha o Abitieli, koe foha o Kuni, koe eiki ia i he fale oe nau gaahi tamai.

16 Bea naa nau nofo i Kiliati i Besani, bea i hono gaahi kolo, bea i he gaahi botu tuaa o Saloni, i ho nau gaahi gataaga  fonua.

17 Nae lau hake eni kotoabe o fakatatau mo ho nau gaahi toutagata i he gaahi aho o Jotami koe tu‘i o Juta, bea i he gaahi aho o Jeloboami koe tu‘i o Isileli.

¶ 18 Koe gaahi foha o Lubeni, moe kakai Kata, mo hono vahe ua oe faahiga o Manase, ae kau tagata to‘a, koe kau tagata nae faa too ae ba bea moe heleta, bea faa fana aki ae kaufana, mo boto i he tau, ko ho nau toko lahi koe toko fa mano, moe fa afe ma fitugeau ma onogofulu, nae alu atu ki he tau.

19 Bea naa nau fakalaga ae tau ki he kakai Hekaa, bea kia Jetuli, mo Nafisi, bea mo Notabi.

20 Bea nae tokoni akinautolu i he e nau fai kiate kinautolu, bea nae tukuage ae kakai Hekaa ki ho nau nima, bea mo kinautolu kotoabe nae kau mo kinautolu: he naa nau tagi ki he Otua i he tau, bea naa ne fakaogo kiate kinautolu; koeuhi naa nau fakafalala kiate ia.

21 Bea naa nau ave ae nau faga manu; koe faga kameli e nima mano, moe faga sibi e ua kilu moe nima mano, moe faga asi e ua afe, bea moe kakai tagata e toko taha kilu.

22 He nae to o mate ae fuu toko lahi, he nae mei he Otua ae tau. Bea naa nau nofo i ho nau gaahi botu onautolu o a‘u ki he  kuoga oe fakabobula.

¶ 23 Bea nae nofo i he fonua ae fānau oe vahe ua oe faahiga o Manase: naa nau tubu o toko lahi mei Besani o a‘u atu ki Bealiheamoni, mo Sinili, o a‘u ki he mouga ko Heamoni.

24 Bea ko kinautolu eni ae kau mātua i he fale oe nau gaahi tamai, io, a Hefeli, mo Isi, mo Ilieli, mo Asilieli, mo Jelemaia, mo Hotevia, mo Jatieli, koe kau tagata to‘a lahi, koe kau tagata ogoogolahi, moe kau mātua i he fale oe nau gaahi tamai.

¶ 25 Bea naa nau fai agahala ki he Otua oe nau gaahi tamai, bea naa nau alu kehe ke muimui ki he gaahi otua oe kakai oe fonua, aia nae fakaauha e he Otua i mua iate kinautolu.

26 Bea nae ue‘i hake e he Otua o Isileli ae loto o Buli koe tu‘i o Asilia, moe loto o Tekilati‐bilesa koe tu‘i o Asilia, bea naa ne ave bobula akinautolu, io, ae kakai Lubeni, moe kakai Kata, moe vahe ua oe faahiga o Manase, bea naa ne omi akinautolu ki Hela, mo Haboa, mo Hala, bea ki he vaitafe ko Kosani, o a‘u mai ki he kuoga ni.